PĀ GƏ̄ 4 - Bibəl ta Sar̄

Tetən̄ najə̄ dɔn tə́ ba Nə́ɓā un dɔn tə́

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. A dānə̄n̄ gō i kə kəndeé.

² Nə́ɓā, ḭ̄ ń i de kə́ sew yāḿ ní, loo ń ré m̄-ɓāríī anī ī-ndigəm̄ tə́! Dan ń wur kɔl əsō dɔḿ tə́ ní ḭ̄ ī-rāā seḿ adə̄ loo tóom̄ néĺ tə́. Ādə̄ kumií o̰o̰ī ba ōō ndɔ̄ȳ yāḿ.

³ Sḭḭ̄ de gə̄ ń nel̄sí sekə́ deē kanjə̄ kumən ō, ī-sāāī tetə najə̄ dɔḿ tə́ ō ní, i rə́ngáý tə́ n a asəsí kídə̄ kɔsə gɔn yāḿ ní?

⁴ Yá̰á̰ ń kadə̄ ī-gerī ní n toó: Kɔ́ɔ̄ɓē ɔr̄ kam̄ deē yān tayā, dan ń m̄-ɓārə́n kadə̄ dḭḭ̄m̄ anī ni ndigəm̄.

⁵ Ré wōn̄g rāāsí anī ī-lōōī rāā majaĺ. Ī-gírī yá̰a̰ dɔ tə̄rá ɓīīsí tə́ ba ī-lōōī kəda najə̄.

⁶ Ī-ndējī Kɔ́ɔ̄ɓē yá̰a̰ tun̄ gə̄ ń sɔɔ̄ kadə̄ ī-ndējī ní ba ə̄ndāī kemsí dɔn tə́.

⁷ Ngá̰ý gə̄ ədan̄ na, i náā n a rāā sejí kadə̄ jə-ndiī majə ní? Kɔ́ɔ̄ɓē, á̰á̰jí kə kumií kə́ majaá!

⁸ Ḭ̄ ī-rāā ādə̄ kemḿ nelə̄m̄ tɔȳ rɔ̄nel̄ yādə́ kə́ kem ndɔ̄ gə̄ ń gémē yādə́ ō, kasə nduú yādə́ ō, i ngá̰ý tə́ ní.

⁹ m̄-to kə̄ nang tə́ kə kem sɔlɔ́ ō, m̄-ɓīī kə̄ ta jī tə́ noō ō. Tɔdɔ̄ Kɔ́ɔ̄ɓē, i ḭ̄ ngóy n i nge rāā kadə̄ m̄-ndi kanjə̄ sōl̄ yá̰á̰ kógə̄ḿ ní.