PĀ GƏ̄ 39 - Bibəl ta Sar̄

Ādə̄ m̄-taā koō na deē a ndi ta kaw̄ sa̰y alé

¹ Pā kə́ kem makətūbə̄ yā ngār yā gōsə̄ pā gə̄ tə́, adə̄ i yā Yedutun. I pā yā Dabid.

² M-ə́da na: M-ā m-ə́hɔ rɔ̄ḿ tɔgə kadə̄ m-ɔ̄r̄ najə̄ kə́ majaĺ alé. Ré m̄-ndi loo kə nge kem nduluú anī, m-ā m-ə́hɔ taḿ dɔ najə̄ tə́.

³ Adə̄ m̄-ndi sélélé, m̄-ndi taḿ mbóo. Banī rɔ̄ḿ tɔ̄rə̄m̄ kə́ al̄ naā.

⁴ Wurəḿ nēgə́m̄ biting biting. Gír̄ najə̄ tɔȳ dɔḿ ō kemḿ o̰o̰ hor ō. Anī m̄-tḛḛ̄ taḿ m-ɔ̄r̄ najə̄ m-ə́da na:

⁵ Kɔ́ɔ̄ɓē, ɔ́jəm̄ ndɔ̄ ń gír yāḿ a gāngəń ní ādə̄ m̄-ger̄. M-ā m̄-rāā i ndɔ̄ kóndóńg? Ādə̄ m̄-ger̄ kadə̄ mā i de kə́ ndɔ̄ḿ i ngá̰ý alé!

⁶ Ḭ̄ ī-rāā ādə̄ ndɔ̄ḿ malang asə naā i kə laa da jī deé. Ɓālə̄ḿ gə̄ malang i yá̰a̰ alé ta kumií tə́. A̰á̰ā̰, de kə́ ngan̄g sim gə̄gē ni i koō ngóy ta kumií tə́!

⁷ Rɔ̄kum, deē aw̄ ō tél ō banī ni i ndíĺ yá̰a̰ karī! A̰á̰ā̰ aw̄ kə̄ yóō aw̄ kə̄ laā, banī ni i koō ngóy! Ni kán̄ yá̰a̰ kə̄ dɔ naā tə́ banī ger̄ deē ń a ɔy ní alé.

⁸ Ɓáa ń noō ní Kɔ́ɔ̄ɓē, kə̄ m̄-ngóō i rí kə́ rang? I ḭ̄ ngóy n m-ə̄ndā kemḿ dɔí tə́ ní.

⁹ Ī-gān̄g dɔḿ tū majaĺ yāḿ gə̄ tə́ malang. Ī-lōō kəya̰m̄ kadə̄ mbóo gə̄ əgōmə̄n̄.

¹⁰ M-ūtə̄ taḿ kɔ̄ɔ́, m-ā m-ə́da najə̄ to̰ alé, tɔdɔ̄ i ḭ̄ n ī-rāā yá̰á̰ ní.

¹¹ Ādə̄ asiī kəndam̄, na ndéy jīí a tɔ̄lə̄m̄.

¹² Ḭ̄ ɔ́jə deē yá̰a̰ kə ndéy jīí tām̄ yá̰a̰ rāān kə́ gōtə́ aĺ tə́. Yá̰á̰ ń kemən gḛy ngá̰ý ní ī-nujəń kɔ̄ɔ́ tītə̄ yā kur̄ beé. Rɔ̄kum deē ndul i nél karī.

¹³ Kɔ́ɔ̄ɓē, ōō ndɔ̄ȳ yāḿ ō nōō yāḿ ō. Ī-nēl̄ mbīí ōoń nōō yāḿ. Tɔdɔ̄ mā i de kə́ nge nam̄ ɓēé looí, mā i mbā tītə̄ yā kaaḿ gə̄ malang.

¹⁴ Ún kumií kɔ̄ɔ́ taḿ tə́, ādə̄ m̄-mūŕ kəgō tá m-āw̄ ō, m̄-gətóo kɔ̄ɔ́ ō.