PĀ GƏ̄ 37 - Bibəl ta Sar̄

Ī-lōō rāā wōn̄g najə̄ yā ngé kem ndul gə̄ kə́ kəla rāādə́ teē yá̰á̰ tə́

1 Pā yā Dabid.

¹ Pā yā Dabid. Ādə̄ wōn̄g rāāī kə ngé kem ndul gēé alé, ə̄ndā ngé rāā yá̰a̰ majaĺ gə̄ nii alé.

² Tɔdɔ̄ nin̄ a ndəlēn̄ láẃ tītə̄ mu beé ō, a tutən̄ tītə̄ mbī kámbə beé ō.

³ Ə̄ndā kemií dɔ Kɔ́ɔ̄ɓē tə́ ba ī-rāā yá̰á̰ kə́ majə, kadə̄ ī-ndiń dɔ nang ń Nə́ɓā adī tə́ ní ō, ə́sań yá̰a̰ ō, kanjə̄ sōl̄ yá̰á̰ kógə̄ḿ.

⁴ Ādə̄ i Kɔ́ɔ̄ɓē n i nge rāā kadə̄ rɔ̄í nelī ngá̰ý ní. Loo ń noō tə́ ni a adī yá̰á̰ ń ī-dəjen ní.

⁵ Ə́ya̰ rɔ̄í kem jī Kɔ́ɔ̄ɓē tə́. Ə̄ndā kemií dɔn tə́ anī ni a rāā yá̰a̰ tām̄ yāí tə́.

⁶ Ni a ɔjə háĺ kə́ súmūú yāí kə̄ ndágá tītə̄ loo kə́ tīī unjə̄ ō, a rāā kadə̄ yá̰á̰ kə́ gōtə́ yāí teē ndágá tītə̄ loo kə́ dan kadə ndaá ō.

⁷ Ī-ndi jəke rɔ̄ Kɔ́ɔ̄ɓē tə́, ə̄ndā kemií dɔn tə́. Ī-lōō kadə̄ tōrī kə deē ń kəla rāān teēn yá̰á̰ tə́ ní ō, kə deē ń a rāā yá̰a̰ i kə gól̄ looó ō ní.

⁸ Ī-lōō gír rāā wōn̄g tə́. Ādə̄ wōn̄g yāí kə́ ngá̰ý tetə. ī-lōō kadə̄ wōn̄g ḭḭ seí na sōgə́ ta tɔ̄l̄ tan a majə alé.

⁹ Tɔdɔ̄ a ɔrə̄n̄ ngé kem ndul gə̄ kɔ̄ɔ́. Banī ngé gə̄ ń əndān̄ kemdə́ dɔ Kɔ́ɔ̄ɓē tə́ ní a ndin̄ dɔ nang ń Nə́ɓā adə̄də́ tə́ ní.

¹⁰ Na̰y dan i ngá̰ý to̰ alé kadə̄ nge kem ndul a gətóo kɔ̄ɔ́. Ká ə̄ndā ma̰ȳ gotə loo ń ni-ndi tū tə́ ní ngá̰ý gə̄gē anī, ā á̰a̰ gō tóon alé.

¹¹ Banī ngé gə̄ ń télən̄ kə rɔ̄də́ kə̄ nang tə́ ní a əngen̄ dɔ nang. Nin̄ a ndin̄ kə kem sɔl̄ lɔm kə́ ngá̰ý.

¹² Nge kem ndul núm̄ yá̰á̰ kə́ majaĺ loo mundə̄ tə́ yā rāā kə de kə́ súmūú. Ni əndān ɓam.

¹³ Banī Kɔ́ɔ̄ɓē əgōn, tɔdɔ̄ ni-a̰a̰ ndɔ̄ yān ń a asə ní.

¹⁴ Ngé kem ndul gə̄ ɔrən̄ gō ga̰ gərā yādə́ gə̄ yā túrəń de kə́ nge rɔ̄ tō ndoō ō, de kə́ ndoō ō, yā tɔ̄l̄də́. Ró̰ȳn̄ kaskar yādə́ gə̄ yā tə́gań kɔ́ɔ de kə́ súmūú gə̄.

¹⁵ Banī kaskar yādə́ a ɔsə i kújə́ mósə́də́ nin̄ kɔ́ gə̄ ō, ga̰ gərā yādə́ a tétə̄ kɔ̄ɔ́ ō.

¹⁶ Yá̰a̰ kənge kə́ sḛ́ý beē yā de kə́ súmūú i só tə́, tɔȳ yá̰a̰ kənge kə́ ngá̰ý yā nge kem ndul.

¹⁷ Tɔdɔ̄ jī ngé kem ndul gə̄ a tétə̄. Banī Kɔ́ɔ̄ɓē rāā kə de kə́ súmūú gēé.

¹⁸ Kɔ́ɔ̄ɓē ger̄ ndɔ̄ yā de kə́ rɔ̄kum gə̄ ō, yá̰a̰ kənge yādə́ a to ngándáńg ō.

¹⁹ Dan yá̰á̰ kə́ to kum kaȳ aĺ tə́ anī rɔ̄də́ a sɔl̄də́ aĺ ō, dan yā ɓō tə́ anī nin̄ a ndānə̄n̄ ō.

²⁰ Ngé kem ndul gə̄ a oyn̄. Madə̄ ba̰ā̰ Kɔ́ɔ̄ɓē gə̄ a oyn̄ kɔ̄ɔ́ tītə̄ hútə̄ mu kə́ bembeé beē. Nin̄ a aw̄n̄ kɔ̄ɔ́, a aw̄n̄ tītə̄ sa hor beé.

²¹ Nge kem ndul taā yá̰a̰ loo ndə̄mā tə́ ba téləń adə̄ kɔ́ɔ̄n gogə́ alé. Kum de kə́ súmūú o̰o̰n adə̄ yá̰á̰ ń to jīn tə́ ní ni-adə̄.

²² Ngé gə̄ ń Nə́ɓā rāā majə sedə́ ní a əngen̄ dɔ nang, ba ngé gə̄ ń ni ndɔ̄ĺdə́ ní a ɔrə̄n̄də́ kɔ̄ɔ́.

²³ Nja deē a ngan̄g loo njə̄rā tə́ i kə ta kūl̄ Kɔ́ɔ̄ɓēé ō, róbə́ ń un ní nel̄ Kɔ́ɔ̄ɓē ō.

²⁴ Ré yá̰a̰ əgan anī a əsō alé, tām̄ Kɔ́ɔ̄ɓē əhɔ ta jīn.

²⁵ Kə ngōn̄ dūúḿ bátə́ m̄-tɔgəń toō ní m-á̰a̰ de kə́ súmūú kə́ əya̰nən̄ kɔ̄ɔ́ aĺ ɓáý ō, m-á̰a̰ de kə́ gír kaa yān tə́ loo gəde yá̰a̰ kəsa tə́ aĺ ɓáý ō.

²⁶ Kum de kə́ súmūú o̰o̰n kə dɔ ndɔ̄ gə̄, ni-adə̄ yá̰a̰ loo tə̄nā tə́ ō, de kə́ gír kojə yān tə́ gə̄ i ngé rāā majə kə de gēé ō.

²⁷ Ī-gōn̄g yá̰á̰ kə́ majaĺ ba ī-rāā yá̰á̰ kə́ majə, anī ā ə́nge loo yā ndiń ngándáńg.

²⁸ Tɔdɔ̄ Kɔ́ɔ̄ɓē gḛy yá̰á̰ kə́ súmūú, ni əya̰ deē yān gə̄ kɔ̄ɔ́ alé, a ngɔ̄m̄də́ ngándáńg. Banī a tɔ̄ɔ̄n̄ kōō de kə́ gír kaa yā nge kem ndul gə̄ tə́ kɔ̄ɔ́.

²⁹ De kə́ súmūú gə̄ a əngen̄ dɔ nang ń Nə́ɓā ənī míndən yā kadə̄də́ ní, nin̄ a ndin̄ tū tə́ ngándáńg.

³⁰ Ta de kə́ súmūú əda yá̰á̰ kə́ ngáā ō, ta ndo̰n əda yá̰á̰ kə́ gōtə́ ō.

³¹ Ndū najə̄ yā Nə́ɓā yān i kemən tə́, adə̄ njan a ngan̄g.

³² Ngé kem ndul gə̄ umə̄n̄ de kə́ súmūú ō, sāān̄ tɔ̄lən ō.

³³ Banī Kɔ́ɔ̄ɓē əya̰n adə̄ əsō kem jīdə́ tə́ alé. Ré rāān̄ sarya seneé anī ni əya̰ adə̄ sarya əhɔn alé.

³⁴ Ré ī-tə́gā taí ba ī-ngóō Kɔ́ɔ̄ɓē ō, un gō róbə́ yān ō anī, ni a ɔsiī kə̄ dɔɔ́ kadə̄ ḭ̄ i kɔ́ɔ̄ dɔ nang ń ni-ənī míndən yā kadī ní ō, ā á̰á̰ ngé kem ndul gə̄ ń ɔrə̄n̄də́ kɔ̄ɔ́ ní ō.

³⁵ M-á̰a̰ nge kem ndul loo kəndā tɔ́gən dɔ de gə̄ tə́ ō, loo jā̰ā̰ bɔ̄gə̄n tə́ tītə̄ kāgə̄ kə́ sitə majə tə́ ō.

³⁶ Banī ni gətóo gír yān gān̄g kɔ̄ɔ́. m̄-sāā njan banī loo kəngen dum̄.

³⁷ Ə̄ndā ma̰ȳ de kə́ sew, á̰a̰ de kə́ súmūú. Tɔdɔ̄ de kə́ najə̄n gətóo a əndā kōōn.

³⁸ Banī tɔ̄lə̄n̄ ngé mbātə́ najə̄ gə̄ malang gidə kógə̄ḿ ō, tɔ̄ɔ̄n̄ kōō ngé kem ndul gə̄ kɔ̄ɔ́ ō.

³⁹ I Kɔ́ɔ̄ɓē n i nge kajə de kə́ súmūú gə̄ ní, ni i loo ndidə́ kə́ ngan̄g ngá̰ý ndɔ̄ ń a ngangə̄ń sedə́ tə́ ní.

⁴⁰ Kɔ́ɔ̄ɓē rāā sedə́ ō, gān̄g dɔdə́ ō. Ni-gān̄g dɔdə́ jī ngé kem ndul gə̄ tə́ ō, ajədə́ ō, tɔdɔ̄ nin̄ rāānən̄ i loo ɓɔ̄ɔ̄ rɔ̄ yādə́ tə́.