PĀ GƏ̄ 36 - Bibəl ta Sar̄

Kɔ́ɔ̄ɓē, ta kəɓa man̄ ndi kə kumuú i ɓēé looí

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid kə́ nge kəla yā Kɔ́ɔ̄ɓē.

² Əga kemḿ dɔ gír̄ ń nge kem ndul mbātə́nń ndɔ̄ȳ Kɔ́ɔ̄ɓē ní tə́, Tām̄ yān tə́ ní ɓōĺ Nə́ɓā i yá̰á̰ kə́ kanjə̄ kumən.

³ Ni gír̄ kadə̄ ni i de kə́ majə, adə̄ ger̄ majaĺ yān aĺ ō, mbātə́ majaĺ yān aĺ ō.

⁴ Najə̄ kə́ tan tə́ i sor̄ ō gól̄ loo ō ngóy. Tām̄ yān tə́ ɓáa rāā yá̰á̰ kə́ majə i yá̰á̰ kə́ kumən gətóo.

⁵ Dan ń to ndɔ̄ɔ́ anī, a núm̄ i yá̰á̰ kə́ majaĺ kə́ yā teē rāā. Ni un gō róbə́ kə́ majaĺ kə̄ non tə́, mbātə́ yá̰á̰ kə́ majaĺ aĺ bátə́.

⁶ Kɔ́ɔ̄ɓē, kem majə yāí asə naā kə dɔ rā̰á̰ ō, ra dɔ ndūí tə́ yāí aw̄ bátə́ ənge kil̄ man̄ gə̄ dɔɔ́ ō.

⁷ Háĺ kə́ gōtə́ yāí asən̄ naā kə mbal̄ gə̄ kə́ ngālə̄n̄ ngá̰ý. Yá̰a̰ gə̄ ń ə́dá ní kumdə́ rúú ngá̰ý tītə̄ gír bā bo beé. Kɔ́ɔ̄ɓē, ḭ̄ ájə de gə̄ ō, dā̰ gə̄ ō.

⁸ Nə́ɓā, kem majə yāí i yá̰á̰ kə́ majə ngá̰ý! De gə̄ sāān̄ loo ɓɔ̄ɔ̄ rɔ̄ yādə́ i gír bɔ̄gīí tə́.

⁹ Nin̄ əsan̄ yá̰á̰ kə́ nel̄ gə̄ kə́ kem kújə yāí tə́ adə̄ ndān̄də́ ō, ādə̄də́ yá̰á̰ kə́ nel̄ yāí gə̄ kə́ ngá̰ý tītə̄ man̄ bā beé ní adə̄ a̰ȳn̄ ō.

¹⁰ Ta kəɓa man̄ ndi kə kumuú i ɓēé looí. Jə-ndi kə kumjí i kə ta kūl̄ loo kə́ unjə̄ kow yāí.

¹¹ Ngé gə̄ ń ger̄nī ní ī-rāā kem majə sedə́ kə̄ noí tə́ ō, ngé gə̄ ń kemdə́ i súmūú ní, i rāā hálí kə́ gōtə́ sedə́ kum kə̄ kété ō.

¹² Ādə̄ de kə́ nge gán̄g rɔ̄n əndā njan looḿ alé! Ādə̄ jī ngé kem ndul gə̄ tə̄ɓām̄ kə̄ gogə́ alé!

¹³ I ɓēé looí laā n ngé rāā majaĺ gə̄ téē tə́sōn̄ ō, mbə́rē tə́nīn̄də́ ō, asən̄ kɔsə nang kḭḭ ra dɔɔ́ aĺ ō ní.