PĀ GƏ̄ 34 - Bibəl ta Sar̄

Kɔ́ɔ̄ɓē ɔrə̄m̄ kem sōl̄ yāḿ gə̄ tə́

¹ Pā yā Dabid. Ni-rāā kɔ̄r̄ ta kum Abimelek tə́. Dan ń Abimelek tə̄ɓān kɔ̄ɔ́ anī ni-ɔr̄ najə̄ gə̄ ń toō:

² M-ā m̄-ndadə̄ Kɔ́ɔ̄ɓē kə dɔ ndɔ̄ gə̄ malang. M-ā m-ə̄nī taḿ nang tə́ loo tɔ̄ȳn tə́ alé.

³ M-ə́ndá gúúḿ najə̄ yā Kɔ́ɔ̄ɓē tə́. Ādə̄ ngé tél kə rɔ̄də́ kə̄ nang tə́ gə̄ rāān̄ rɔ̄nel̄ loo koō najə̄ kɔrə̄ḿ tə́.

⁴ Ī-ɓoī rɔ̄sí tū yāḿ tə́ ādə̄ j-ɔ́siīneé gɔn Kɔ́ɔ̄ɓē. Jə-ɓoī tají naā tə́ malang jə-tɔ̄yīneé rīn.

⁵ M-ə́dá Kɔ́ɔ̄ɓē najə̄ anī ni tūrə̄m̄ tə́. Ni ɔrə̄m̄ kem yá̰á̰ kə́ to ka̰ȳ ndíl gə̄ tə́ kɔ̄ɔ́ malang.

⁶ Ngé gə̄ ń a̰a̰n̄ loo kum kə̄ rɔ̄n tə́ ní ta kumdə́ i kə kəgōó jarya ō, dɔ kumdə́ a síndə̄rī to̰ aĺ ō.

⁷ Nge rɔ̄ tō ndoō kógə̄ḿ ɓār̄ yá̰a̰ anī Kɔ́ɔ̄ɓē oō ō, ɔrə̄n kɔ̄ɔ́ dan wur kɔl yān gə̄ tə́ malang ō.

⁸ Nge kaw̄ kəla yā Kɔ́ɔ̄ɓē a ngɔ̄m̄ dɔ ngé ɓōĺ ndíĺ Kɔ́ɔ̄ɓē gə̄ ō, a ɔr̄də́ kɔ̄ɔ́ kum yá̰á̰ kə́ majaĺ gə̄ tə́ ō.

⁹ Kɔ́ɔ̄ɓē i de kə́ majə ngá̰ý, ī-nāāī majən á̰a̰ī. Rɔ̄nel̄ i kə́ deē ń ni i loo ɓɔ̄ɔ̄ rɔ̄ yān ní.

¹⁰ Sḭḭ̄ ń Kɔ́ɔ̄ɓē ɔr̄ kam̄sí tayā tām̄ yān tə́ ní, ī-ɓōlíī ndílən! Tɔdɔ̄ ngé gə̄ ń ɓōlə́n̄ ndílən ní a nalə̄n̄ yá̰á̰ kógə̄ḿ alé.

¹¹ Ndoō ō ɓō ō a rāā ngé kənge yá̰a̰ gə̄, banī ngé sāā Kɔ́ɔ̄ɓē gə̄ nalə̄n̄ yá̰á̰ kógə̄ḿ alé.

¹² Ngánə́ḿ gə̄, ī-reē ōōī najə̄ kɔrə̄ḿ! M-ā m-ɔ́jə́sí loo ɓōĺ ndíĺ Kɔ́ɔ̄ɓē.

¹³ Deē ń gḛy ndi kə kumneé ō gḛy ndi kə rɔ̄nelēé ō ɓáa,

¹⁴ ādə̄ kɔ́ɔ̄ mbātə́ kɔr̄ najə̄ kə́ majaĺ ō, tétə̄ najə̄ aĺ ō.

¹⁵ Ādə̄ kɔ́ɔ̄ ɔr̄ rɔ̄n kɔ̄ɔ́ kadə yá̰á̰ kə́ majaĺ tə́ ō, rāā yá̰á̰ kə́ majə ō, sāā róbə kem sɔl̄ lɔm ō, a̰ȳ ngɔ̄də̄ gō tə́ ō.

¹⁶ Kum Kɔ́ɔ̄ɓē i kə̄ dɔ de kə́ gōtə́ gə̄ tə́ ō, nēl̄ mbīn yā koōń nōō yādə́ ō.

¹⁷ Kɔ́ɔ̄ɓē ənī ngé rāā majaĺ gə̄ rɔ̄, i yā kadə̄ əga kem deē dɔdə́ tə́ dɔ nang tə́ to̰ alé.

¹⁸ De kə́ sew gə̄ əgan̄ kɔŕ anī Kɔ́ɔ̄ɓē oō ō, ɔr̄də́ kɔ̄ɔ́ kem wur kɔl yādə́ gə̄ tə́ malang ō.

¹⁹ Kɔ́ɔ̄ɓē i ngɔr rɔ̄ de gə̄ ń kemdə́ nujə sák sák kɔ̄ɔ́ tə́ ní ō, ni ajə ngé gə̄ ń ndíĺdə́ sṵý kɔ̄ɔ́ ní ō.

²⁰ Yá̰á̰ kə́ to kum kaȳ aĺ gə̄ rāān̄ de kə́ súmūú ngá̰ý, ba Kɔ́ɔ̄ɓē ɔrə̄n kɔ̄ɔ́ kum tə́ malang.

²¹ Ni ngɔ̄m̄ kə̄ngān gə̄ malang. Kógə̄ḿ kə́ tetə gətóo.

²² Kəla rāā nge kem ndul a tɔ̄lən nəkɔ́ ō, madə̄ ba̰ā̰ de kə́ súmūú gə̄ a əngen̄ ndéy ō.

²³ Kɔ́ɔ̄ɓē gān̄g dɔ ngé kəla yān gə̄, ngé gə̄ ń rāānən̄ i loo ɓɔ̄ɔ̄ rɔ̄ yādə́ tə́ ní, deē kógə̄ḿ dandə́ tə́ kə́ a ənge ndéy gətóo.