PĀ GƏ̄ 33 - Bibəl ta Sar̄

Ādə̄ de gə̄ ɓōkə́n̄ Nə́ɓā tɔ̄ȳ

¹ Sḭḭ̄ de kə́ gōtə́ gə̄ ə́gaī kɔŕ rɔ̄nel̄ dɔ Kɔ́ɔ̄ɓē tə́! Ɓōkə́n tɔ̄ȳ əhɔ i de kə́ súmūú gə̄.

² Úgiī kənde ī-ɓōkíīneé Kɔ́ɔ̄ɓē tɔ̄ȳ. Úgiī kənde kə́ kəlān i kutə ādə̄niī!

³ Ə̄nīī pā kə́ kijə ādə̄niī. Loo ń ā ə́gaī kɔŕ rɔ̄nel̄ anī úgiī kənde ādī majə.

⁴ Tām̄ najə̄ yā Kɔ́ɔ̄ɓē i najə̄ kə́ súmūú ō, kəla rāān malang i kəla kə́ rɔ̄kum ō.

⁵ Ni gḛy i yá̰á̰ kə́ rāā kə́ gōtə́, ō yá̰á̰ kə́ súmūú ō. Kem majə yā Kɔ́ɔ̄ɓē taā loo dɔ nang tə́ malang.

⁶ Kɔ́ɔ̄ɓē rāā dɔ rā̰ i kə najə̄ kə́ tan tə́ ō, rāā tə́yō̰ gə̄ malang i kə koō kə́ tan tə́ ō.

⁷ Ni kán̄ man̄ bā bo loo kógə̄ḿ gidə babəra kógə̄ḿ tə́. Ni kán̄ man̄ bā bo kem kārə̄n tə́.

⁸ Ādə̄ dɔ nang kə taá malang ɓōĺ ndíĺ Kɔ́ɔ̄ɓē. Ādə̄ de kə́ dɔ nang tə́ gə̄ malang ɓōĺnən̄.

⁹ Ni-ɔr̄ najə̄ anī yá̰á̰ ń ni-əda ní rāā yá̰a̰, Ni-əda najə̄ anī, yá̰á̰ ń əda najə̄n ní teē ndi.

¹⁰ Kɔ́ɔ̄ɓē bā ta róbə yá̰á̰ ń nápar de gə̄ sāān̄ rāā ní. Ni nujə yá̰á̰ ń gír de gə̄ nómə̄n̄ rāā ní.

¹¹ Banī yá̰á̰ ń Kɔ́ɔ̄ɓē gír̄ rāā ní a to ngándáńg. Yá̰á̰ ń ni gír̄ kemən tə́ yā rāā ní a to i kə dɔ ɓāl̄ gə̄, kə dɔ ɓāl̄ gə̄.

¹² Rɔ̄nel̄ i kə nápar de gə̄ ń Kɔ́ɔ̄ɓē i Nə́ɓā yādə́ ní. Rɔ̄nel̄ i kə gír de gə̄ ń Kɔ́ɔ̄ɓē gə̄rādə́ kadə̄ nin̄ i yá̰a̰ kəngen gə̄ ní.

¹³ Kɔ́ɔ̄ɓē ndi dɔ rā̰ tə́ dɔɔ́ a̰a̰ń loo, ni-a̰a̰ de gə̄ malang.

^14-15 Ni ń əɓā kem de kə́ dɔ nang tə́ gə̄ malang adə̄ to tītə̄ naā ō, əndā kumən gír yá̰a̰ rāādə́ gə̄ tə́ malang ō ní, ndi dɔ kōr̄ kāgə̄ yān tə́ əndāń ma̰ȳdə́.

¹⁶ I kutə ngé rɔ̄ɔ̄ kə́ ngá̰ý gə̄ n a ajə mban̄g ní a? I tɔ́gə kə́ ngá̰ý n a ajə go̰ rɔ̄ ní a?

¹⁷ Sə́nda i yá̰á̰ gól̄ rɔ̄ karī, deē a tetəń rɔ̄ɔ̄ alé, tɔ́gən kə́ ngá̰ý a teē kə deé ta yo tə́ alé.

¹⁸ Banī Kɔ́ɔ̄ɓē əndā kumən̄ gō ngé gə̄ ń ɓōlə́n̄ ndílən ō, əndān̄ kemdə́ dɔ kem majə yān tə́ ō ní.

¹⁹ Adə̄ a ɔr̄də́ kɔ̄ɔ́ ta yo tə́ ō, a ajədə́ ɓāl̄ ɓō tə́ ō.

²⁰ Jḭḭ̄ j-əndāī kemjí i dɔ Kɔ́ɔ̄ɓē tə́, i ni n i der yājí ō, nge dḭḭ̄jí ō ní.

²¹ Rɔ̄nel̄ kə́ kemjí tə́ ḭḭ i rɔ̄n ni tə́ ō, jḭḭ̄ j-əndāī kemjí i dɔ rīn kə́ táĺ ngá̰ý tə́ ō.

²² Kɔ́ɔ̄ɓē, j-əndā kemjí dɔí tə́ kə ngangá ngá̰ý ní ī-rāā kem majə sejí!