PĀ GƏ̄ 32 - Bibəl ta Sar̄

Rɔ̄nel̄ i kə deē ń Nə́ɓā mā̰ȳ rɔ̄n dɔn tə́ ní

1 Pā yā Dabid kə́ yā ndóoń deē yá̰a̰.

¹ Pā yā Dabid kə́ yā ndóoń deē yá̰a̰. Rɔ̄nel̄ i kə deē ń Nə́ɓā un yá̰á̰ kə́ gōtə́ aĺ yān dɔn tə́ kɔ̄ɔ́ ō, mā̰ȳ rɔ̄n dɔ yá̰á̰ kə́ majaĺ ń ni-rāā tə́ ō ní.

² Rɔ̄nel̄ i kə deē ń Kɔ́ɔ̄ɓē əhɔ gír yá̰á̰ kə́ gōtə́ aĺ yān aĺ ō, deē ń gól̄ loo aĺ ō ní!

³ Dan ń m̄-mundə̄ dɔ majaĺ yāḿ ní kem kə̄ngāḿ sɔl̄ yélélé ō, m-ā m̄-tó̰ō̰ i mbée kə dɔ ndɔ̄ gə̄ ō.

⁴ Tɔdɔ̄ kadaá gē, ndɔ̄ɔ́ gē ní, Kɔ́ɔ̄ɓē, ndéy jīí ɓār̄ dɔḿ tə́ rututu. Adə̄ tɔ́gə́ḿ gətóo tītə̄ yā kōō kə́ man̄ əhɔ laa dɔ tə́ beé.

⁵ Yá̰á̰ kə́ majaĺ ń m̄-rāā ní m-ə́daī wáńg. Yá̰á̰ kə́ gōtə́ aĺ ń m̄-rāā ní m̄-mundī alé. M-ə́da na: M-ā m-ɔ́jə́ Kɔ́ɔ̄ɓē yá̰á̰ kə́ majaĺ gə̄ ń m̄-rāā ní. Anī ḭ̄ ún majaĺ yāḿ ń oym̄ ní dɔḿ tə́ kɔ̄ɔ́.

⁶ I tām̄ najə̄ ń noō tə́ n deē yāí gə̄ malang ndɔ̄ȳnī ndɔ̄ ń tasí a̰a̰ń naā tə́ ní. Ká ré man̄ kə́ bo ngá̰ý taā loo gə̄gē anī, a ɔdə rɔ̄də́ alé.

⁷ Ḭ̄ i loo ɓɔ̄ɔ̄ rɔ̄ yāḿ, ādə̄ yá̰á̰ kə́ to wur kɔl əngem̄ alé. Ḭ̄ ī-gān̄g dɔḿ adə̄ m-ə̄nī pā rɔ̄nel̄ m-ɔ́səń gɔnií.

⁸ Kɔ́ɔ̄ɓē əda na: M-ā m̄-ndóōī yá̰a̰ ō, m-ā m-ɔ́jiī róbə́ ń kadə̄ úń ní ō. M-ā m-ādī kɔjə̄ kógə̄ḿ. M-ā m-ə̄ndā kumḿ gírí tə́.

⁹ Ī-lōō ndájə̄ sə́nda, aláa kərō rapáy ń mbóon̄ páráńg á, a əhɔn̄də́ gətóo i kə jámáá ō kə kəlāá ō ní. Loo ń noō tə́ yá̰a̰ a rāāī alé.

¹⁰ Yá̰á̰ kə́ tōr̄ ngá̰ý gə̄ a rāān̄ deē ń ɓōĺ ndíĺ Nə́ɓā aĺ ní. Ba Kɔ́ɔ̄ɓē a rāā kem majə kə deē ń əndā kemən dɔn tə́ ní ngándáńg.

¹¹ Sḭḭ̄ de kə́ gōtə́ gə̄ ḭ́ḭī bal walya najə̄ yā Kɔ́ɔ̄ɓē tə́ ō, ī-rāāī rɔ̄nel̄ ō. Sḭḭ̄ malang ń kemsí i súmūú ní, ə́gaī kɔŕ rɔ̄nel̄!