PĀ GƏ̄ 31 - Bibəl ta Sar̄

Kɔ́ɔ̄ɓē, ḭ̄ i loo ɓɔ̄ɔ̄ rɔ̄ yāḿ

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid.

² Kɔ́ɔ̄ɓē, m̄-rāāī i loo ɓɔ̄ɔ̄ rɔ̄ yāḿ tə́, ī-lōō kəla rɔ̄sɔl̄ dɔḿ tə́! Ī-gān̄g dɔḿ kə yá̰a̰ rāāí kə́ gōtə́ gə̄.

³ Ī-nēl̄ mbīí kə̄ kōōḿ tə́, ī-reē láẃ ī-gān̄g dɔḿ. Ādə̄ ḭ̄ i mbal̄ yāḿ kə́ ngan̄g ngá̰ý ō, loo ndiḿ kə́ ngan̄g ń a ajəm̄ ní ō.

⁴ Mbal̄ yāḿ ō loo ndiḿ kə́ ngan̄g ngá̰ý ō i ḭ̄. Ɔ́jəm̄ róbə ō ɔ́r noḿ ō ādə̄ de gə̄ tɔ̄ȳn̄neé rīí.

⁵ Ī-rāā ādə̄ m̄-teē kɔ̄ɔ́ kum gūmbə̄ ń əyān̄ yā kəhɔm̄neé tə́ ní. Tɔdɔ̄ loo ɓɔ̄ɔ̄ rɔ̄ kə́ ngan̄g yāḿ i ḭ̄.

⁶ Kɔ́ɔ̄ɓē, Nə́ɓā kə́ rɔ̄kum, ḭ̄ ń ī-gān̄g dɔḿ ní, m-ə́yá̰ ndílə́ḿ kem jīí tə́.

⁷ M-īm̄ ngé gə̄ ń ndɔ̄ȳn̄ yá̰á̰ kə́ kem wōȳ karī gə̄ ní. Kɔ́ɔ̄ɓē, mā m-ə̄ndā kemḿ i dɔí ḭ̄ tə́

⁸ M-ā m̄-ndām̄ kə rɔ̄nelēé tām̄ yá̰a̰ rāāí kem majə yāí tə́, tɔdɔ̄ ḭ̄ á̰a̰ rɔ̄ tō ndoō yāḿ ō, ī-ger̄ wur kɔl yāḿ ō.

⁹ Ḭ̄ ə́ya̰m̄ ādə̄ m-ə̄sō kem jī madə̄ ba̰ā̰ḿ kógə̄ḿ tə́ alé. Ḭ̄ úń údəm̄ dɔɔ́ gogə́ ō, ī-taā ə́ya̰m̄ dɔɔ́ ō.

¹⁰ Kɔ́ɔ̄ɓē á̰a̰ kum tō ndoō yāḿ, tɔdɔ̄ mā i dan wur kɔl tə́. Gír̄ najə̄ nujə kumḿ ō míndə́ḿ ō kemḿ ō.

¹¹ Rɔ̄ḿ nelə̄m̄ aĺ bátə́ kadə̄ ndɔ̄ḿ təgāń. m̄-ra i dan to̰ō̰ tə́ bátə́ kadə̄ ɓālə̄ḿ təgāń. Yá̰á̰ kə́ majaĺ ń m̄-rāā ní rāā adə̄ tɔ́gə́ḿ gətóo kɔ̄ɔ́ ō, əsa kə̄ngāḿ ō.

¹² Madə̄ ba̰ā̰ḿ gə̄ tájə̄mə̄n̄ ō, madə̄ ɓēḿ gə̄ tájə̄mə̄n̄ adə̄ mān̄ dɔ ɓáý to̰ ō. Ngé gə̄ ń j-ənī kemjí báŕ báŕ j-adə̄ naā ní ɓōĺmə̄n̄ kɔ̄ɔ́. Ré əngemə̄n̄ róbó anī a̰ȳn̄ naā kɔ̄ɔ́.

¹³ Dɔdə́ ndígə̄nal dɔḿ tə́, tītə̄ de kə́ koy ń deē gír̄ dɔn tə́ to̰ aĺ ní. m̄-to i tītə̄ gájə́ jóó kə́ deē rāań kəla to̰ alé.

¹⁴ Najə̄ ń de kə́ ngá̰ý gə̄ tə́dan̄ dɔḿ tə́ ní m-ōō kə mbīḿ. Nin̄ ədan̄ na m-ə́la ɓōĺ kem de gə̄ ń ndi gīrə̄n̄ gidəḿ tə́ ní. Nin̄ sə̄lān̄ naā dɔḿ tə́, oōn̄ naā loo mundə̄ tə́ yā tɔ̄lə̄m̄.

¹⁵ Banī Kɔ́ɔ̄ɓē, mā m-ə̄ndā kemḿ i dɔí ḭ̄ tə́. M-ə́da na: Nə́ɓā yāḿ i ḭ̄.

¹⁶ Ndɔ̄ḿ gə̄ malang i kem jīí tə́. Ī-taām̄ jī madə̄ ba̰ā̰ḿ gə̄ ń a rɔ̄ɔ̄mə̄n̄ kə ngangá ngá̰ý ní tə́.

¹⁷ Á̰a̰m̄ mā nge kəla yāí kə kumií kə́ majaá, ájəm̄ tām̄ kem majə yāí tə́.

¹⁸ Kɔ́ɔ̄ɓē, m̄-ɓāríī kadə̄ ī-dḭḭ̄m̄ ní, ī-lōō rāā kadə̄ m̄-tél m̄-ndə̄ngā rɔ̄ḿ. Banī ādə̄ rɔ̄ ngé taā kem Nə́ɓā aĺ gə̄ sɔl̄də́ ō, ādə̄ yo utə̄ tadə́ ɔgə̄də́ kɔr̄ najə̄ ō!

¹⁹ Ngé sor̄ gə̄ ń a tájə̄n̄ de kə́ súmūú ō, a gángə̄n̄ rɔ̄də́ dɔn tə́ ō, a kídə̄nən̄ ō ní, ī-rāā ādə̄ tadə́ do̰ō̰ naā kɔ̄ɔ́!

²⁰ Banī Kɔ́ɔ̄ɓē, kem majə ń ī-ngɔ̄m̄ tām̄ yā ngé ɓōĺ ndílí gə̄ tə́ ní, i kem majə kə́ to ɓōĺ ngá̰ý! Ngé gə̄ malang ń ḭ̄ i loo ɓɔ̄ɔ̄ rɔ̄ yādə́ ní, ɔ́jə kem majə ní kə̄ ndágá tām̄ yādə́ tə́ i ta kum de gə̄ tə́ malang.

²¹ Ī-ɓɔ̄də́ i loo ń īkɔ́ ā ī-ɓɔ̄ɔ̄ rɔ̄í tū tə́ ní tə́, adə̄ yá̰á̰ kə́ majaĺ kə́ de gə̄ rāān̄ loo mundə̄ tə́ asə kɔdə rɔ̄də́ alé. Ī-ɓɔ̄də́ i kem kújə yāí tə́, adə̄ najə̄ kə́ majaĺ kə́ ta de gə̄ tə́ asə rāā yá̰a̰ sedə́ alé.

²² Kɔ́ɔ̄ɓē, m̄-tɔ̄yī tɔdɔ̄ m̄-to tītə̄ ɓē kə́ ngé rɔ̄ɔ̄ gə̄ gīrə̄n̄ yā taā, ba ḭ̄ ī-ra dɔ ndūí tə́ seḿ adə̄ ɔr kumḿ ngá̰ý.

²³ Kété ní hángaləḿ ndi majə alé, adə̄ m-ə́da na: Ɔr̄mə̄n̄ kə̄ gogə́ kɔ̄ɔ́ adə̄ ā á̰a̰m̄ to̰ alé. Ba m-ə́ga kɔŕ kə̄ dɔí tə́ anī, ḭ̄ ōō ndūḿ kə́ m̄-rāāīneé ɓɔ́ adə̄ ī-dḭḭ̄m̄.

²⁴ Sḭḭ̄ de gə̄ malang yā Kɔ́ɔ̄ɓē, ī-táriī Kɔ́ɔ̄ɓē. Tɔdɔ̄ Kɔ́ɔ̄ɓē ɔgə̄ kadə̄ yá̰a̰ rāā ngé taā kemən gə̄. Banī əgā ngé kɔjə rɔ̄də́ gə̄ kə̄rā kə́ nja ngáā tə́.

²⁵ Sḭḭ̄ malang ń ə̄ndāī kemsí dɔ Kɔ́ɔ̄ɓē tə́ ní, ə́hɔī rɔ̄sí tɔgə ō, ə́hɔī kemsí ngan̄g ō.