PĀ GƏ̄ 30 - Bibəl ta Sar̄

Kɔ́ɔ̄ɓē ajəm̄

¹ Pā rāā nāā kújə yā Kɔ́ɔ̄ɓē. I pā yā Dabid.

² Kɔ́ɔ̄ɓē, m-ɔ́sə gɔnií, tɔdɔ̄ ɔ̄rə̄m̄ bəlo kə́ lú ngá̰ý tə́ kɔ̄ɔ́. Ḭ̄ ə́ya̰ madə̄ ba̰ā̰ḿ gə̄ adə̄ əgōn̄ naā dɔḿ tə́ alé.

³ Kɔ́ɔ̄ɓē Nə́ɓā yāḿ, m̄-nōō kə̄ dɔí tə́, anī ḭ̄ ī-rāā adə̄ rɔ̄ḿ ngan̄g.

⁴ Kɔ́ɔ̄ɓē, ḭ̄ ī-teē seḿ ɓádá kɔ̄ɔ́. Mā i de kə́ gír yāḿ gān̄g kɔ̄ɔ́, banī rāā adə̄ m̄-ndi kə kumḿ gogə́.

⁵ Sḭḭ̄ deē yā Kɔ́ɔ̄ɓē gə̄ ə̄nīī pā ādīin̄, ī-ɓōkíin̄neé tɔ̄ȳ ə́daī na, ni i de kə́ táĺ.

⁶ Kɔ́ɔ̄ɓē a rāā wōn̄g kə deé i kum mbang kógə̄ḿ beē ngóy, banī a rāā kem majə seneé i kə dɔ ndɔ̄ gə̄ malang ń kɔ́ɔ̄ ndiń kə kumneé ní. Loo tíbí anī nōō ɓār̄ dan i ngá̰ý, ba dəloí i kɔŕ rɔ̄nel̄.

⁷ Ba mā tā a dan ń m̄-ndi majə ní m-ə́da na: Yá̰a̰ a yéȳm̄ yek alé.

⁸ Kɔ́ɔ̄ɓē, m̄-ndi loo kə́ ngan̄g tə́ i kə ta kūl̄ kem majə yāí. Banī ḭ̄ ī-tūr̄ gidií kɔ̄ɔ́ taḿ tə́, adə̄ ɓōĺ rāām̄.

⁹ Kɔ́ɔ̄ɓē, m̄-nōō kə̄ dɔí tə́, m̄-rāā Kɔ́ɔ̄ɓē ɓɔ́.

¹⁰ Mósə́ḿ a teē i rí tām̄ yāí tə́? Ā ə́nge i rí gotə yoḿ mā tə́? Deē ń tél bumbə́ru kɔ̄ɔ́ ní a ɓōkíī tɔ̄ȳ ɓáý a? A ənī gotə ra kə́ ī-ra dɔ ndūí tə́ i ba̰ý?

¹¹ Kɔ́ɔ̄ɓē, ōō ndūḿ, á̰a̰ kum tō ndoō yāḿ! Kɔ́ɔ̄ɓē, ī-rāā seḿ!

¹² Ḭ̄ ī-rāā ādə̄ kəhɔ ndoō yāḿ tél ndām̄ rɔ̄nel̄. Ḭ̄ ɔ̄r̄ kūbə̄ ndoō rɔ̄ḿ tə́ kɔ̄ɔ́ ba ə́la kūbə̄ rāā nāā gətóo.

¹³ Adə̄ m-ɔ́sə gɔnií kə pāá kanjə̄ kɔr ta tə́. Kɔ́ɔ̄ɓē Nə́ɓā yāḿ, m-ā m̄-ndadī ngándáńg!