PĀ GƏ̄ 27 - Bibəl ta Sar̄

m̄-ndi ɓē Kɔ́ɔ̄ɓēé anī m̄-sōl̄ yá̰a̰ alé

1 Pā yā Dabid.

¹ Pā yā Dabid. Kɔ́ɔ̄ɓē i loo kə́ unjə̄ kow yāḿ ō i nge kajəḿ ō, ní m-ā m̄-ɓōĺ i náā? Kɔ́ɔ̄ɓē i loo ndiḿ kə́ ngan̄g ngá̰ý, ní m-ā m̄-ndebə i ta kum náā tə́?

² Ré ngé ndāńg gə̄ ənīmə̄n̄ rɔ̄ɔ̄ yā rə́yām̄ naā tə́ anī, i nin̄ kɔ́ gə̄ madə̄ kɔ̄lə̄ḿ gə̄ ō, madə̄ ba̰ā̰ḿ gə̄ ō n njadə́ a tə́gā naā ō, a téē tə́sōn̄ ō ní.

³ Ré ɓūtə̄ ngé rɔ̄ɔ̄ gə̄ reē əhɔn̄ loo kadəḿ tə́ yā kənīm̄ rɔ̄ɔ̄ anī kemḿ gān̄g man̄ alé. Ká ré rɔ̄ udə naā tə́ pít gə̄gē anī, mā m-ə̄nī kemḿ.

⁴ m̄-dəje Kɔ́ɔ̄ɓē yá̰á̰ kógə̄ḿ ō, m̄-gḛy kənge gáŕ ō. I kadə̄ m̄-ndi kem kújə yā Kɔ́ɔ̄ɓē tə́ kə dɔ ndɔ̄ gə̄ malang ń m̄-ndiń kə kumḿ ní, yā kadə̄ m-á̰a̰ń majə Kɔ́ɔ̄ɓē ō, m-ə̄ndań kumḿ gíŕ kújə yān tə́ ō.

⁵ Tām̄ ndɔ̄ ń yá̰á̰ kə́ to kum kaȳ aĺ teē dɔḿ tə́ ní, ni ɓɔ̄ɔ̄m̄ looneé. Ni ɓɔ̄ɔ̄m̄ gə́lé kújə yān tə́ ō, əndām̄ dɔɔ́ dɔ mbal̄ tə́ ō.

⁶ Ń toō ní dɔḿ un dɔ madə̄ ba̰ā̰ḿ gə̄ ń gīrə̄n̄ gidəḿ ní, dɔḿ un dɔdə́ malang. M-ā m̄-tun̄ yá̰a̰ yā kadə̄ Kɔ́ɔ̄ɓē kem kújə yān tə́ kə kɔŕ rɔ̄nelēé ō, m-ā m-ə̄nī pā yā kɔsəń gɔn Kɔ́ɔ̄ɓē ō.

⁷ Kɔ́ɔ̄ɓē, ōō ɓār̄ yāḿ! Ɓɔ́, ī-ndigəm̄ tə́!

⁸ Kɔ́ɔ̄ɓē ḭ̄ ə́da na kə jə-tūr̄ kum̄jí kə̄ rɔ̄í tə́! M-ə̄ndā kemḿ dɔ najə̄ ń noō tə́, adə̄ Kɔ́ɔ̄ɓē, m̄-tūr̄ kumḿ kə̄ rɔ̄í tə́.

⁹ Nə́ɓā kə́ nge kajəḿ, ī-lōō tūr̄ gidií taḿ tə́! Ī-lōō kɔrə̄m̄ mā nge kəla yāí kə̄ gogə́ kə wōngōó! ḭ̄ ń ī-dḭḭ̄m̄ ní, ī-mbātə́m̄ alé, ə́ya̰m̄ kɔ̄ɔ́ alé!

¹⁰ Bɔbə́ḿ ō kó̰ó̰ḿ ō əya̰mə̄n̄ kɔ̄ɔ́ ba Kɔ́ɔ̄ɓē əhɔm̄ kə̄ rɔ̄n tə́.

¹¹ Kɔ́ɔ̄ɓē, ɔ́jəm̄ róbə yāí ō, ī-ndɔ́rə̄m̄ kə̄ dɔ róbə́ kə́ majə tə́ ō, najə̄ yā madə̄ ba̰ā̰ḿ gə̄ tə́.

¹² Ādə̄ m-ə̄sō jīdə́ tə́ alé, tɔdɔ̄ de kə́ kum tə́ aĺ gə̄ tétə̄n̄ najə̄ dɔḿ tə́ ō, sāān̄ rāā dɔ́nɔ dɔḿ tə́ ō.

¹³ m̄-ger̄ majə kadə̄ m-ā m-á̰a̰ kem majə yā Kɔ́ɔ̄ɓē dɔ nang tə́ laā.

¹⁴ Ī-ngóō ta Kɔ́ɔ̄ɓē. Ə́hɔ rɔ̄í tɔgə ō, ə́hɔ kemií ngan̄g ō! Ī-ngóō ta Kɔ́ɔ̄ɓē.