PĀ GƏ̄ 26 - Bibəl ta Sar̄

De kə́ najə̄ gətóo dɔn tə́ sāā kadə̄ Nə́ɓā rāā seneé

1 Pā yā Dabid.

¹ Pā yā Dabid. Kɔ́ɔ̄ɓē, ī-gān̄g sarya yāḿ, tɔdɔ̄ m̄-rāā yá̰a̰ i kə́ gōó ō, m-ə̄ndā kemḿ dɔí tə́ kanjə̄ kadə̄ kemḿ tɔ́sə̄m̄ ō.

² Kɔ́ɔ̄ɓē, ə̄ndā ma̰ȳḿ ō ī-nāām̄ ō, á̰á̰ gír̄ kə́ kemḿ tə́ ō.

³ Kem majə yāí to i kə̄ ndágá ta kumḿ tə́ ō, m̄-rāā yá̰á̰ kə́ rɔ̄kum yāí gə̄ ō.

⁴ M-ə́hɔ loo rɔ̄ ngé sor̄ gə̄ tə́ aĺ ō, m-ə̄ndā njaḿ ɓē yā ngé gól̄ loo gə̄ tə́ aĺ ō.

⁵ M-á̰a̰ ɓūtə̄ ngé rāā majaĺ gə̄ kə kum sə̄ɓāá ō, m-ə́hɔ loo rɔ̄ ngé kem ndul gə̄ tə́ aĺ ō.

⁶ Kɔ́ɔ̄ɓē, m̄-tə́go jīḿ m-ɔ́jəń kadə̄ najə̄ gətóo dɔḿ tə́, yā kadə̄ m̄-njə̄rań kə gō gidə loo tun̄ yá̰a̰ yāí

⁷ yā kədaīń na m̄-ger̄ majə kə́ ī-rāā seḿ ō, yā kɔjəń gotə yá̰á̰ kə́ to kɔr kum gə̄ malang ń ī-rāā ní ō.

⁸ Kɔ́ɔ̄ɓē, kújə́ ń ī-ndi kemeé ní nelə̄m̄ ō, loo ń kɔsə gɔn yāí i tū tə́ ní nelə̄m̄ ō.

⁹ Ī-lōō ɓoo jīḿ naā tə́ kə ngé rāā majaĺ gēé. Ī-lōō ɓoo jīḿ naā tə́ kə ngé tɔ̄l̄ de gēé.

¹⁰ Yá̰á̰ kə́ to yḛr kum tákə̄ jīdə́ ō, nar kə́ kəndā jī naā tə́ rosə jī ko̰də́ ō.

¹¹ m̄-rāā yá̰a̰ malang kə gōó majə. Ní ɓɔ́, ī-gān̄g dɔḿ!

¹² m̄-rā i dɔ loo kə́ ngan̄g majə tə́, adə̄ m-ā m̄-tɔ̄ȳ Kɔ́ɔ̄ɓē dan ngé kán̄ naā gə̄ tə́.