PĀ GƏ̄ 25 - Bibəl ta Sar̄

Ādə̄ m̄-ger̄ kem ndigə yāí ō ī-mā̰ȳ rɔ̄í dɔḿ tə́ ō

1 Pā yā Dabid.

¹ Pā yā Dabid. Kɔ́ɔ̄ɓē, m̄-tūr̄ rɔ̄ḿ kə̄ rɔ̄í tə́.

² Nə́ɓā yāḿ, m-ə̄ndā kemḿ dɔí tə́ ba ī-lōō kəla rɔ̄sɔl̄ dɔḿ tə́! Ādə̄ madə̄ ba̰ā̰ḿ gə̄ tetəmə̄n̄ rɔ̄ɔ̄ alé!

³ De gə̄ ń əndān̄ kemdə́ dɔí tə́ ní, deē kógə̄ḿ kə́ tél ndə̄ngā rɔ̄n gətóo. Banī ngé gə̄ ń télən̄ kɔ̄ɔ́ gōí tə́ ní rɔ̄də́ sɔl̄də́, tām̄ jīdə́ i karī!

⁴ Kɔ́ɔ̄ɓē, ī-rāā ādə̄ m̄-ger̄ gō róbə yāí gə̄. Ɔ́jəm̄ loo rāā kem ndigə yāí,

⁵ ādə̄ m̄-njə̄rā dɔ róbə́ ń a aw̄ kə̄ tū najə̄ kə́ rɔ̄kum yāí tə́ ní ō, Ɔ́jəm̄ yá̰a̰ ādə̄ m̄-ger̄ ō. Tɔdɔ̄ i ḭ̄ n i Nə́ɓā ń ajəm̄ ō, m-ə̄ndā kemḿ dɔí tə́ kə dɔ ndɔ̄ gə̄ malang ō ní.

⁶ Kɔ́ɔ̄ɓē, ādə̄ əga kemií na ḭ̄ i Nə́ɓā kə́ nge tár deē ō, nge kem majə ō, ngándáńg.

⁷ Yá̰á̰ kə́ majaĺ gə̄ ō, yá̰a̰ kə́ gōtə́ aĺ gə̄ ō ń m̄-rāā kə ngōn̄ dūúḿ ní, ī-lōō gír̄ dɔ tə́. Banī Kɔ́ɔ̄ɓē, ī-gír̄ dɔḿ tə́ tām̄ ḭ̄ i nge ra dɔ ndūí tə́, sɔɔ̄ń kem majə yāí.

⁸ Kɔ́ɔ̄ɓē i de kə́ majə ngá̰ý ō, ni i de kə́ súmūú ngá̰ý ō. Ādə̄ ɔjə ngé rāā yá̰a̰ majaĺ gə̄ róbə́ ń kadə̄ unən̄ ní.

⁹ Ngé gə̄ ń sɔlə̄n̄ dɔdə́ ní, ni-aw̄ sedə́ kə̄ tū yá̰á̰ kə́ gōtə́ tə́ ō, ɔjədə́ róbə yān ō.

¹⁰ Yá̰a̰ gə̄ ń Kɔ́ɔ̄ɓē ɔjə malang ní i kem majə ō, ra dɔ ndū tə́ ō tām̄ yā ngé gə̄ ń rāān̄ yá̰á̰ ń ndū najə̄ kə́ dɔ madə̄ naā yān tə́ əda ní.

¹¹ Kɔ́ɔ̄ɓē, i tām̄ yā rīí tə́ n ā ī-mā̰yń rɔ̄í dɔ yá̰á̰ kə́ gōtə́ aĺ yāḿ kə́ ngá̰ý tə́ ní?

¹² Deē ń ɓōĺ ndíĺ Kɔ́ɔ̄ɓē ní, ni a ɔjən róbə́ ń kadə̄ a un ní.

¹³ Deē ní a ndi majə ō, ngánən gə̄ a əngen̄ dɔ nang ń Nə́ɓā ənī míndən yā kadə̄də́ ní ō.

¹⁴ Kɔ́ɔ̄ɓē ənī kemən adə̄ ngé gə̄ ń ɓōlə́n̄ ndílən ní. Ni-rāā adə̄ gerə̄n̄ madə̄ naā yān.

¹⁵ Kumḿ i kə̄ dɔ Kɔ́ɔ̄ɓē tə́ ngándáńg, tɔdɔ̄ ni ɔrə̄m̄ kum gūmbə̄ ń əhɔm̄ tə́ ní.

¹⁶ Kɔ́ɔ̄ɓē, ī-tūr̄ kumií kə̄ rɔ̄ḿ tə́ á̰a̰ kum tō ndoō yāḿ, tɔdɔ̄ mə̄kɔ́ i kə kérə́ḿ ō kumḿ tō ndoō ngá̰ý ō.

¹⁷ Ɔ̄r̄ sōl̄ kə́ kemḿ tə́ kɔ̄ɔ́ ādə̄ néĺ tóom̄ sḛ́ý. Ɔ̄rə̄m̄ kɔ̄ɔ́ kum yá̰á̰ kə́ ngan̄g tə́.

¹⁸ Á̰á̰ yá̰á̰ kə́ to kum tō ndoō ń rāām̄ ní ō á̰á̰ tápə̄ yāḿ ō, ba ɔ̄r̄ yá̰á̰ kə́ gōtə́ aĺ yāḿ gə̄ kɔ̄ɔ́ malang.

¹⁹ Á̰a̰ madə̄ ba̰ā̰ḿ gə̄ ń kutədə́ i ngá̰ý ní ō, á̰a̰ kim̄ ń imə̄mə̄n̄ kə ngangá ngá̰ý ní ō.

²⁰ Ī-ngɔ̄mə̄m̄ ō ī-gān̄g dɔḿ ō! m̄-rāāī i loo ɓɔ̄ɔ̄ rɔ̄ yāḿ tə́, ba ī-lōō rāā kadə̄ m̄-tél m̄-ndə̄ngā rɔ̄ḿ.

²¹ Ādə̄ hálí kə́ gōtə́ ō kə́ súmūú ō ngɔ̄mə̄mə̄n̄, tɔdɔ̄ m-ə̄ndā kemḿ dɔí tə́.

²² Nə́ɓā, ɓɔ́ ī-gān̄g dɔ Israel! Ɔ̄rən kɔ̄ɔ́ kum yá̰á̰ kə́ majaĺ gə̄ malang ń reēn̄ dɔn tə́ ní.