PĀ GƏ̄ 21 - Bibəl ta Sar̄

Mban̄g əndā kemən dɔ Kɔ́ɔ̄ɓē tə́ karī

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid.

² Kɔ́ɔ̄ɓē, mban̄g rāā rɔ̄nel̄ tɔ́gí kə́ ngá̰ý. Dan ń ī-tetə rɔ̄ɔ̄ ādə̄n ní rɔ̄n nelə̄n ngá̰ý!

³ Ḭ̄ ādə̄n yá̰á̰ ń kemən gḛy ní, ḭ̄ ɔ̄gən yá̰á̰ ń dəjeī ní alé.

⁴ Ḭ̄ ɔ́ý yá̰á̰ kə́ majə gə̄ ngá̰ý dɔí tə́, ī-tə́nań tan yā rāań majə seneé. Ḭ̄ ə́la jākā mbang kə́ rāā kə lɔ́rɔ́ dɔn tə́.

⁵ Ḭ̄ ī-rāā ādə̄ ndi kə kumneé tītə̄ ń dəjeīń ní, ndi i ndi kə́ dan a gān̄g aĺ bátə́.

⁶ Ī-tetə rɔ̄ɔ̄ ādə̄n adə̄ rīn ɓār̄ ngá̰ý. ī-rāā ādə̄ ni-tél de kə́ bo, adə̄ de gə̄ ɓōlə́n̄ ndílən.

⁷ Ḭ̄ ī-rāā ādə̄ de gə̄ a tɔ́rə̄n̄ tadə́ dɔ naā tə́ i kə rīneé ngándáńg. Ndin ta kumií tə́ adə̄n rɔ̄nel̄ ngá̰ý.

⁸ A̰á̰ā̰, mban̄g əndā kemən i dɔ Kɔ́ɔ̄ɓē tə́ ō, kem majə yā Nə́ɓā kə́ dɔɔ́ sa̰y ngá̰ý rāā adə̄ ni-ra ngan̄g ō.

⁹ Ā ə́hɔ madə̄ ba̰ā̰í gə̄ malang kə jīí. Ā ə́hɔ́ ngé kənīī rɔ̄ɔ̄ gə̄ kə jī ko̰í.

¹⁰ Ndɔ̄ ń ā ī-teē bus tə́ ní, ā ī-rāā kadə̄ ton̄ tītə̄ hor kə́ ajə ying beé. Kɔ́ɔ̄ɓē a nujə sedə́ sáksák kɔ̄ɔ́ kə wōngōó ō, hor a o̰o̰də́ ō.

¹¹ Ā ī-rāā kadə̄ ngán kaadə́ gə̄ gətóon̄ kɔ̄ɔ́ dɔ nang tə́. Ā ī-tɔ̄ɔ̄ kōōdə́ kɔ̄ɔ́ dan de gə̄ tə́.

¹² Ré nómə̄n̄ rāā yá̰á̰ kə́ majaĺ seí ō, oōn̄ naā dɔí tə́ loo mundə̄ tə́ ō anī, a asən̄ rāā yá̰á̰ kógə̄ḿ seí alé.

¹³ Ā ī-túr̄də́ kə ga̰ gərā yāí gēé. Ā ī-rāādə́ kadə̄ a a̰ȳn̄ naā.

¹⁴ Kɔ́ɔ̄ɓē, ɔ́jə́ tɔ́gí kə́ ngá̰ý kə̄ ndágá. Ba yājí jḭḭ ɓáa, jə-ndigə i kənī pā ō, kɔsə gɔn yá̰a̰ rāāí kə́ to rī ɓār̄ gə̄ ō.