PĀ GƏ̄ 20 - Bibəl ta Sar̄

Ndɔ̄ȳ kə́ tām̄ yā mban̄g tə́

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid.

² Ādə̄ Kɔ́ɔ̄ɓē oō ndūí ndɔ̄ ń wur kɔl əsōń dɔí tə́ ní! Ādə̄ Nə́ɓā yā Jakob ngɔ̄mī!

³ Ādə̄ ni ń ndi kem loo yān kə́ táĺ tə́ ní əla kə yá̰á̰ rāań seí ō. Ādə̄ ni ń ndi Siyo̰ ní ɔsə kílí kə̄ dɔɔ́ ō!

⁴ Ādə̄ əga kemən dɔ yá̰a̰ malang ń ī-ndējən ní tə́, ādə̄ ndigə yá̰a̰ gə̄ ń ī-róō horoó ādə̄n ní!

⁵ Ādə̄ ni adī yá̰á̰ ń kemií gḛy ní, ādə̄ rāā yá̰a̰ malang ń ī-sāā rāā ní ādə̄ udə gírí!

⁶ Loo ń noō tə́ j-a jə-rāā rɔ̄nel̄ rɔ̄ɔ̄ ń ī-tetə ní, j-a j-əhɔ dərapóo rɔ̄ɔ̄ dɔjí tə́ dɔɔ́ yā rɔȳń Nə́ɓā yājí. Ādə̄ Kɔ́ɔ̄ɓē tɔ̄l̄ ta yá̰a̰ malang ń ī-dəjen kadə̄ rāā adī ní.

⁷ Ngɔlaā m̄-ger̄ tā: Kɔ́ɔ̄ɓē tetə rɔ̄ɔ̄ adə̄ mban̄g ń ni gə̄rān ní. Ndi i kə̄ kem loo kə́ táĺ yān kə́ dɔ rā̰ tə́ tə́ n oōń ndūn ní. Jī ko̰n rāā yá̰á̰ kə́ to rī ɓār̄ tetəń rɔ̄ɔ̄ adə̄n.

⁸ De kə́rēý gə̄ əndān̄ kemdə́ i dɔ púsə rɔ̄ɔ̄ yādə́ gə̄ tə́ ō, kə́ madə̄ gə̄ əndān̄ kemdə́ i dɔ sə́nda yādə́ gə̄ tə́ ō. Ba jḭḭ tā a jə-nōō i kə̄ dɔ Kɔ́ɔ̄ɓē Nə́ɓā yājí tə́.

⁹ Njadə́ sɔl̄ yélélé ō, tə́sōn̄ ō, banī jḭḭ jə-ra dɔɔ́.

¹⁰ Kɔ́ɔ̄ɓē, ī-rāā kə mbangāá, tá kadə̄ ré jə-ɓārə́n kadə̄ rāā sejí anī, ni ndigəjí.