PĀ GƏ̄ 19 - Bibəl ta Sar̄

Kɔsə gɔn yā Nə́ɓā ō Ndū najə̄ yān ō

¹ Pā kə́ kem makətūbə̄ yā ngār yā gōsə̄ gə̄ tə́. I pā yā Dabid.

² Dɔ rā̰ ɔjə i kɔsə gɔn yā Nə́ɓā kə̄ ndágá, no rā̰ ɔjə i yá̰á̰ ń Nə́ɓā rāā ní kə̄ ndágá.

³ Loo kə́ kadaá ənī gotə yá̰á̰ ń Nə́ɓā rāā ní adə̄ loo kə́ kadaá madə̄n oō ō, loo kə́ ndɔ̄ɔ́ ɔjə madə̄n adə̄ ger̄ ō.

⁴ I gotə najə̄ kə́ kənī alé, kum najə̄ gə̄ gətóon̄ tū tə́ ō. Deē oō kōōdə́ aĺ ō.

⁵ Banī ndūdə́ əsō gō naā tə́ ō, taā loo dɔ nang tə́ malang ō. Deē ra i ta ngóy dɔ nang tə́ gə̄gē anī a oō najə̄ kɔr̄də́ ní. Nə́ɓā udə kújə tandā nú tām̄ yā mbang tə́.

⁶ Kə ndɔ̄í anī mbang əɓa. Teē tītə̄ ngaa dəyá̰ kijə kə́ teē kújə ɓīīn tə́ kə̄ ndágá beē. Teē tītə̄ nge rāā go̰ ngɔ̄də̄ kə́ rāā walya ngɔ̄də̄ ń a rāā yā ka̰ȳ ní beē.

⁷ Ni teē ta ngóy dɔ rā̰ kə́ dām̄ kə́rēý tə́, njə̄rā bátə́ ugə̄ ta ngóy dɔ rā̰ kə́ dām̄ kə́ noō tə́ ō, yá̰á̰ kə́ kəngān ɔdən aĺ gətóo ō.

⁸ Ndū najə̄ yā Kɔ́ɔ̄ɓē majə ɔtə̄ kə taá, rāā adə̄ deē tél ajə gogə́. Yá̰a̰ gə̄ ń Kɔ́ɔ̄ɓē əda ní i yá̰á̰ kə́ rɔ̄kum gə̄, rāā adə̄ de kə́ mbóo tél de kə́ ngáā.

⁹ Yá̰a̰ gə̄ ń Kɔ́ɔ̄ɓē ra kə deē ta rāā ní i yá̰á̰ kə́ gōtə́ gə̄, ā əlan̄ rɔ̄nel̄ kem deē tə́. Gō míndə gə̄ ń Kɔ́ɔ̄ɓē əda kadə̄ yā rāā ní i yá̰á̰ kə́ unjə̄ njáý njáý gə̄, a rāān̄ kadə̄ kum deē a̰a̰ loo rá ráńg.

¹⁰ Ɓōĺ ndíĺ Kɔ́ɔ̄ɓē i yá̰á̰ kə́ majə ō, to ngándáńg kə dɔ ɓāl̄ gə̄ ō. Ndū gə̄ ń Kɔ́ɔ̄ɓē ra dɔ tə́ ní i ndū kə́ rɔ̄kum gə̄, i ndū kə́ gōtə́ gə̄ malang.

¹¹ Adə̄ nel̄ kem de gə̄ ngá̰ý tɔȳ lɔ́r, tɔȳ dūbə̄ lɔ́r kə́ unjə̄ njáý njáý. Adə̄ nel̄də́ ngá̰ý tɔȳ yibə̄ tejə, tɔȳ yibə̄ tejə kə́ kijə.

¹² Kɔ́ɔ̄ɓē, mā nge kəla yāí m̄-ger̄ yá̰a̰ i kə ta kūl̄də́ ō, rāān̄ seḿ ngá̰ý dan ń m-ún gōdə́ ní ō.

¹³ I náā n kumən teē dɔ yá̰á̰ kə́ rāā gō ger̄ aĺ tə́ ní? Ī-māȳ rɔ̄í dɔ yá̰á̰ kə́ gōtə́ aĺ ń m̄-rāā ba m̄-ger̄ alé ní tə́.

¹⁴ Ɔ̄r̄ nge kəla yāí kɔ̄ɔ́ dan ngé kɔjə rɔ̄də́ gə̄ tə́. Ī-rāā ādə̄ asən̄ yá̰a̰ rɔ̄n tə́ alé. Ɓá anī najə̄ a gətóo dɔn tə́ ō, deē a ɓār̄ rī majaĺ kə́ ngá̰ý dɔn tə́ aĺ ō.

¹⁵ Kɔ́ɔ̄ɓē, mbal̄ yāḿ, nge rɔ̄ɔ̄ dɔḿ tə́, ādə̄ najə̄ gə̄ ń teēn̄ taḿ tə́ ō, ngé gə̄ ń m̄-yṵ́r̄də́ kemḿ tə́ ō ní, əsōn̄ kumií.