PĀ GƏ̄ 16 - Bibəl ta Sar̄

Deē ń Nə́ɓā ɔrə̄n kɔ̄ɔ́ ta yo tə́ ní

1 I pā yā Dabid.

¹ I pā yā Dabid. Nə́ɓā ī-ngɔ̄mə̄m̄, tɔdɔ̄ i ḭ̄ n m̄-rāāī loo ɓɔ̄ɔ̄ rɔ̄ yāḿ tə́ ní.

² M-ə́dá Kɔ́ɔ̄ɓē na i ni n i Kɔ́ɔ̄ɓē ní. m̄-ndi rɔ̄ Kɔ́ɔ̄ɓē tə́ anī m̄-ndi majə ngá̰ý.

³ Ɓesə̄ gə̄ kə́ dɔ nang tə́ laā, adə̄ i tɔ́gə gə̄ ń nelə̄m̄ sedə́ kété ngá̰ý ní,

⁴ nujən̄ loo ngɔlaā tɔȳ kə́ kété ɓáý. De gə̄ bə̄gān̄ naā aw̄n̄ gōdə́ tə́. Banī mā m-ā m̄-tə́té mósə nang tə́ yā ndējə̄də́ to̰ aĺ ō taḿ a əda rīdə́ to̰ aĺ ō.

⁵ Kɔ́ɔ̄ɓē, ndɔ̄ḿ gə̄ malang i kem jīí tə́. ḭ̄ i yá̰a̰ ndəbā yāḿ ō, yá̰a̰ ka̰ȳ yāḿ kə́ sɔɔ̄ dɔḿ kem kopoó ō,

⁶ Yá̰á̰ ń wə̄lā kə́ túgə̄ əhɔ adə̄m̄ ní to rɔ̄nel̄ ngá̰ý, m-ə́nge i yá̰á̰ kə́ majə al̄ naā.

⁷ m̄-ndadə̄ m-ādə̄ Kɔ́ɔ̄ɓē nge kadə̄m̄ kɔjə̄, m̄-to ndɔ̄ɔ́ anī gír̄ yāḿ ɔjəm̄.

⁸ M-á̰á̰ Kɔ́ɔ̄ɓē ta kumḿ tə́ ngándáńg. Ni i dɔ jī ko̰ḿ tə́ adə̄ m-ā m̄-ndi ngan̄g.

⁹ M-ə̄nā kemḿ m̄-ndiń adə̄ m̄-rāā rɔ̄nel̄ ō, m-ḭ́ḭ bal walya ō.

¹⁰ Tɔdɔ̄ ā ə́ya̰m̄ ɓádá alé, ā ə́ya̰ deē yāí kadə̄ a̰a̰ bāá yon kə kumneé alé.

¹¹ Ḭ̄ ɔ́jəm̄ róbə́ kə́ aw̄ kə deé tū ndi kə kumuú tə́ adə̄ m̄-ger̄. Ré deē i rɔ̄í tə́ ngɔr anī rɔ̄n nelə̄n ngá̰ý. Rɔ̄nel̄ kə́ ngándáńg i dɔ jī ko̰í tə́.