PĀ GƏ̄ 148 - Bibəl ta Sar̄

Tɔ̄ȳn̄ Nə́ɓā dɔ rā̰ tə́ ō dɔ nang tə́ ō

¹ Aleluya! Sḭḭ̄ ń ī-ndiī dɔ rā̰ tə́ ní ī-tɔ̄yī Kɔ́ɔ̄ɓē.

² Sḭḭ̄ ń ī-ndiī loo kə́ dɔɔ́ gə̄ tə́ ní ī-tɔ̄ȳniī. Deē yān gə̄ kə́ dɔ rā̰ tə́ malang ī-tɔ̄ȳniī. Ɓūtə̄ yān gə̄ malang ī-tɔ̄ȳniī.

³ Mbang ō na ō ī-tɔ̄ȳniī. Sḭḭ̄ tə́yō̰ kə́ ndə́lē gə̄ malang ī-tɔ̄ȳniī.

⁴ Sḭḭ̄ dɔ rā̰ kə́ dɔɔ́ sa̰y gə̄ ō, man̄ gə̄ kə́ dɔɔ́ dɔ dɔ rā̰ tə́ ō ní ī-tɔ̄ȳniī.

⁵ Ādə̄ nin̄ malang tɔ̄ȳn̄ rī Kɔ́ɔ̄ɓē, tɔdɔ̄ ni-əda najə̄ tan kógə̄ḿ anī nin̄ teē ndin̄.

⁶ Ni tə́ndādə́ loo ndidə́ gə̄ tə́ i kə́ njɔ́ḿ gə̄ tə́. Ni tə́ndā ndū najə̄ gə̄ kə́ a ton̄ ngándáńg.

⁷ Ə́laī gír tɔ̄ȳ Kɔ́ɔ̄ɓē dɔ nang tə́ laā, sḭḭ̄ bā bo gə̄ ō, dā̰ man̄ gə̄ ō,

⁸ hor ō, kɔ̄sə̄ ō, néjə ō, díḿsir ō, nél man̄ kə́ a əla kə tɔ́gɔ́ kə́ a rāā yá̰á̰ ń ni-əda ní ō,

⁹ mbal̄ bo gə̄ ō, ngán mbal̄ gə̄ malang ō, kāgə̄ gə̄ kə́ a anə̄n̄ gə̄ ō, kāgə̄ sédər gə̄ malang ō,

¹⁰ dā̰ kə́ bembeé ō, kə́ ɓēé gə̄ malang ō, dā̰ gə̄ kə́ a agən̄ nang tə́ ō yel̄ gə̄ ō,

¹¹ mban̄g gə̄ kə́ dɔ nang tə́ ō, gír de gə̄ malang ō, de kə́ bo gə̄ ō, ngār gə̄ kə́ dɔ nang tə́ malang ō,

¹² balsáa gə̄ ō mandə gə̄ ō, ɓə́ga gə̄ ō ngán gə̄ ō.

¹³ Ī-tɔ̄yī rī Kɔ́ɔ̄ɓē, tɔdɔ̄ i rīn ni ngóy kə kérneé n bo ní. Kɔsə gɔn yān taā loo dɔ nang tə́ ō dɔ rā̰ tə́ ō.

¹⁴ Ni-tél əla go̰ kem deē yān gə̄ tə́. I yá̰á̰ kə́ majə kadə̄ deē yān gə̄ malang ń i ngán Israel gə̄ ní ɓōkə́nən̄ tɔ̄ȳ najə̄n tə́, i nin̄ n i gír de kə́ ngɔr rɔ̄n tə́ gə̄ ní! Aleluya!