PĀ GƏ̄ 147 - Bibəl ta Sar̄

Tɔ́gə́ Nə́ɓā kə́ tū yá̰a̰ gə̄ tə́

¹ Aleluya! Kɔsə gɔn Nə́ɓā yājí i yá̰á̰ kə́ majə ngá̰ý, ɓōkə́n tɔ̄ȳ kə gōó majə i yá̰á̰ kə́ nel̄ ta ngá̰ý!

² Kɔ́ɔ̄ɓē rāā ɓē kə́ Jerusalem gogə́ rang. Israel gə̄ ń ɔrə̄n̄də́ kɔ̄ɔ́ ní, a télən̄ yā kán̄ njadə́.

³ I ni n i nge sɔl̄ kem ngé gə̄ ń kemdə́ nujə sá sák kɔ̄ɔ́ ní ō, nge kun rɔ̄ tōr̄ yādə́ gə̄ ō ní.

⁴ Ni tə́da kutə tə́yō̰ gə̄, əndā rī dɔdə́ gə̄ tə́ kógə̄ḿ kógə̄ḿ.

⁵ Kɔ́ɔ̄ɓē yājí i de kə́ bo ō, tɔ́gən i ngá̰ý ō. Deē asə mbɔ̄jə́ ger̄ yá̰a̰ yān alé.

⁶ Kɔ́ɔ̄ɓē rāā kə ngé gə̄ ń télən̄ kə rɔ̄də́ kə̄ nang tə́ ní. Ba tél kə ngé kem ndul gēé kə̄ nang tə́ adə̄ ɔdən̄ nang lá láḿ.

⁷ Úniī pā ī-rāāīneé Kɔ́ɔ̄ɓē kə́ra. Úgiī kənde ɔ́siīneé gɔn Nə́ɓā yājí.

⁸ I ni n rāā adə̄ kil̄ man̄ gə̄ taān̄ loo dɔ rā̰ tə́ ní. Man̄ ń kadə̄ edə dɔ nang tə́ ní ni-əndā dɔ danaá i tītə̄ ń noō. I ni n i nge rāā kadə̄ mu gə̄ əɓan̄ dɔ mbal̄ gə̄ tə́ ní.

⁹ Ni-adə̄ yá̰a̰ kul̄ gə̄ ō, ngáń ká̰ā̰ gə̄ ń a nōōn̄ ɓō ní ō yá̰a̰ kəsa.

¹⁰ Yá̰a̰ kə́ ngá̰ý gə̄ ń sə́nda asə rāā ní taā kumən aĺ ō, usən dɔ yá̰á̰ ń nja deē asə rāā tə́ ní aĺ ō.

¹¹ Ba o̰o̰n tɔdɔ̄ ngé gə̄ ń ɓōlə́n̄ ndílən ō, əndān̄ kemdə́ dɔ kem majə yān tə́ ō ní.

¹² Jerusalem, ɔ́sə gɔn Kɔ́ɔ̄ɓē! Siyo̰, ī-tɔ̄ȳ Nə́ɓā yāí.

¹³ Tɔdɔ̄ ni rákə̄ ta róbə ndogə̄ yāí adə̄ ngan̄g tɔȳ kə́ kété. Ngání gə̄ ń ndin̄ ɓēé looí ní ni-rāā majə sedə́.

¹⁴ I ni n i nge rāā kadə̄ lɔm to dɔ nang yāí tə́ ní. Ni adī gémē kə́ majə ngá̰ý adə̄ ə́sa ī-ndān̄.

¹⁵ Ni-əla kəla dɔ nang tə́, anī najə̄ yān ní ngɔ̄də̄ taā loo.

¹⁶ Ni-rāā néjə adə̄ dəse tun tun tītə̄ bḭḭ̄ batə̄ kə́ əhɔ naā beé. Ni-rāā díḿsir adə̄ dəse tun tun tītə̄ bū beé.

¹⁷ Ni-rāā kɔ̄sə̄ man̄ yān adə̄ tə́sō tītə̄ butə̄ yá̰a̰ kəsa beé. I náā n asə ra kum kūl̄ yān tə́ ní?

¹⁸ Ni-əda najə̄ anī kɔ̄sə̄ yḭ̄l̄. Ni-rāā nél adə̄ əla, anī man̄ gə̄ nūgə́n̄.

¹⁹ Ni-əda gír deē yān gə̄ najə̄ yān ō, ɔjə Israel yá̰a̰ gə̄ ń ndang kadə̄ yā rāā ní ō, gō míndən gə̄ ō.

²⁰ Ni-rāā yá̰á̰ kə́ tītə̄ ń noō kə nápar de kə́ rang gēé aĺ ō, nápar de kə́ rang gə̄ gerə̄n̄ gō míndən gə̄ aĺ ō. Aleluya!