PĀ GƏ̄ 146 - Bibəl ta Sar̄

Kɔ́ɔ̄ɓē i nge ngɔ̄m̄ ngé tɔ́gə gətóo gə̄

¹ Aleluya! Dā̰ rɔ̄ḿ, ī-tɔ̄ȳ Kɔ́ɔ̄ɓē!

² M-ā m̄-tɔ̄ȳ Kɔ́ɔ̄ɓē kə dɔ ndɔ̄ gə̄ malang ń m-ā m̄-ndiń kə kumḿ ní. Gotə ndɔ̄ gə̄ malang ń m-ā m̄-ndiń kə kumḿ ní, m-ā m-ə̄nī pā tām̄ yā Nə́ɓā yāḿ tə́.

³ Ī-lōōī kəndā kemsí dɔ ngār gə̄ tə́, nin̄ i deē ndul gə̄, asən̄ kajə deē alé.

⁴ Koōdə́ a teē kɔ̄ɔ́, a télən̄ bumbə́rú gogə́. Ndɔ̄ ń noō tə́ ní, yá̰a̰ gə̄ ń nin̄ nómə̄n̄ rāā ní a tɔ̄ɔ̄ kɔ̄ɔ́ malang.

⁵ Deē ń Nə́ɓā yā Jakob i nge rāā seneé ō, əndā kemən dɔ Kɔ́ɔ̄ɓē Nə́ɓā yān tə́ ō ní, rɔ̄n nelə̄n!

⁶ Kɔ́ɔ̄ɓē rāā dɔ rā̰ ō dɔ nang ō, bā bo ō yá̰a̰ malang kə́ kum tə́ ō. Ni i nge ra dɔ ndūn tə́ ngándáńg.

⁷ De gə̄ ń rāān̄də́ yá̰á̰ kə́ tōr̄ ní, ni-gān̄g sarya yādə́ kə gōó. Ni-adə̄ ngé ɓō gə̄ yá̰a̰ kəsa ō, tútə kəlā rɔ̄ dəngáy gə̄ tə́ ō.

⁸ Kɔ́ɔ̄ɓē teē kum ngé kum tɔ̄ɔ̄ gə̄ ō, Ni-əhɔ ngé gə̄ ń nōrə̄n̄ ní kə̄ dɔɔ́ ō. Kɔ́ɔ̄ɓē tár de kə́ súmūú gə̄ ō.

⁹ Kɔ́ɔ̄ɓē ngɔ̄m̄ ngé nam̄ ɓē gə̄. Ni i nge rāā kə ngōn̄ halaá ō, kə dəyá̰ kə́ ngaa koyoó ō. Banī yá̰á̰ ń ngé kem ndul gə̄ nómə̄n̄ rāā ní, ni nujəń kɔ̄ɔ́.

¹⁰ Kɔ́ɔ̄ɓē a o̰o̰ ɓē ngándáńg. Ḭ̄ Siyo̰, ni i Nə́ɓā yāí kə dɔ ɓāl̄ gə̄! Aleluya!