PĀ GƏ̄ 145 - Bibəl ta Sar̄

Ko̰o̰ ɓē yāí a to ngándáńg

1 Pā tɔ̄ȳ. I pā yā Dabid.

¹ Pā tɔ̄ȳ. I pā yā Dabid. Nə́ɓā yāḿ, mban̄g yāḿ, m-ā m-ɔ́sə gɔnií ō, m-ā m̄-tɔ̄ȳ rīí ō ngándáńg.

² M-ā m̄-tɔ̄yī kə dɔ ndɔ̄ gə̄ ō, m-ā m̄-tɔ̄ȳ rīí ngándáńg ō.

³ Kɔ́ɔ̄ɓē i de kə́ bo, i náā n asə ger̄ gír. Ɓōkə́nən̄ tɔ̄ȳ asə kə̄ ta tə́ ta ngóy boon̄ gətóo.

⁴ De gə̄ a ənīn̄ ngáńdə́ gə̄ gotə yá̰a̰ gə̄ ń ī-rāā ní kə dɔ ɓāl̄ gə̄ kə dɔ ɓāl̄ gə̄. A tə́dan̄ yá̰a̰ rāāí kə́ to kɔsə gɔn gə̄.

⁵ M-ā m̄-tél yā kənī gotə yá̰á̰ kə́ yáā gə̄ ń ī-rāā ní ō, kənī gotə kɔsə gɔn yāí ń ndə́lē ní ō,

⁶ De gə̄ a ənīn̄ gotə tɔ́gə́ yá̰á̰ kə́ to ɓōĺ gə̄ ń ī-rāā ní ō, m-ā m-ə̄nī gotə yá̰á̰ kə́ bo gə̄ ń ī-rāā ní ō.

⁷ A ɔsən̄ gɔn kem majə yāí kə́ ngá̰ý al̄ naā ń əga kemdə́ dɔ tə́ ní ō, a urən̄ kɔĺ rɔ̄nel̄ tām̄ háĺ kə́ gōtə́ yāí tə́ ō.

⁸ Kɔ́ɔ̄ɓē i nge kem ndaa ō kumən a o̰o̰n ō, i de kə́ a tə́gā tan ō, kemən majə ngá̰ý ō.

⁹ Kɔ́ɔ̄ɓē i nge rāā majə kə de gēé malang. Ni tár de gə̄ malang ń ni rāādə́ ní.

¹⁰ Kɔ́ɔ̄ɓē, yá̰a̰ gə̄ malang ń ī-rāā ní a ɔrən̄ taí ō, deē yāí gə̄ a ɓōkə́nī tɔ̄ȳ ō.

¹¹ Nin̄ a ədan̄ na ó̰o̰ ɓē to kɔsə gɔn ō, a ɔrə̄n̄ najə̄ yá̰a̰ rāāí kə́ to ɓōĺ gə̄ ō,

¹² yā kɔjəń de gə̄ yá̰a̰ rāāí kə́ to ɓōĺ gə̄ ō, loo ko̰o̰ ɓē yāí kə́ to kɔsə gɔn ngá̰ý ō.

¹³ Ko̰o̰ ɓē yāí i ko̰o̰ ɓē kə́ to ngándáńg ō, ā ī-ndi dɔ de gə̄ tə́ i kə dɔ ɓāl̄ gə̄ malang ō. Nə́ɓā i nge kəda najə̄ kə́ rɔ̄kum. Ni i de ké nge ra dɔ ndūn tə́ tū yá̰a̰ rāān gə̄ tə́ malang.

¹⁴ Kɔ́ɔ̄ɓē əhɔ ngé gə̄ malang ń a tə́sōn̄ ní kə̄ dɔɔ́. Ni-əhɔ ngé gə̄ malang ń a nōrə̄n̄ ní kə̄ dɔɔ́.

¹⁵ Kumdə́ i dɔí tə́ ō, nin̄ malang əndān̄ kemdə́ i dɔí tə́ ō, ngóōn̄ kadə̄ ādə̄də́ yá̰a̰ kəsa kə kum mbangneé.

¹⁶ Ḭ̄ ī-teē jīí anī, yá̰a̰ gə̄ malang ń ndin̄ kə kumdə́ á ī-táŕdə́ ní, a əsan̄ yá̰a̰ yā ndān̄.

¹⁷ Kɔ́ɔ̄ɓē i de kə́ súmūú tū yá̰a̰ rāān gə̄ tə́ malang, ni i de kə́ nge ra dɔ ndūn tə́ tū kəla rāān gə̄ tə́ malang.

¹⁸ Kɔ́ɔ̄ɓē i ngɔr rɔ̄ de gə̄ malang ń a ɓāŕnən̄ tə́ ní, rɔ̄ de gə̄ malang ń a ɓāŕnən̄ kə́ rɔ̄kum tə́ ní.

¹⁹ Ni i nge rāā kem ndigə yā ngé ɓōĺ ndílən gə̄. Ni oō nōō yādə́ ō ajədə́ ō.

²⁰ Kɔ́ɔ̄ɓē i nge ngɔ̄m̄ de gə̄ malang ń a tárnən̄ ní, banī ni i nge tɔ̄l̄ ngé kem ndul gə̄ malang kɔ̄ɔ́.

²¹ M-ā m-ə̄nī pā kə́ yā tɔ̄yń Kɔ́ɔ̄ɓē ō, yá̰a̰ malang ń ndi kə kumuú ní a tɔ̄ȳ rī Nə́ɓā kə́ táĺ ō, ngándáńg!