PĀ GƏ̄ 144 - Bibəl ta Sar̄

Ndɔ̄ȳ yā mban̄g

1 Pā yā Dabid.

¹ Pā yā Dabid. Kɔ́ɔ̄ɓē ń i mbal̄ yāḿ ní m̄-tɔ̄ȳn. I ni n əhɔ jīḿ ɔjəm̄neé loo rɔ̄ɔ̄ ní, i ni n əhɔ jīḿ kə́ ɓir̄ ɔjəm̄neé loo rɔ̄ɔ̄ ní.

² I ni n i nge rāā kem majə seḿ ní ō, ni i loo ɓɔ̄ɔ̄ rɔ̄ yāḿ ō, i ni n i loo ndi kə́ ngan̄g ngá̰ý ō, nge kajəḿ ō ní. Ni i der yāḿ ō, m-ā m̄-ɓɔ̄ɔ̄ rɔ̄ḿ i rɔ̄n tə́ ō. Ni-əla dɔ gír deē yāḿ gə̄ gíŕ tɔ́gə yāḿ tə́ ō.

³ Kɔ́ɔ̄ɓē, deē i rí kadə̄ usiī dɔn tə́ ní? Deē ndul ń i yá̰á̰ kə́ a oy ní i rí kógə̄ḿ á kadə̄ ī-gír̄ dɔn tə́?

⁴ Deē ndul to i tītə̄ nél, ndɔ̄n gə̄ ton̄ i tītə̄ ndíl kāgə̄ gə̄ kə́ a mānə̄n̄ kɔ̄ɔ́ beē.

⁵ Kɔ́ɔ̄ɓē, ī-tetə ta dɔ rā̰ kə̄ nang tə́ ba ī-risə, ɔ́də mbal̄ gə̄ ādə̄ əɓan̄ sa.

⁶ Ī-rāā ādə̄ man̄ tel̄ kə̄ loo gə̄ tə́, ī-tə̄ndā madə̄ ba̰ā̰ḿ gə̄ ī-tḭ̄ḭ̄də́ naā tə́ kɔ̄ɔ́, ī-túr̄ kum gərā yāí gə̄, ī-tə̄ndā ī-gángəńdə́ kə̄ loo gə̄ tə́.

⁷ Ī-ndi dɔɔ́ ə́la jīí ájəm̄neé, ájəm̄ kum man̄ kə́ tɔ́gən i ngá̰ý tə́, ī-gān̄g dɔḿ jī tə̄rā ń

⁸ tan a əda i najə̄ kə́ sor̄ ō, jī ko̰n ɔjə kadə̄ ni túbə́ góləń i loo ō ní tə́.

⁹ Nə́ɓā, m-ā m-ə̄nī pā kə́ kijə yā kadī ō, m-ā m-úgə kənde kə́ kəlān i kutə yā kadī ō.

¹⁰ I ḭ̄ n i nge tetə rɔ̄ɔ̄ kadə̄ mban̄g gə̄ ní, nge kajə nge kəla yāí Dabid ta yo kaskar tə́ ní.

¹¹ Ájəm̄ ō ī-gān̄g dɔḿ ō jī tə̄rā ń tan a əda i najə̄ kə́ sor̄ ō, jī ko̰n ɔjə kadə̄ ni túbə́ góləń i loo ō ni tə́.

¹² Ādə̄ ngánjí kə́ balsáa gə̄ ton̄ tītə̄ kāgə̄ gə̄ kə́ əlan̄ gír tɔgə majə i kə ngōn̄ dūúdə́ ō, ādə̄ ngáńjí kə́ mandə gə̄ majən̄ tītə̄ kāgə̄ nga dan kújə́ kə́ tɔ́sə̄ yā rāań ro̰ kújə yā mban̄g gə̄ ō.

¹³ Ādə̄ gíŕ yá̰a̰ kəsa kə́ tayā tayā gə̄ rosən̄ kem mɔ̄ȳ yājí gə̄! Ādə̄ yá̰a̰ kul̄ yājí kə́ bembeé gə̄ ojən̄ naā nja dūbú ngá̰ý. Ādə̄ ojən̄ naā nja dūbú kutə ngá̰ý.

¹⁴ Ādə̄ man̄g yājí gə̄ ətōn̄ yá̰a̰ kadə̄ asə ta tə́. Ādə̄ madə̄ ba̰ā̰jí gə̄ taān̄jí loo to̰ aĺ ō, aw̄n̄ sejí ɓəloó to̰ aĺ ō. Ādə̄ deē oō kɔŕ ndágə loo yājí gə̄ tə́ to̰ aĺ ō.

¹⁵ Rɔ̄nel̄ i kə gír de gə̄ ń yá̰a̰ kə́ majə gə̄ ń noō malang ton̄ loodə́ ní! Rɔ̄nel̄ i kə gír de gə̄ ń Kɔ́ɔ̄ɓē i Nə́ɓā yādə́ ní!