PĀ GƏ̄ 143 - Bibəl ta Sar̄

Kɔ́ɔ̄ɓē, ī-lōō rāā sarya seḿ

1 Pā yā Dabid.

¹ Pā yā Dabid. Kɔ́ɔ̄ɓē, ōō ndɔ̄ȳ yāḿ, ī-nēl̄ mbīí ōoń ndūḿ ń m̄-rāāīneé ɓɔ́ ní. Ḭ̄ i de kə́ nge ra dɔ ndūí tə́ ō, de kə́ gōtə́ ō ní ī-tūrə̄m̄ najə̄ tə́!

² Mā i nge kəla yāí adə̄ ī-lōō rāā sarya seḿ, tɔdɔ̄ de kə́ súmūú ta kumií tə́ gətóo.

³ Madə̄ ba̰ā̰ḿ rāā kumḿ ndoō tə́, ənīm̄ nang tə́ ba tə́ɓām̄ kə njaneé, rāā adə̄ m̄-ndi kum loo kə́ risə til nding tə́ tītə̄ de gə̄ ń oyn̄ jōó kɔ̄ɔ́ ní beē.

⁴ Tɔ́gə́ḿ teē rɔ̄ḿ tə́ kɔ̄ɔ́, kemḿ nelə̄m̄ alé.

⁵ Əga kemḿ dɔ yá̰á̰ kə́ mān̄ kɔ̄ɔ́ tə́, m̄-tél m̄-gír̄ gō yá̰a̰ malang ń ī-rāā tə́ ní, yá̰á̰ ń ī-rāā kə jīí ní, m̄-gír̄ yá̰á̰ ngá̰ý dɔ tə́.

⁶ M-ə́la jīḿ kə̄ rɔ̄í tə́ m̄-rāāīneé ɓɔ̄ɔ̄. Mā m̄-rā noí tə́ tītə̄ dɔ nang kə́ tutə kákə́rá kákə́rá beē.

⁷ Kɔ́ɔ̄ɓē, ī-tūrə̄m̄ najə̄ tə́ láẃ na tɔ́gə́ḿ təgā kɔ̄ɔ́. Ī-lōō tūr̄ gidií taḿ tə́! Na sōgə́ jīḿ ɓoo naā kə ngé gə̄ ń a aw̄n̄ kə̄ ɓádá ní.

⁸ Ədam̄ najə̄ kə́ dɔ kem majə yāí tə́ dəloí ɓatə, tɔdɔ̄ m-ə̄ndā kemḿ dɔí tə́. Ɔ́jəm̄ róbə́ ń kadə̄ m-úń ní, tɔdɔ̄ m̄-tūr̄ rɔ̄ḿ kə̄ rɔ̄í tə́.

⁹ Kɔ́ɔ̄ɓē, ī-gān̄g dɔḿ jī madə̄ ba̰ā̰ḿ gə̄ tə́. m̄-rāāī i loo ɓɔ̄ɔ̄ rɔ̄ yāḿ tə́.

¹⁰ Ī-ndóōm̄ loo rāā yá̰á̰ ń kemií ndigə ní, tɔdɔ̄ ḭ̄ i Nə́ɓā yāḿ. Ndílí i Ndíĺ kə́ majə, ādə̄ njə̄rā seḿ dɔ róbə́ kə́ gidə asə naā majə tə́!

¹¹ Ā ī-rāām̄ kadə̄ m̄-ndi kə kumḿ, tɔdɔ̄ ḭ̄ i Kɔ́ɔ̄ɓē. Ā ī-teē seḿ kɔ̄ɔ́ dan wur kɔl kə́ əsō dɔḿ tə́, kə ta kūl̄ háĺ kə́ gōtə́ yāí.

¹² Ā ī-rāā kadə̄ madə̄ ba̰ā̰ḿ gə̄ gətóon̄ kɔ̄ɔ́ malang sɔɔ̄ń kem majə yāí ō, ā ī-rāā kadə̄ madə̄ kɔ̄lə̄ḿ gə̄ oyn̄ malang kɔ̄ɔ́ ō, tɔdɔ̄ mā i nge kəla yāí.