PĀ GƏ̄ 142 - Bibəl ta Sar̄

Kɔ́ɔ̄ɓē i loo ɓɔ̄ɔ̄ rɔ̄ kə́ ta tɔ̄l̄ ta tə́

¹ Pā kə́ kəda. I pā yā Dabid. I ndɔ̄ȳ kə́ əda dan ń ni toń kem bəlo mbalá ní.

² M-ún ndūḿ kə̄ dɔɔ́ ngá̰ý, m̄-ɓārə́nń Kɔ́ɔ̄ɓē. M-ún ndūḿ kə̄ dɔɔ́ ngá̰ý, m̄-rāań Kɔ́ɔ̄ɓē ɓɔ́.

³ M-ɔ́jən wur kɔl ń əsō dɔḿ tə́ ní, m-ɔ́jən yá̰á̰ ń tɔȳ dɔḿ ní.

⁴ Dan ń tɔ́gə́ḿ ur̄ wak kɔ̄ɔ́ ní, loo ń m-ā m-āw̄ kə̄ tū tə́ ní ḭ̄ ī-ger̄. Əyān̄ gūmbə̄ dɔ róbə́ ń m-úń tə́ ní.

⁵ Á̰a̰ loo kə̄ dām̄ kadəḿ kə́ ko̰ó̰ tə́ ba ə̄ndā ma̰ȳ á̰a̰ā̰: De kógə̄ḿ kə́ gerə̄m̄ gətóo! Loo kə́ rang kə́ kadə̄ m̄-ɓɔ̄ɔ̄ rɔ̄ḿ tū tə́ to̰ ní gətóo. De kə́ usən̄ dɔḿ tə́ gətóo!

⁶ Kɔ́ɔ̄ɓē, m-ə́ga kɔŕ kə̄ dɔí tə́! M-ə́da na: I ḭ̄ n i loo ɓɔ̄ɔ̄ rɔ̄ yāḿ ō, yá̰a̰ halaḿ ō, dɔ nang tə́ laā ní.

⁷ Ī-nēl̄ mbīí ōoń nōō yāḿ, tɔdɔ̄ tɔ́gə́ḿ gətóó kə́ al̄ naā! Ī-taām̄ jī ngé rāā kumḿ ndoō tə́ gə̄ tə́ tām̄ tɔ́gə́də́ tɔȳ yāḿ.

⁸ Ɔ̄rə̄m̄ kem dəngáy yāḿ tə́ ādə̄ m̄-tɔ̄ȳ rīí dan de kə́ súmūú gə̄ tə́, dan ń ā ī-rāā majə seḿ ní.