PĀ GƏ̄ 140 - Bibəl ta Sar̄

Ndɔ̄ȳ yā de kə́ tetən̄ najə̄ dɔn tə́

¹ Pā kə́ kem makətūbə̄ yā ngār yā gōsə̄ gə̄ tə́. I pā yā Dabid.

² Kɔ́ɔ̄ɓē, ī-gān̄g dɔḿ jī ngé kem majaĺ gə̄ tə́, ī-ngɔ̄mə̄m̄, ādə̄ m-ə̄sō kem jī ngé dɔ́nɔ gə̄ tə́ alé.

³ Nin̄ ndin̄ i gíŕ núm̄ yá̰á̰ kə́ majaĺ tə́ yā rāā ngóy. Nin̄ i ngé sāā tām̄ kə dɔ ndɔ̄ gə̄.

⁴ Nin̄ tə́lan̄ ndo̰də́ lim lim tītə̄ yā lī beé. Kong lī kakə́m rosə tadə́.

⁵ Kɔ́ɔ̄ɓē, ī-ngɔ̄mə̄m̄ ādə̄ m-ə̄sō kem jī de kə́ nge kem ndul tə́ alé. Ādə̄ m-ə̄sō kem jī de kə́ nge rāā yá̰a̰ kə dɔ́nɔ́ tə́ alé. Nin̄ gírə̄n̄ i rāām̄ kadə̄ m-ə̄sō ngóy.

⁶ Ngé kɔjə rɔ̄də́ gə̄ əyān̄ gūmbə̄ noḿ tə́, ənīn̄ kəla ō, ənīn̄ réng ō, yā kəhɔm̄neé. Nin̄ əyān̄ gūmbə̄ kadə róbə́ tə́ yā kəhɔm̄neé.

⁷ M-ə́dá Kɔ́ɔ̄ɓē na: Ḭ̄ i Nə́ɓā yāḿ! Kɔ́ɔ̄ɓē, ī-nēl̄ mbīí ōoń ndūḿ loo rāāī ɓɔ́ tə́.

⁸ Nə́ɓā, Kɔ́ɔ̄ɓē, tɔ́gə́ kə́ nge kajəḿ, ī-taā dɔḿ ndɔ̄ rɔ̄ɔ̄ tə́ adə̄ yá̰a̰ ɔdə alé.

⁹ Kɔ́ɔ̄ɓē, yá̰á̰ ń ngé kem ndul gə̄ gḛyn̄ ní ɔ́də aĺ gōdə́ tə́. Yá̰a̰ gə̄ ń a nómə̄n̄ yā rāā ní ādə̄ udə róbó alé, na sōgə́ ɔsən̄ rɔ̄də́ kə̄ dɔɔ́.

¹⁰ Ngé gə̄ ń gīrə̄n̄ gidəḿ yā rɔ̄ɔ̄m̄ ní, ādə̄ yá̰á̰ ń sāān̄ rāā seḿ ní rāādə́ nin̄ kɔ́ gə̄.

¹¹ Ādə̄ bə̄gān̄ yā̰l̄ hor dɔdə́ tə́. Ādə̄ Nə́ɓā mbə́rē tə́nīdə́ kum hor tə́, kem bəlo kə́ lú ngá̰ý kə́ asən̄ teē tū tə́ aĺ tə́!

¹² Ngé tétə̄ najə̄ gə̄ a ndin̄ kem ɓēé alé. A ngɔ̄də̄n̄ de kə́ nge rāā yá̰a̰ kə dɔ́nɔ́ ō, nge kem ndul ō, i kanjə̄ taā koō.

¹³ m̄-ger̄ kadə̄ Kɔ́ɔ̄ɓē a rāā sarya yā de kə́ nge rɔ̄ tō ndoō, ni a gān̄g sarya yā ngé ndoō gə̄ kə gōó majə.

¹⁴ A̰á̰ā̰, de kə́ gōtə́ gə̄ a tɔ̄ȳn̄ rīí ō, de kə́ súmūú gə̄ a ndin̄ rɔ̄í tə́ ō.