PĀ GƏ̄ 14 - Bibəl ta Sar̄De gə̄ yā Nə́ɓā ō, Nə́ɓā yādə́ ō, dan de kə́ nujə kɔ̄ɔ́ gə̄ tə́ (Á̰a̰ī Pā 53 ) 1 Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. 1 Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. De kə́ mbóo gə̄ ədan̄ naā dɔ dandə́ tə́ na Nə́ɓā na gətóo! Nin̄ i de kə́ nujə kɔ̄ɔ́ gə̄. Yá̰a̰ rāādə́ to yḛr kum. De kógə̄ḿ sḛ́ý dandə́ tə́ kə́ rāā yá̰a̰ kə gōó gətóo. 2 Kɔ́ɔ̄ɓē ndi dɔ rā̰ tə́ ba əga kumən kə̄ nang tə́ əndāń ma̰ȳ de gə̄, yā ka̰ā̰ ké nge kə́rēý kumən edə̄ sḛ́ý adə̄ a sāā Nə́ɓā wa. 3 Nin̄ malang əya̰n̄ róbə́ kə́ majə kɔ̄ɔ́. Nin̄ malang i de kə́ nujə kɔ̄ɔ́ gə̄. De kógə̄ḿ dandə́ tə́ kə́ rāā yá̰a̰ kə gōó beē gətóo. 4 Kɔ́ɔ̄ɓē əda na ngé rāā yá̰a̰ majaĺ gə̄ ń noō na gerə̄n̄ yá̰a̰ aĺ rɔ̄kum, tɔdɔ̄ na əsan̄ jī gír deē yān gə̄ ajən̄neé, ba na ɓārə́n̄ rīn nja kógə̄ḿ aĺ bátə́. 5 I nin̄ n ran̄ a a̰a̰n̄ woy woy noó. Tɔdɔ̄ Kɔ́ɔ̄ɓē i dām̄ yā de kə́ súmūú gə̄ tə́. 6 Yá̰a̰ gə̄ ń nge ndoō əndā kemən dɔ tə́ ní sḭḭ̄ ī-rāāī i yá̰á̰ kə́ karī tə́, banī Kɔ́ɔ̄ɓē i loo ɓɔ̄ɔ̄ rɔ̄ yān. 7 I náā n ndi Siyo̰ nú yā tetəń rɔ̄ɔ̄ kadə̄ Israel ní? Dan ń Kɔ́ɔ̄ɓē a tél kə ngé gə̄ ń rɔ̄ gān̄gdə́ ní yā reē sedə́ dan gír deē yān gə̄ tə́ anī, Jakob a rāā walya, Israel a ndi i kə rɔ̄nelēé. |
Bibəl ta Sar̄ © L'Alliance Biblique du Tchad, 2006, 2010.
Bible Society of Chad