PĀ GƏ̄ 132 - Bibəl ta Sar̄

Siyo̰ i loo ndi Kɔ́ɔ̄ɓē ō i ɓē yā Dabid ō

1 Pā kə̄ yā kaw̄ń kə̄ loo kə́ táĺ tə́.

¹ Pā kə̄ yā kaw̄ń kə̄ loo kə́ táĺ tə́. Kɔ́ɔ̄ɓē, ādə̄ əga kemií dɔ Dabid tə́ ō, dɔ tápə̄ yān gə̄ tə́ malang ō.

² I ni n túbə adə̄ Kɔ́ɔ̄ɓē ō, ənī ndūn adə̄ nga tɔ́gə yā Jakob ō ní,

³ əda na: M-ā m-údə́ gíŕ kújə tandā yāḿ tə́ aĺ ō, m-ā m̄-to dɔ tə̄rá yāḿ tə́ yā ndájə̄ rɔ̄ḿ aĺ ō,

⁴ m-ā m̄-kótə̄ kumḿ aĺ ō, m-ā m-ə̄nī ɓīī kumḿ tə́ aĺ ō,

⁵ bátə́ kadə̄ ré m-ə́nge loo kə́ tām̄ yā Kɔ́ɔ̄ɓē tə́ pá tá, bátə́ kadə̄ ré m-ə́ngé kújə ndi nge tɔgə yā Jakob pá tá ní!

⁶ J-oō kadə̄ sandúkə́ kə́ táĺ na ndi na i Epərata, j-a̰a̰ sandúkə́ ní i gidə ɓē kə́ Yaar tə́.

⁷ J-udiī kem kújə ndi Kɔ́ɔ̄ɓē tə́, j-ɔsiī nojí nang tə́ no loo kəndā nja yān tə́.

⁸ Kɔ́ɔ̄ɓē, ḭ́ḭ dɔɔ́ ī-reē loo kɔr̄ koō yāí tə́, ḭ̄ ō, sandúkə kə́ táĺ ń tɔ́gə yāí i kemeé ní ō!

⁹ Ādə̄ ngé tun̄ yá̰a̰ yāí gə̄ əlan̄ háĺ kə́ gōtə́ kūbə̄ tə́ rɔ̄də́ tə́ ō, ādə̄ deē yāí gə̄ túrə̄n̄ kɔĺ rɔ̄nel̄ ō!

¹⁰ Mban̄g ń úr yibə̄ dɔn tə́ ní, ī-lōō tūr̄ gidií kɔ̄ɔ́ tan tə́, ī-tár nge kəla yāí Dabid.

¹¹ Kɔ́ɔ̄ɓē ənī ndūn adə̄ Dabid, rɔ̄kum, ni a tūr̄ ndūn alé, ni ədan na: I ngōnīí kógə̄ḿ n m-ā m̄-gə̄rān yā kəndān mban̄g gotií tə́ ní.

¹² Ré ngání gə̄ əhɔn̄ gō madə̄ naā yāḿ ō, rāān̄ yá̰a̰ i kə gō ndū ń m-ɔ́jə́ ní ō anī, ngán kemdə́ gə̄ a ndin̄ mban̄g kadə̄ dan gān̄g aĺ dɔ kōr̄ kāgə̄ mbang yāí tə́.

¹³ Tɔdɔ̄ Kɔ́ɔ̄ɓē gə̄rā Siyo̰, ni gḛy rāān i loo ndi yān tə́.

¹⁴ Ni əda wáńg na: Loo kɔr̄ koō yāḿ kə́ a to ta kaw̄ jóo n toó, i loo ń toō n m̄-sāā ndi tū tə́ ní.

¹⁵ A̰á̰ā̰, m-ā m̄-rāā majə kə Siyo̰, m-ā m-ādə̄n yá̰a̰ kadə̄ əsa ndiń kə kumneé, m-ā m-ādə̄ ngé ndoō yān gə̄ yá̰a̰ kadə̄ əsa ndānə̄n̄.

¹⁶ M-ā m-ə́la kajə rɔ̄ ngé tun̄ yá̰a̰ yān gə̄ tə́ tītə̄ kūbə̄ beé ō, deē yān gə̄ a túrə̄n̄ kɔĺ rɔ̄nel̄ ō.

¹⁷ M-ā m̄-rāā kadə̄ a ojən̄ mban̄g kógə̄ḿ kə́ tɔ́gən i ngá̰ý, gír yā Dabid tə́ kem ɓē kə́ Siyo̰ tə́ ō, m-ā m̄-rāā gō lámba tām̄ yā nge ń m-úr yibə̄ dɔn tə́ ní ō.

¹⁸ M-ā m-ə́la rɔ̄sɔl̄ rɔ̄ madə̄ ba̰ā̰n gə̄ tə́ tītə̄ kūbə̄ beé, banī jākā mbang yān a ndə́lē pipir nɔtə non tə́.