PĀ GƏ̄ 12 - Bibəl ta Sar̄

Najə̄ yā Kɔ́ɔ̄ɓē dan de kə́ nujə kɔ̄ɔ́ gə̄ tə́

¹ Pā kə́ kem makətūbə̄ yā gōsə̄ pā gə̄ tə́. A dānə̄n̄ gō i kə kənde kə́ kəlān i sɔ́sɔ́. I pā yā Dabid.

² Kɔ́ɔ̄ɓē, ī-dḭḭ̄m̄ tə́! Gír de kə́ ran̄ dɔ ndūdə́ tə́ gə̄ təgān̄ kɔ̄ɔ́, de kə́ asən̄ kadə̄ deē ənī kemən adə̄də́ gətóon̄ kɔ̄ɔ́.

³ De gə̄ a tə́dan̄ i najə kə́ majaĺ gə̄ dɔ naā tə́, tadə́ nel̄ ngá̰ý kə naá, ba kemdə́ əhɔ naā alé.

⁴ Ādə̄ Kɔ́ɔ̄ɓē rāā adə̄ ngé ta nel̄ gə̄ ba kemdə́ i yá̰á̰ kə́ rang gə̄ ō, ngé gán̄g rɔ̄də́ gə̄ ō ń noō gətóon̄ kɔ̄ɔ́.

⁵ Nin̄ ń ədan̄ na n-gerə̄n̄ najə̄ kə́ yā kəda tetəń rɔ̄ɔ̄, na n-a n-əhɔn̄ tadə́ ngan̄g adə̄ na n-ɓōlə́n̄ deē alé ní.

⁶ Banī Kɔ́ɔ̄ɓē əda na, ń toō ní n-a n-ḭḭ dɔɔ́ yā dḭḭ̄ ngé tɔ́gə gətóo gə̄ ń a rāān̄ kumdə́ ndoō tə́ ní ō, ngé rɔ̄ to ndoō gə̄ ń a tṵ́ṵ̄n̄ ní ō. Na n-a n-dḭḭ̄ deē ń a əjanən̄ kə̄ gogə́ kə gidə jīdə́ ní ō.

⁷ Najə̄ kɔr̄ Kɔ́ɔ̄ɓē i najə̄ kə́ unjə̄. To i tītə̄ gində̄ arjā̰a̰ kə́ nō horoó beē, kə́ ɔrə̄n̄ yedə̄n nja sīrí adə̄ unjə̄ njáý njáý.

^8-9 Kɔ́ɔ̄ɓē, ngé kem ndul gə̄ dáȳn̄ kə̄ loo gə̄ tə́ ō, gír̄ rāā majaĺ rosə kemdə́ ō, ba ā ī-ngɔ̄m̄jí ngándáńg ta de kə́ majaĺ gə̄ ń noō tə́, tɔdɔ̄ ḭ̄ i nge ra dɔ ndūí tə́.