PĀ GƏ̄ 110 - Bibəl ta Sar̄

Mban̄g kə́ nge tun̄ yá̰a̰

1 Pā yā Dabid.

¹ Pā yā Dabid. Najə̄ ń Kɔ́ɔ̄ɓē əda Kɔ́ɔ̄ɓē yāḿ ní n toó: Ī-ndi dɔ jī kó̰ḿ tə́ ādə̄ m̄-rāā adə̄ madə̄ ba̰ā̰í gə̄ télən̄ yá̰a̰ kəndā nja yāí.

² Ādə̄ Kɔ́ɔ̄ɓē ń ndi Siyo̰ ní rāā adə̄ ko̰o̰ ɓē yāí əla gír Jerusalem bátə́ ta kaw̄ sa̰y! Ó̰o̰ ɓē dan madə̄ ba̰ā̰í gə̄ tə́!

³ De kə́ dəngam kə́ ger̄ rɔ̄ɔ̄ ngá̰ý gə̄ aw̄n̄ gōí tə́ ndɔ̄ ń ɔ́səń nja ngé rɔ̄ɔ̄ yāí gə̄ kə̄ naā tə́ ní. Dɔ mbal̄ kə́ táĺ gə̄ tə́, balsáa yāí gə̄ a reēn̄ kə̄ rɔ̄í tə́, tītə̄ tal kə́ ta gír loo tə́ beē.

⁴ Kɔ́ɔ̄ɓē a tūr̄ ndūn alé, tɔdɔ̄ túbə əda na: Ḭ̄ i nge tun̄ yá̰á̰ kə́ njɔ́ḿ gə̄ tə́ tītə̄ yā Melkisedek.

⁵ Kɔ́ɔ̄ɓē i dɔ jī ko̰í tə́: Ni rējə̄ mban̄g gə̄ ndɔ̄ ń wōn̄g rāānneé tə́ ní.

⁶ Ni-gān̄g sarya dɔ nápar de gə̄ tə́, loo i nīń de gə̄ malang. Ni rējə̄ dɔ de gə̄ kə̄ loo gə̄ tə́ malang dɔ nang tə́.

⁷ Dan ń mban̄g i róbó ní, aw̄ a̰ȳ man̄ kə́ a nūgə́. Dan ń ni a̰ȳ oy anī ɔr̄ dɔn dɔɔ́.