PĀ GƏ̄ 105 - Bibəl ta Sar̄

Nə́ɓā ra dɔ ndūn tə́

¹ Ɔ́siī gɔn Kɔ́ɔ̄ɓē, ī-ɓāríī rīn kə ndū boó. Ə̄nīī gotə yá̰á̰ kə́ to ɓōĺ gə̄ ń ni-rāā ní dan gír de gə̄ tə́ ādə̄ oōn̄.

² Ə̄nīī pā ō, ə́ndaī yá̰á̰ kə́ ɓār̄ gōsə̄ gə̄ ō tām̄ yān tə́. Ə̄nīī gotə yá̰á̰ kə́ yáā gə̄ malang ń ni-rāā ní.

³ Sḭḭ̄ ngé sāā Kɔ́ɔ̄ɓē gə̄, ɔ́riī ta rɔ̄sí tām̄ yā rīn kə́ táĺ tə́, ādī rɔ̄sí nel̄sí.

⁴ Ī-sāāī Kɔ́ɔ̄ɓē ō, tɔ́gən ō, ī-sāāī kadə̄ ī-ndiī ta kumən tə́ ngándáńg.

^5-6 Sḭḭ̄ ngán kaa nge kəla yān Abəraham gə̄, sḭḭ̄ ngán Jakob gə̄ ń ni gə̄rāsí ní, ādə̄ əga kemsí dɔ yá̰á̰ kə́ yáā gə̄ ō, kə́ to ɓōĺ gə̄ ō ń ni-rāā tə́ ní ō, dɔ sarya gə̄ ń ni-gān̄g tə́ ō ní.

⁷ I ni n i Kɔ́ɔ̄ɓē Nə́ɓā yājí kə́ nge ko̰o̰ ɓē dɔ dɔ nang tə́ malang ní.

⁸ Əga kemən dɔ madə̄ naā yān tə́ ngándáńg. I najə̄ kə́ tām̄ yā de gə̄ tə́ ō, ngándə́ gə̄ tə́ ō, ngán kaadə́ gə̄ tə́ ō, bátə́ ugə̄ń dɔ ngán kaadə́ gə̄ kə́ nge ko̰ dūbú tə́.

⁹ Əga kemən dɔ madə̄ naā ń ni-əhɔ kə Abəraham, á ni túbə̄ njan adə̄ Isaak ɔjənneé kadə̄ i madə̄ naā kə́ rɔ̄kum ní.

¹⁰ Ni-rāā adə̄ tél i yá̰á̰ kə́ ndang kadə̄ yā rāā tām̄ yā Jakob tə́ ō, i madə̄ naā kə́ a to ngándáńg tām̄ yā Israel tə́ ō,

¹¹ dan ń ni-əda na: M-ādī dɔ nang kə́ Kanaan ń i núsə dɔ nang kə́ gān̄g kadə̄sí kə ngánsí gə̄ ō, ngán kaasí gə̄ ō, kadə̄ i yá̰a̰ kənge yāsí ní!

¹² Dan ngeé ń noō tə́ ni, kutədə́ i ngá̰ý alé. I ngé nam̄ ɓē gə̄ kə́ nin̄ i sḛ́ý beē ngóy.

¹³ Nin̄ aw̄n̄ ō télən̄ ō kə̄ dan nápar de kə́ rang gə̄ tə́. Nin̄ ḭḭn̄ ɓē ko̰o̰ kə́rēý tə́ aw̄n̄ kə́ noō tə́.

¹⁴ Banī Nə́ɓā əya̰ deē kógə̄ḿ adə̄ rāādə́ yá̰á̰ kə́ majaĺ alé. Ənda mban̄g gə̄ najə̄ yādə́ tə́.

¹⁵ Əda de gə̄ na: Ī-lōōī kɔdə rɔ̄ ngé gə̄ ń m-úr yibə̄ dɔdə́ tə́ ní, ī-lōōī rāā ngé koō ta yāḿ gə̄ yá̰á̰ kə́ majaĺ!

¹⁶ Ni-rāā adə̄ ɓō əsō kem ɓēé, rāā adə̄ yá̰a̰ kəsa gətóo.

¹⁷ Əla deē kógə̄ḿ kété nodə́ tə́, i Jəjep ń igən̄ seneé adə̄ ni i ɓəlo ní.

¹⁸ Ənīn̄ kángə́lá njan tə́, ənīn̄ súĺ míndən tə́.

¹⁹ Najə̄ yā Kɔ́ɔ̄ɓē nāān bátə́ adə̄ yá̰á̰ ń ni-əda kété ní udə gíŕ kə́ rɔ̄ tə́.

²⁰ Mban̄g əda kadə̄ ɔr̄nən̄ dəngáyá, nge ko̰o̰ ɓē dɔ gír de gə̄ tə́ adə̄ tútə əya̰nən̄ dɔɔ́.

²¹ Ba əndān dɔ de gə̄ kə́ kem kújə yān tə́ ō, dɔ yá̰a̰ kənge yān gə̄ tə́ malang ō,

²² kadə̄ ɔjə de kə́ bo gə̄ loo koō tan ō, kadə̄ ndóō kum kɔɔ̄ gə̄ kum kedə̄ ō.

²³ Gō tə́ anī Israel reē dɔ nang kə́ Ejiptə tə́, Jakob ndɔ́tə̄ ɓē aw̄ dɔ nang yā Kam tə́.

²⁴ Nə́ɓā rāā adə̄ gír deē yān gə̄ rosən̄ loo láẃ ngá̰ý ō, rāā adə̄ tɔ́gə́də́ i ngá̰ý tɔȳ yā madə̄ ba̰ā̰də́ gə̄ ō.

²⁵ Ni tūr̄ kem de kə́ Ejiptə gə̄, rāā adə̄ nin̄ imə̄n̄ gír deē yān gə̄ ō, rāā adə̄ nin̄ rāān̄ ngé kəla yān gə̄ gōtə́ aĺ ō.

²⁶ Loo ń noō tə́ ni-əla nge kəla yān Moijə ō, Aaro̰ ń ni gə̄rān ní ō.

²⁷ Najə̄ tadə́ rāā yá̰á̰ kə́ yā kɔjəń kum yá̰a̰ gə̄ dɔ nang kə́ Ejiptə tə́. Nin̄ rāān̄ yá̰á̰ kə́ yáā gə̄ ń Nə́ɓā ədadə́ ní dɔ nang yā Kam tə́.

²⁸ Nə́ɓā ənī til loo tə́ anī loo risə til nding ō, deē kógə̄ḿ tɔ́sə̄ gātə̄ najə̄ yān aĺ ō.

²⁹ Ni-rāā man̄ adə̄ téĺ mósə ō, rāā adə̄ kānjə̄ kə́ kum tə́ gə̄ oyn̄ ō.

³⁰ Karā̰ gə̄ taān̄ loo kem ɓēé, aw̄n̄ bátə́ túdə̄n̄ kə̄ kem kújə gə̄ yā mban̄g tə́ gə̄gē.

³¹ Nə́ɓā əda najə̄, anī kón̄g mba gə̄ ō yḭ́l̄ gə̄ ō reēn̄ dɔ nang yādə́ tə́ malang.

³² Ni-rāā adə̄ kɔ̄sə̄ edə dɔdə́ tə́ kum gotə man̄ ō, rāā adə̄ məyā̰ man̄ əla hor dɔ ɓē yādə́ tə́ ō.

³³ Nujə kāgə̄ nduú yādə́ gə̄ ō, kāgə̄ kótə̄ yādə́ gə̄ ō, tétə̄ kāgə̄ gə̄ kə́ gō nang yādə́ tə́ ō.

³⁴ Nə́ɓā əda najə̄ kə́ rang ɓáý to̰ anī yim̄ gə̄ ō, gír taw̄ kə́ tayā tayā gə̄ kə́ dum̄ tə́dádə́ gə̄ ō teē reēn̄.

³⁵ Nin̄ əsan̄ mu malang kə́ kem ɓēé ō, əsan̄ yá̰a̰ malang kə́ teē dɔ nang tə́ ō.

³⁶ Nə́ɓā tɔ̄l ngáń hágə gə̄ malang kə́ kem ɓē yādə́ tə́ kɔ̄ɔ́, adə̄ i ngáńdə́ gə̄ ń ḭḭn̄ kə̄ nang tə́ á ojən̄ ní.

³⁷ Gō tə́ anī teē kə deē yān gēé kɔ̄ɔ́, nin̄ ətōn̄ gində̄ arjā̰a̰ ō lɔ́r ō. Deē kógə̄ḿ kə́ dan gír ɓē yān gə̄ tə́ kə́ njan əhɔ dɔ nang aĺ gətóo.

³⁸ De kə́ Ejiptə gə̄ rāān̄ rɔ̄nel̄ teēdə́ kɔ̄ɔ́, tɔdɔ̄ ɓōĺ rāādə́ ngá̰ý.

³⁹ Ni utə̄ dɔdə́ kə kil̄ maná ō, adə̄də́ hor kógə̄ḿ adə̄ a̰a̰n̄neé loo ndɔ̄ɔ́ ō.

⁴⁰ Dəjen̄ dā̰ anī adə̄də́ kerwḛy gə̄, adə̄də́ yá̰a̰ kəsa kə́ dɔ rā̰ tə́ adə̄ əsa ndānə̄n̄.

⁴¹ Ni njar mbal̄ anī man̄ teē tū tə́, nūgə́ kem dəla loo tə́ tītə̄ bā beé.

⁴² Əga kemən dɔ míndən kə́ táĺ ń ənī adə̄ nge kəla yān Abəraham tə́ ní.

⁴³ Ni-adə̄ gír deē yān gə̄ teēn̄ i kə rɔ̄nel̄ kə́ ngá̰ý. Ngé gə̄ ń ni gə̄rādə́ ní əgan̄ i kɔŕ rɔ̄nel̄ n teēn̄neé ní.

⁴⁴ Adə̄də́ dɔ nang yā nápar de kə́ rang gə̄. Nin̄-teēn̄ dɔɔ́ kə tətō de kə́ rang gə̄ ń rāān̄ kəla ní,

⁴⁵ yā kadə̄ nin̄-ngɔ̄mə̄n̄neé yá̰a̰ gə̄ ń ni ndang kadə̄ yā rāā ní ō, əndān̄neé kumdə́ gír ndū najə̄ yān gə̄ tə́ ō. Aleluya!