PĀ GƏ̄ 104 - Bibəl ta Sar̄

m̄-ɓōkə́ Nə́ɓā kə́ nge kəndā yá̰a̰ gə̄ tɔ̄ȳ

¹ Dā̰ rɔ̄ḿ, ī-ɓōkə́ Kɔ́ɔ̄ɓē tɔ̄ȳ! Kɔ́ɔ̄ɓē Nə́ɓā yāḿ, ḭ̄ i de kə́ bo ngá̰ý! Ḭ̄ ə́la loo kə́ ndə́lē pipir ō unjə̄ kow ō kūbə̄ tə́ rɔ̄í tə́.

² Ī-ɓír̄ rɔ̄í kə loo kunjú tītə̄ loo ɓír̄ rɔ̄ kə kūbūú beē. Ḭ̄ ī-teē kem dɔ rā̰ tītə̄ loo teē kem tandā beé.

³ Kɔ́ɔ̄ɓē tə́ndā kújə yān gə̄ dɔ naā tə́ dɔ man̄ kə́ dɔɔ́ gə̄ tə́. Rāā kil̄ man̄ gə̄ i púsə́ sə́nda yān gə̄ tə́. Ndi i dɔ bɔ̄gə̄ néĺ tə́ n a njə̄rań ní.

⁴ Ni-rāā nél i ngōmbang kəla yān tə́ ō, rāā ta ndo̰ hor i de kə́ bo yān gə̄ tə́ ō.

⁵ Ni-əndā dɔ nang i dɔ gír gisən gə̄ tə́, adə̄ dɔ nang a yéȳ aĺ i kə́ bátə́ gə̄ tə́.

⁶ Ḭ̄ ūtə̄ gidə dɔ nang kə bā boó tītə̄ kə́ i kə kūbūú beē. Man̄ kə́ tū tə́ gə̄ ḭḭn̄ bátə́ ugə̄n̄ dɔ mbal̄ bo gə̄ tə́ dɔɔ́.

⁷ Ɔ́jə rāādə́ yá̰á̰ kə́ tōr̄ anī nin̄ a̰ȳn̄ naā. Oōn̄ kōō man̄ yāí ń ndang ní anī ɓōĺ rāādə́ adə̄ a̰ȳn̄ naā.

⁸ Nin̄ alə̄n̄ kə̄ dɔ mbal̄ gə̄ tə́ ō, risən̄ kə̄ wól loo gə̄ tə́ ō, aw̄n̄ bátə́ ugə̄n̄ loo ń ɔ́jə́də́ kadə̄ ugə̄n̄ tū tə́ ní tə́.

⁹ Ḭ̄ ə́ja nja loo ādə̄də́ kadə̄ mānə̄n̄ dɔ alé. Nin̄ a télən̄ yā reē taā loo dɔ nang tə́ to̰ alé.

¹⁰ Ni-rāā adə̄ man̄ kə́ əɓa nang tə́ nūgə́ aw̄ kum wól loo tə́, man̄ ní tétə̄ rɔ̄n kə mbo̰ō̰ mbal̄ gēé.

¹¹ Dā̰ kə́ bembeé gə̄ malang asən̄ reē ka̰ȳ, kərō kə́ bembeé gə̄ a̰ȳn̄ adə̄ tɔ̄l̄ kəndā ń rāādə́ ní.

¹² Yel̄ kə́ dɔɔ́ gə̄ rāān̄ ɓē kadə tə́ ō, ɓɔ̄ɔ̄n̄ rɔ̄də́ kem mbī kāgə̄ kə́ əga ku gə̄ tə́ a nōōn̄neé ō.

¹³ Kɔ́ɔ̄ɓē, ḭ̄ ī-ndi dɔɔ́ dɔ rā̰ tə́ ī-rāań adə̄ man̄ edə dɔ mbal̄ bo gə̄ tə́. Dɔ nang əsa tətōí ndān̄.

¹⁴ I ḭ̄ n i nge rāā kadə̄ mu əɓa tām̄ yā yá̰a̰ kul̄ gə̄ tə́ ō, nge rāā kadə̄ kōō ndɔr̄ de gə̄ əɓa ō ní. Yá̰a̰ kəsa yādə́ teē i dɔ nang tə́.

¹⁵ Kasə nduú rāā adə̄ rɔ̄ de gə̄ nel̄də́ ō, rāā adə̄ ta kumdə́ ndə́lē tɔȳ yibə̄ kə́ ndum ō, yá̰a̰ kəsa tél adə̄də́ tɔ́gə ō.

¹⁶ Kāgə̄ gə̄ yā Kɔ́ɔ̄ɓē ō, kāgə̄ sédər kə́ Liban tə́ gə̄ ń Kɔ́ɔ̄ɓē əndādə́ ní ō, əngen̄ man̄ adə̄ asədə́.

¹⁷ Ngán yel̄ gə̄ rāān̄ ɓē i dɔdə́ gə̄ tə́ ō, kóndə́la rāā ɓē i dɔ kāgə̄ sipəres tə́ ō.

¹⁸ Bə̄yā̰ kɔ̄r̄ gə̄ a njə̄rān̄ i dɔ mbal̄ bo kə́ ngāl̄ ngá̰ý gə̄ tə́ ō, dā̰ damā̰a̰ gə̄ a ɓɔ̄ɔ̄n̄ rɔ̄də́ i mbo̰ō̰ mbal̄ gə̄ tə́ ō.

¹⁹ Kɔ́ɔ̄ɓē rāā nāā yā kɔjəń ndɔ̄ rāā rɔ̄nel̄ gə̄ ō, rāā mbang ń ger̄ kum mbang kudən majə ní ō.

²⁰ Ni-əndā loo kə́ risə til, adə̄ i loo kə́ ndɔ̄ɔ́. Anī dā̰ malang kə́ kem ku kāgə̄ gə̄ tə́ ḭḭ a njə̄rān̄.

²¹ Ngán ɓɔl gə̄ nōōn̄ gō dā̰ yādə́ kə́ kadə̄ əsan̄ tə́, nin̄ dəjen̄ Nə́ɓā yá̰a̰ kəsa yādə́.

²² Dan ń mbang əɓa anī tél aw̄n̄ gogə́ loo todə́ gə̄ tə́ ō,

²³ deē ndul teē aw̄ ta kəla yān tə́, aw̄ rāā kəla ndɔr̄ yān gə̄ bátə́ loo tíbə dɔn tə́ ō.

²⁴ Kɔ́ɔ̄ɓē, kəla rāāí gə̄ i ngá̰ý! Ḭ̄ ī-rāādə́ malang i kə kum kedēé, yá̰a̰ gə̄ ń ə̄ndādə́ ní taān̄ loo dɔ nang tə́ malang.

²⁵ Á̰a̰ā̰, bā bo ni bo ō, laa ngá̰ý ō, kə̄ loo gə̄ tə́. Kutə dā̰ kə́ dūú gə̄ ō, kə́ bo gə̄ ō ń a njə̄rān̄ kum tə́ ní i kə́ dum̄ tə́da.

²⁶ Too bo gə̄ njə̄rān̄ dɔ tə́ aw̄n̄ ō télən̄ ō. Dā̰ man̄ ń ī-rāān yā kógə̄ naā seneé á rīn na i Lebiatan ní, njə̄rā kum tə́ aw̄ ō tél ō.

²⁷ Nin̄ malang əndān̄ kemdə́ dɔí tə́, kadə̄ ādə̄də́ yá̰a̰ kəsa kə kum mbangneé.

²⁸ Ḭ̄ ādə̄də́ anī nin̄ taān̄. Ī-teē jīí anī nin̄ əsan̄ yá̰a̰ ndānə̄n̄.

²⁹ Ī-tūr̄ gidií kɔ̄ɔ́ tadə́ tə́ anī ɓōĺ rāādə́ ngá̰ý. Ɔ̄r̄ koō yāí kə́ kemdə́ tə́ kɔ̄ɔ́ anī oyn̄ mak ō, télən̄ bumbə́ru gogə́ ō.

³⁰ Ḭ̄ ə́la koōí kemdə́ tə́ ɓá anī ndin̄ kə kumdə́ ō, dɔ nang tél kə́ kijə ō.

³¹ Kɔ́ɔ̄ɓē, ādə̄ kɔsə gɔn yāí to ngándáńg, ī-rāā rɔ̄nel̄ kəla gə̄ ń ī-rāā ní!

³² Ḭ̄ á̰a̰ dɔ nang anī ni ndebə. Ɔ́də mbal̄ bo gə̄ kə ta ngōn̄ jīí anī, əɓan̄ sa luk luk.

³³ m̄-ndigə kənī pā kə rīí kə dɔ ndɔ̄ gə̄ malang ń m̄-ndiń kə kumḿ ní. Nə́ɓā yāḿ, m-ā m̄-ɓōkíī tɔ̄ȳ dan ń m̄-ndi kə kumḿ ní.

³⁴ Kɔ́ɔ̄ɓē, ādə̄ pā tə́da yāḿ nel̄ kemií ō, ādə̄ rɔ̄ḿ nelə̄m̄ dɔí tə́ ō.

³⁵ Ādə̄ ngé rāā majaĺ gə̄ gətóon̄ kɔ̄ɔ́ dɔ nang tə́ ō, ādə̄ ngé kem ndul gə̄ ndin̄ kə kumdə́ to̰ aĺ ō! Dā̰ rɔ̄ḿ, ī-ɓōkə́ Kɔ́ɔ̄ɓē tɔ̄ȳ! Aleluya!