PĀ GƏ̄ 102 - Bibəl ta Sar̄

Yá̰á̰ kə́ tɔȳ dɔ deē ō kəndā kem dɔ Nə́ɓā tə́ ō

¹ Ndɔ̄ȳ yā de kə́ nge rɔ̄ tō ndoō kə́ tɔ́gən təgā kɔ̄ɔ́, kə́ a ɔjə Kɔ́ɔ̄ɓē yá̰á̰ kə́ tōr̄ rɔ̄n gə̄.

² Kɔ́ɔ̄ɓē, ōō ndɔ̄ȳ yāḿ, ādə̄ nōō yāḿ aw̄ bátə́ ugə̄ rɔ̄í tə́!

³ Ī-lōō tūr̄ gidií kɔ̄ɔ́ taḿ tə́, ndɔ̄ ń wur kɔl əsōń dɔḿ tə́ ní. Ī-nēl̄ mbīí kə̄ rɔ̄ḿ tə́. Ī-ndigəm̄ láẃ ndɔ̄ ń m-ā m-ɓārīneé kadə̄ ī-rāā seḿ tə́ ní.

⁴ Tɔdɔ̄ ndɔ̄ḿ gə̄ mānə̄n̄ tītə̄ sa hor beé, kə̄ngāḿ gə̄ o̰o̰n̄ hor tītə̄ ta kīr̄ hor beé.

⁵ Dan wurəḿ tutə tītə̄ mu kə́ deē əja beé, adə̄ dɔḿ ndígə̄nal kəsa yá̰a̰ kɔ̄ɔ́.

⁶ m̄-to i dan to̰ō̰ tə́ bátə́ adə̄ ń toō na̰y i kə̄ngāḿ ngóy.

⁷ m̄-to tītə̄ ngāndḭḭ̄ kə́ kem dəla loo tə́ ō, tītə̄ kɔȳ kə́ gotə ɓēé ō beé.

⁸ Ɓīī ɔdə kumḿ alé, m̄-ndi i kə kérə́ḿ tītə̄ yel̄ kə́ ndi kə kérneé dɔ kújú beē.

⁹ Madə̄ ba̰ā̰ḿ gə̄ sāān̄ taḿ kə dɔ ndɔ̄ gə̄, wōn̄g rāādə́ ngá̰ý seḿ, nin̄ túbən̄ seḿ.

¹⁰ Yá̰a̰ kəsaḿ i bū hor. Man̄ kumḿ əla naā kə man̄ ka̰ȳḿ.

¹¹ Ḭ̄ únəm̄ kə̄ dɔɔ́ pá tá ə́la ə̄nīm̄ sɔɔ̄ń wōn̄g ń rāāī ní, wōn̄g kə́ ngá̰ý ń rāāī seḿ ní.

¹² Ndɔ̄ḿ gə̄ mānə̄n̄ ngá̰ý tītə̄ ndíĺ kə́ loo sɔlí beē, m̄-tutə tītə̄ mu beé ō.

¹³ Banī Kɔ́ɔ̄ɓē, ḭ̄ i mban̄g ngándáńg, ḭ̄ i Nə́ɓā kə dɔ ɓāl̄ gə̄ ɓāl̄ gə̄.

¹⁴ Ā ḭ́ḭ dɔɔ́ tām̄ yā Siyo̰ tə́, tām̄ táŕ kə́ ī-tárən tə́, tɔdɔ̄ mbang kə́ kadə̄ kumií o̰o̰īneé tām̄ yān tə́ asə. A̰á̰ā̰ kum mbang ní asə kɔ̄ɔ́!

¹⁵ O̰o̰ ngé kəla yāí gə̄ tɔdɔ̄ mbal̄ kəndā kújə́ kə́ tū tə́ gə̄ ngá̰ý, bū loo kə́ ndəbā ɓē kə́ Siyo̰ tə́ gə̄gē kumdə́ o̰o̰də́ tɔdɔ̄ ngá̰ý.

^16-18 Dan ń Kɔ́ɔ̄ɓē a tél yā rāā ɓē kə́ Siyo̰ gogə́ rang ō, a teē hɔy kadə̄ de gə̄ a̰a̰nən̄ loo ndə́lē tə́ ō, a oō ndɔ̄ȳ yā ngé rɔ̄ tō ndoō gə̄ ō, a asən kídə̄də́ ō ní anī, nápar de gə̄ a ɓōlə́n̄ rī Kɔ́ɔ̄ɓē ō, mban̄g kə́ dɔ nang tə́ gə̄ malang a a̰a̰n̄ kɔsə gɔn yān yā ger̄ ō.

¹⁹ Ādə̄ ndangən̄ yá̰á̰ ń noō tām̄ yā ngáńdə́ gə̄ tə́. Loo ń noō tə́ gír deē kógə̄ḿ kə́ tél kəndā kijə gə̄ a ɓōkə́n̄ Kɔ́ɔ̄ɓē tɔ̄ȳ.

²⁰ Kɔ́ɔ̄ɓē ndi dɔɔ́ kem kújə́ kə́ táĺ yān tə́ ba əga kumən kə̄ nang tə́ a̰a̰ń loo. Kɔ́ɔ̄ɓē ndi dɔ rā̰ tə́ a̰a̰ń loo kə̄ dɔ nang tə́,

²¹ yā koōń sō̰ḿ dəngáy gə̄ ō, yā tútəń kəlā kɔ̄ɔ́ rɔ̄ ngé gə̄ ń gāngə̄n̄ sarya yo dɔdə́ tə́ ní ba kəya̰də́ dɔɔ́ ō.

²² A rāān̄ kadə̄ rī Kɔ́ɔ̄ɓē a ɓār̄ kem ɓē kə́ Siyo̰ tə́ ō, a tɔ̄ȳnən̄ kem ɓē kə́ Jerusalem tə́ ō,

²³ dan ń gír de gə̄ ō, ɓē ko̰o̰ gə̄ ō, a əngen̄ naā yā rāā kəla yā Kɔ́ɔ̄ɓē ní.

²⁴ Ni-ɔr̄ tɔ́gə́ḿ dɔ ngɔ̄də̄ tə́, ni-gān̄g ta ndɔ̄ḿ dɔɔ́.

²⁵ Adə̄ m-ə́da na: Nə́ɓā yāḿ, ī-lōō kunəm̄ kɔ̄ɔ́ dan ń ɓālə̄ḿ ugə̄ kə̄ danaá ɓáý ní! Ḭ̄ ā ī-ndi i kə dɔ ɓāl̄ gə̄ malang.

²⁶ Ḭ̄ ə̄ndā dɔ nang i kété jóo ō, i jīí n rāā dɔ rā̰ ō ní.

²⁷ Yá̰a̰ gə̄ ń noō a gətóon̄ kɔ̄ɔ́ banī ḭ̄ ā ī-ndi kum gotií. Nin̄ malang a ngísən̄ tītə̄ kūbə̄ kə́ əsō ngísə beé. Ḭ̄ ā ī-mbél̄ gíŕdə́ tītə̄ loo mbél̄ gír kūbə̄ beé ō, nin̄ a aw̄n̄ kɔ̄ɔ́ yā kəya̰ń loo ō.

²⁸ Banī ḭ̄ ī-ndi kum gotií, ta tɔ̄l̄ ta ndɔ̄í gətóo.

²⁹ Ngán kem ngé kəla yāí gə̄ a ndin̄ gotə kógə̄ḿ ō, ngán kaadə́ gə̄ a ndin̄ ta kumií tə́ ō.