PĀ GƏ̄ 101 - Bibəl ta Sar̄

Mban̄g ənī ndūn ta kum Nə́ɓā tə́ yā rāā yá̰á̰ kə́ súmūú

1 Pā yā Dabid.

¹ Pā yā Dabid. Kɔ́ɔ̄ɓē, m̄-ndígə̄ kənī pā dɔ kem majə tə́ ō dɔ yá̰á̰ kə́ súmūú tə́ ō, m̄-ndigə kugə kənde ō, tām̄ yāí tə́!

² m̄-ndigə tɔgə kem háĺ kə́ gōtə́ tə́ kum kə̄ kété kété. I rə́ngáý tə́ n ā ī-reē rɔ̄ḿ tə́ ní? M-ā m̄-rāā háĺ kə́ gōtə́ dan deē yāḿ gə̄ tə́.

³ Yá̰á̰ ń i yá̰á̰ kə́ gōtə́ aĺ ní, m-ā m̄-mbel yā ka̰ā̰ aĺ bátə́. M-ā m̄-kídə̄ túy taā kem, ni a ndetə kadəḿ ngɔr aĺ bátə́.

⁴ Kem kə́ súmūú aĺ ndetə kadəḿ ngɔr alé, Yá̰á̰ ń i yá̰á̰ kə́ majaĺ ní, m̄-gḛy gerə̄n alé.

⁵ De kə́ nge tetə najə̄ dɔ madə̄n gə̄ tə́ loo mundə̄ tə́ jəke ní, m-ā m̄-rāā kadə̄ ni a ɔr̄ najə̄ alé. Kum kə́ a̰a̰ loo i kə kídə̄ looó ō, kem kə́ gḛy rī ɓār̄ ngá̰ý ō ní, m-ā m̄-tə́gā taḿ dɔ tə́ alé.

⁶ M-ā m-á̰á̰ ngé ra dɔ ndūdə́ tə́ gə̄ kə́ kem ɓēé yā ger̄də́, yā kadə̄ nin̄ ndin̄ kadəḿ tə́. De kə́ nge rāā yá̰á̰ kə́ gōtə́ a rāā kəla yāḿ.

⁷ De kə́ nge gól̄ loo kə kum kedēé ngá̰ý a ndi kem kújə yāḿ tə́ alé. De kə́ nge kɔr̄ najə̄ kə́ sor̄ gə̄ a ra ta kumḿ tə́ alé.

⁸ Kə ndɔ̄í kə ndɔ̄ gə̄ malang ní, m-ā m̄-rāā kadə̄ ngé kem ndul kə́ kem ɓēé gə̄ malang ɔrə̄n̄ najə̄ alé, m-ā m-ɔ̄r̄ ngé rāā yá̰a̰ gōtə́ aĺ gə̄ kɔ̄ɔ́ kem ɓē yā Kɔ́ɔ̄ɓē tə́.