PĀ GƏ̄ 10 - Bibəl ta Sar̄

¹ Kɔ́ɔ̄ɓē, ī-ra sa̰y i najə̄ rí tə́? Kem ndɔ̄ gə̄ ń wur kɔl əsōń dɔ deē tə́ ní ī-ɓɔ̄ɔ̄ rɔ̄í kɔ̄ɔ́ i tām̄ rí tə́?

² Nge kem ndul bám̄ ngé ndoō gə̄ kanjə̄ rɔ̄sɔl̄, əhɔdə́ kə kəla rāān kə́ majaĺ gə̄ kə́ loo mundə̄ tə́.

³ Nge kem ndul ənda kadən najə̄ kəla rāān kə́ udə gírí tə́. Dan ń ni-ənge yá̰á̰ ń kemən ndigə ní oy anī, lur Kɔ́ɔ̄ɓē kə tɔ̄yɔ̄ɔ́.

⁴ Nge kem ndul ɔsə rɔ̄n kə̄ dɔɔ́, əda na Nə́ɓā na gətóo. Kum kedə̄ yān malang n noó ngóy.

⁵ Kəla rāān gə̄ i kə́ a teēnən̄ yá̰á̰ tə́ ngándáńg. Sarya gān̄g Nə́ɓā rāā yá̰á̰ kógə̄ḿ seneé alé. Ni tībə̄ hōr̄ dɔ madə̄ ba̰ā̰n gə̄ tə́ malang.

⁶ Ni-əda kə̄ kemən tə́ na: Yá̰á̰ a yéȳm̄ yek alé, yá̰á̰ kə́ to kum kaȳ aĺ a əsō dɔḿ tə́ aĺ bátə́!

⁷ Ni ndɔ̄ĺ loo kanjə̄ dəba ō, ɔ̄r̄ najə̄ gól̄ loo ngá̰ý ō, kə dɔ́nɔ́ tá ō. Kəlā ndo̰o̰n ger̄ i ndɔ̄ĺ de gə̄ ō, kənī kum tō ndoō kə̄ dɔ de gə̄ tə́ ō ngóy.

⁸ Ni ɓɔ̄ɔ̄ rɔ̄n gidə ɓē tə́ ngɔr a umə̄ń loo. Tɔ̄l̄ de kə́ najə̄ gətóo dɔn tə́ loo mundə̄ tə́. Kumən i dɔ de kə́ tɔ́gən gətóó tə́.

⁹ Ra loo ɓɔ̄ɔ̄ rɔ̄ tə́ a umə̄ń loo. Ɓɔ̄ɔ̄ rɔ̄n majə tītə̄ ɓɔl kə́ to kem ku tə́ beē. Um̄ nge rɔ̄ tō ndoō yā kəhɔn. Gētən aw̄ seneé kem réng yān tə́ pá tá əhɔn ɓáý.

¹⁰ Ni agə nang tə́, ɔsə rɔ̄n kə̄ naā tə́, ba ḭḭ kə tɔ́gən gēé malang əsō kə nge tɔ́gə gətóo, tetən rɔ̄ɔ̄.

¹¹ Nge kem ndul gír̄ kemən tə́ na usə Nə́ɓā dɔ yá̰a̰ rāān tə́ alé. Nə́ɓā na ɓɔ̄ɔ̄ ta kumən kɔ̄ɔ́, Nə́ɓā na a̰a̰ yá̰á̰ kógə̄ḿ yḛtə aĺ bátə́.

¹² Kɔ́ɔ̄ɓē, ḭ́ḭ dɔɔ́! Nə́ɓā, ī-rāā yá̰á̰ kógə̄ḿ! Ādə̄ dɔí ndígə̄nal dɔ ngé rɔ̄ tō ndoō gə̄ tə́ alé!

¹³ Ādə̄ nge kem ndul mbóo seí i tām̄ rí tə́? Ni-əda na: Ā ī-sāā njan alé.

¹⁴ Tá yá̰á̰ kə́ gōtə́ aĺ ngá̰ý ń ni-rāā kə nge ndoó ō, ka̰a̰ tápə̄ yā nge ndoō ō ní, ḭ̄ á̰a̰ā̰ ō, īkɔ́ ə̄ndā rɔ̄í ta yá̰a̰ gə̄ ń reēn̄ dɔn tə́ ní malang. Nge tɔ́gə gətóo əya̰ rɔ̄n i kem jīí ḭ̄ tə́. Ḭ̄ i nge rāā kə ngōn̄ halaá.

¹⁵ Ī-taā tɔ́gə nge kem ndul. Ādə̄ əgā kə̄rā yá̰á̰ kə́ gōtə́ aĺ ń ni-rāā ní ō, ādə̄ deē ɓār̄ rīn to̰ aĺ ō.

¹⁶ Kɔ́ɔ̄ɓē i mban̄g ngándáńg, nápar de kə́ rang gə̄ a gətóon̄ kɔ̄ɔ́ kem ɓē yān tə́.

¹⁷ Kɔ́ɔ̄ɓē, ngé tél kə rɔ̄də́ kə̄ nang tə́ gə̄ ní, ḭ̄ ādə̄də́ yá̰á̰ ń ɓōn i kemdə́ tə́ ní. Ī-rāā ādə̄ kemdə́ tetə kə̄ nang tə́ ō, ī-nēl̄ mbīí ōoń ɓār̄ yādə́ ō,

¹⁸ yā gāngəń sarya yā ngōn̄ hal ō, yā deē ń rāān̄ kumən ndoō tə́ ní ō, kə gō róbə́ kə́ súmūú. Loo ń noō tə́ de kə́ dɔ nang tə́ kə́ yā rāā madə̄n majaĺ a gətóo.