PĀ GƏ̄ 1 - Bibəl ta Sar̄

Makətūbə̄ kə́ ta kəga dɔ (Pā gə̄ 1—41 ) Rɔ̄nel̄ kə́ rɔ̄kum

^1-2 Rɔ̄nel̄ i kə deē ń un kɔjə̄ yā ngé kem ndul gə̄ rāań kəla aĺ ní. Ni dəba ra gətóo dɔ róbə yā ngé rāā majaĺ gə̄ tə́ aĺ ō ndi kə ngé lur loo gēé aĺ ō, ba gḛy i ndū najə̄ yā Kɔ́ɔ̄ɓē ō, gír̄ dɔ tə́ ndɔ̄ɔ́ ō kadaá ō ní.

³ Ni to i tītə̄ kāgə̄ kə́ əhɔn̄ kadə man̄ tə́ beē, adə̄ a a̰a̰n̄ i kə dɔ nāaneé ō, mbīn ndəlē aĺ ō. Yá̰a̰ malang ń ni-rāā ní teē majə.

⁴ Banī yā ngé kem ndul gə̄ i tītə̄ ń noō alé, nin̄ ton̄ i tītə̄ təsá kə́ nél tə̄ndā tḭ̄ḭ̄ kə̄ loo gə̄ tə́ beē.

⁵ Adə̄ ndɔ̄ gān̄g sarya tə́ anī ngé kem ndul gə̄ a asən̄ ra dɔɔ́ aĺ ō, ngé rāā majaĺ gə̄ a asən̄ kudə loo kán̄ naā yā de kə́ súmūú gə̄ tə́ aĺ ō.

⁶ Tɔdɔ̄ Kɔ́ɔ̄ɓē ger̄ róbə yā de kə́ súmūú gə̄. Banī róbə yā ngé kem ndul gə̄ i róbə́ kə́ ta to siriri.