OJEE 8 - Bibəl ta Sar̄

Nge rāā yá̰á̰ kə́ majaĺ a ndíbə̄ horən

¹ Ī-kɔ̄ríī tōw̄ gajə batə̄ yāsí gə̄ ī-tāāiń de gə̄. Yá̰á̰ kə́ to kum kaȳ aĺ a reē kə̄ dɔ ɓē yā Kɔ́ɔ̄ɓē tə́ tītə̄ kə̄rō kə́ a jə̄ngā beé. Kɔ́ɔ̄ɓē əda na: Nin̄-ɓōlə́n̄ gidə madə̄ naā yāḿ aĺ ō, ran̄ dɔ yá̰á̰ ń m̄-ndóōdə́ ní tə́ aĺ ō. mbātə́n̄ yá̰a̰ gə̄ ń m-ɔ́jə́də́ ní ō.

² Nin̄ əgan̄ kɔŕ kə̄ dɔḿ tə́ ədan̄ na: Nə́ɓā yājí, jḭḭ Israel gə̄ jə-gerī!

³ Banī nin̄ mbātə́n̄ yá̰á̰ kə́ majə kɔ̄ɔ́ ō, madə̄ ba̰ā̰də́ gə̄ a ngɔ̄də̄n̄də́ ō.

⁴ Nin̄ əndān̄ mban̄g gə̄, banī i kanjə̄ koō yāḿ mā ō, gə̄rān̄ de kə́ bo gə̄, banī i kanjə̄ kədam̄ mā ō. Nin̄ ɔyn̄ gində̄ arjā̰a̰ yādə́ gə̄ ō, lɔ́r yādə́ gə̄ ō, nōn̄ horoó rāān̄ ɓesə̄ gə̄ tə́. Nge ń noō i ta róbə́ kə́ majə kə́ yā tḭ̄ḭń ta yá̰a̰ malang kɔ̄ɔ́!

⁵ I beé ní, sḭḭ̄ de kə́ Samari gə̄, ī-mbātíī ngōn̄ man̄g lɔ́r yāsí kɔ̄ɔ́! Ī-rāāmī adə̄ wōn̄g rāām̄. Sḭḭ̄ ásiī ndi kanjə̄ rāā yá̰á̰ kə́ gōtə́ aĺ alé. Nge ń noō a to i bátə́ ta kə́ rá?

⁶ Ngōn̄ man̄g yāsí ḭḭ i Israel, i kɔdə̄ kógə̄ḿ n rāān. Ngōn̄ man̄g ní i Nə́ɓā alé! A̰á̰ā̰, ngōn̄ man̄g kə́ Samari a əsō yā tétə̄ rárák kɔ̄ɔ́.

⁷ Dan ń sḭḭ̄ ī-rāāī yá̰á̰ kə́ majaĺ ní, ā ī-ndíbī horən. Gémē kə́ ɔr̄ dɔn aĺ a teē ndujə̄ alé. Ba ré teē ndujə̄ anī, tə̄rā gə̄ a əsan̄ kɔ̄ɔ́.

⁸ Urən̄ Israel kɔ̄ɔ́. Ngɔlaā ní, ni-ndi dan nápar de gə̄ tə́ i tītə̄ yá̰á̰ kógə̄ḿ kə́ gātə̄n gətóo beé.

⁹ Epəraim aw̄ dɔ nang kə̄ Asiri tə́, ni to i tītə̄ kərō kə́ bembeé kə́ a rāā yá̰a̰ i kə kérneé beē. Tá ni-adə̄ yá̰á̰ gíŕ ngé sāān gə̄ tə́ yā kəngeńdə́.

¹⁰ Ni-adə̄ nápar de gə̄ yá̰a̰ karī. Ba ngɔlaā ní, m-ā m̄-ɓoodə́ naā tə́ ō, sḛ́ý laā anī nin̄ a a̰a̰n̄ tápə̄ gír mban̄g kə́ tɔ́gən tɔȳ yā mban̄g gə̄ tə́ ō.

¹¹ Epəraim rāā loo tun̄ yá̰a̰ gə̄ gír i ngá̰ý yā kɔrə̄ń mān̄ dɔ ndū Nə́ɓā yān, banī ni mān̄ dɔ ndū Nə́ɓā i kə ta kūl̄ loo tun̄ yá̰a̰ gə̄ ngeé ń toō.

¹² M-ásə ndang yá̰á̰ kə́ yā rāā gə̄ dūbūú tām̄ yān tə́, banī tām̄ yān tə́ ɓáa a ton̄ i tītə̄ yá̰á̰ kə́ mbā beé.

¹³ Nin̄ ndə̄jə̄mə̄n̄ yá̰á̰ kə́ tun̄ gə̄, i tɔdɔ̄ nin̄ gḛyn̄ kəsa dā̰. Banī mā Kɔ́ɔ̄ɓē m̄-ndigə yá̰a̰ tun̄ yādə́ gə̄ alé. Ngɔlaā ní, a əga kemḿ dɔ yá̰a̰ rāādə́ gə̄ kə́ gōtə́ aĺ gə̄ tə́, m-ā m̄-rāādə́ yá̰á̰ kə́ tōr̄ najə̄ mān̄ ń nin̄ mānə̄n̄ dɔ ndūḿ gə̄ ní tə́. I gáŕ kadə̄ nin̄ a télən̄ yā kaw̄ gogə́ dɔ nang kə́ Ejiptə tə́.

¹⁴ Israel rāā kújə́ kə́ majə ngá̰ý gə̄ tām̄ yān tə́, banī dɔn ndígə̄naləḿ mā nge rāān kɔ̄kə́. Juda ra yān noó rāā ɓē kə́ ngan̄g gə̄ ngá̰ý. Banī m-ā m-ə́la hor dɔ ɓē yān gə̄ tə́, kadə̄ a o̰o̰ kújə yān kə́ majə gə̄ kɔ̄ɔ́.