OJEE 5 - Bibəl ta Sar̄

Ngé ndóō Israel gə̄ yá̰á̰ kə́ gōtə́ aĺ gə̄

¹ Kɔ́ɔ̄ɓē əda na: Sḭḭ̄ ngé tun̄ yá̰a̰ gə̄, ōōī majə, sḭḭ̄ ngār gə̄ yā Israel gə̄, ī-nēlī mbīsí, ba sḭḭ̄ de kə́ ndogó mbangāá gə̄, ī-teēī mbīsí! Majə kadə̄ ī-gāngī sarya kə́ gōtə́. Ɓá tā banī sḭḭ̄ ə́hɔī de gə̄ kə gūmbūú Misəpa. Sḭḭ̄ ī-selíī réńg nodə́ tə́ dɔ mbal̄ Tabor tə́.

² Nin̄ ndērə̄n̄ bəlo kə́ bo ngá̰ý Sitim. I beé ɓá ní, mā m-ā m-ə́ndádə́ malang.

³ Mā m̄-ger̄ de gə̄ kə́ gír ɓē yā Epəraim tə́ majə ō, yá̰á̰ kə́ Israel aw̄ń kə́ to loo mundə̄ tə́ tām̄ yāḿ tə́ gətóo ō. sḭḭ̄ ī-sə̄lāī Epəraim adə̄ rāā ájə́ba, ba ngɔlaā ɓáa Israel gə̄ malang i de gə̄ kə́ rāān̄də́ adə̄ télən̄ de kə́ yḛr gə̄ kɔ̄ɔ́.

⁴ Yá̰á̰ ń Israel gə̄ rāān̄ ní, adə̄də́ ta róbə́ tél reē gogə́ rɔ̄ Nə́ɓā yādə́ tə́ alé. A̰á̰ā̰, néĺ ájə́ba kógə̄ḿ əla dandə́ tə́ ō, nin̄ gerə̄n̄ Kɔ́ɔ̄ɓē aĺ ō.

⁵ Kɔjə rɔ̄ yā Israel əda najə̄ dɔn tə́. Israel nin̄ kə Epəraim əsōn̄ i najə̄ yá̰a̰ rāādə́ kə́ gōtə́ aĺ tə́. Juda əsō naā tə́ sedə́ tītə̄ yādə́ ō.

⁶ Nin̄ sāān̄ Kɔ́ɔ̄ɓē i kə batə̄ yādə́ gə̄ ō, man̄g yādə́ gə̄ ō ń aw̄n̄ yā tɔ̄l̄ ba ndējə̄ ní. Banī nin̄ a əngenən̄ alé, tɔdɔ̄ ni əya̰də́ ba aw̄ sa̰y kɔ̄ɔ́.

⁷ Nin̄ ran̄ dɔ ndūdə́ tə́ kə Kɔ́ɔ̄ɓēé alé, ojən̄ ngáń kə́ loo kaya tə́ gə̄. Ngɔlaā ní, asə nāā kógə̄ḿ anī, a nujən̄ ɓē yādə́ kɔ̄ɔ́.

Epəraim nin̄ kə Juda rɔ̄ɔ̄n̄ naā

⁸ Kɔ́ɔ̄ɓē əda na: Ī-kɔ̄ríī tōw̄ gajə batə̄ kem ɓē kə́ Gibea tə́, ī-kɔ̄ríī bərúnjə kem ɓē kə́ Rama tə́! Ī-tāāī de kə́ Bet Aben gə̄. Sḭḭ̄ de kə́ gír ɓē yā Benjamḛ tə́ gə̄, madə̄ ba̰ā̰ a rə̄ngō rɔ̄n i gidəsí tə́ n a ənīńsí rɔ̄ɔ̄ ní.

⁹ Ndɔ̄ ń m-ā m-ə́ndań de gə̄ kə́ gír ɓē yā Epəraim tə́ ní, loo yādə́ a tél dəla loo. Yá̰á̰ kə́ ɔjə dɔ gír ɓē gə̄ yā Israel ń m-ə́da najə̄n kété no tə́ beé ní, i yá̰á̰ kə́ a rāā yá̰a̰ rɔ̄kum.

¹⁰ Ngār kə́ Juda tə́ gə̄ a rāān̄ i hál de kə́ ngé ndɔ́tə̄ kə dɔ nin̄ ndɔr̄ yādə́ gēé. Banī m-ā m̄-ɔ̄r̄ man̄ wōn̄g yāḿ dɔdə́ tə́.

¹¹ Yá̰a̰ rāā kə́ gōtə́ aĺ rējə̄ Epəraim kɔ̄ɔ́. De gə̄ ɓōlə́n̄ gidə yá̰a̰ yān gə̄ alé, i tām̄ ni gḛy ngɔ̄də̄ gō nél.

¹² I beé ɓá ní, mā m-ā m̄-to i tītə̄ do kə́ kumən rúu beé tām̄ yā Epəraim tə́, tītə̄ do kə́ edə̄ aĺ beē tām̄ yā Juda gə̄ tə́.

¹³ Epəraim ger̄ kadə̄ ni i mo̰y ō, Juda ger̄ kadə̄ ni-ənge do ō. Loo ń noō tə́ Epəraim tūr̄ rɔ̄n kə̄ rɔ̄ Asiri tə́, ni-əla de gə̄ rɔ̄ mban̄g kə́ bo kə́ ɓē ngeé ń noō tə́. Banī mban̄g ní asə rāā kadə̄ rɔ̄sí ngáā aĺ ō, asə rāā kadə̄ do yāsí edə̄ aĺ ō.

¹⁴ Tɔdɔ̄ i mā Kɔ́ɔ̄ɓē n m-ə̄nī Epəraim rɔ̄ɔ̄ tītə̄ ɓɔl beé ní ō, m̄-rɔ̄ɔ̄ Juda tītə̄ balsáa ɓɔl beé ní ō. I mā n m-ā m̄-rə́yā̰sí naā tə́ ní. Gō tə́ anī, m-ā m-úńsí yā kaw̄ sesí tītə̄ batə̄ beé ō, de kə́ yā taāsí jīḿ tə́ a gətóo ō.

Epəraim nin̄ kə Juda tél reēn̄ rɔ̄ Nə́ɓā tə́

¹⁵ Mā Kɔ́ɔ̄ɓē m-ɔ́tə m-āw̄, m-ā m̄-tél yā kaw̄ gogə́ ɓēé, bátə́ kadə̄ nin̄ gerə̄n̄ yá̰a̰ rāādə́ kə́ gōtə́ aĺ ba tūrə̄n̄ rɔ̄də́ kə̄ rɔ̄ḿ tə́. Dan ń nin̄ a ndin̄ dan wur kɔl tə́ anī, a sāāmə̄n̄.