OJEE 14 - Bibəl ta Sar̄

¹ De kə́ Samari gə̄ a əgān̄ kə̄rā yá̰a̰ rāādə́ kə́ gōtə́ aĺ gə̄, tɔdɔ̄ nin̄ mbātə́n̄ najə̄ gō Nə́ɓā yādə́ tə́. Nin̄ a oyn̄ ta rɔ̄ɔ̄ tə́ ō, a rējə̄n̄ ngáń kásə̄ yādə́ gə̄ ō, a njarən̄ kem dəyá̰ yādə́ gə̄ kə́ ndānə̄n̄ ngán gə̄ ō.

Gír de kə́ ngé ra dɔ ndūdə́ tə́ aĺ gə̄ əngen̄ rɔ̄ ngáā

² Israel, ī-tél ī-reē rɔ̄ Kɔ́ɔ̄ɓē Nə́ɓā yāí tə́. I yá̰a̰ rāāī kə́ gōtə́ aĺ rāāī adə̄ ə̄sō ní.

³ Ī-tél ī-reēī rɔ̄ Kɔ́ɔ̄ɓē tə́ kə najə̄ gə̄ ń toō: Ī-mā̰ȳ rɔ̄í dɔ yá̰a̰ rāājí kə́ gōtə́ aĺ gə̄ tə́ ō, ī-taā yá̰á̰ kə́ majə ń jə-ndējī ní ō. J-a jə-ndējī najə̄ kə́ tají tə́ kum gotə man̄g kə́ bəra kə́ tun̄ gə̄.

⁴ Dɔ nang kə́ Asiri asə kajəjí alé. J-a j-ḭḭ gidə sə́nda rɔ̄ɔ̄ gə̄ tə́ to̰ alé. Yá̰á̰ kə́ tɔ́sə̄ kum gotə yá̰a̰ gə̄ ń jḭḭ kɔ́ gə̄ jə-tɔ́sə̄ kə jījí ní, j-a jə-ɓāŕdə́ na i Nə́ɓā yājí to̰ alé. Tɔdɔ̄ i ḭ̄ ngóy n á̰a̰ kum tō ndoō yā ngán hal gə̄ ní.

⁵ Kɔ́ɔ̄ɓē əda na: Mo̰y kəra dɔ ndū tə́ aĺ ń rāā Israel ní, m-ā m̄-tɔ̄l̄ kɔ̄ɔ́ dɔn tə́. M-ā m̄-tárən kə kem kə́ majaá, tɔdɔ̄ wōn̄g rāām̄ seneé to̰ alé.

⁶ M-ā m̄-to tītə̄ tal kə́ dəloí beē tām̄ yā Israel tə́, ni a hútə̄ tītə̄ ndə́ja lis beé, ni a tə́la ngəran nang tə́ tītə̄ yā kāgə̄ gə̄ kə́ Liban tə́ beē.

⁷ Ta jīn gə̄ a alən̄ ō, ni a majə tītə̄ kāgə̄ olibə beé ō, sēēn a otə majə tītə̄ sēē ku kāgə̄ gə̄ kə́ Liban tə́ beē ō.

⁸ De gə̄ kə́ Israel tə́ a télən̄ yā reē ndi ndílə́ḿ tə́. Nin̄ a ndɔrə̄n̄ gémē gogə́ ō, a hútə̄n̄ tītə̄ kāgə̄ nduú beē ō, rīdə́ a ɓār̄ ngá̰ý tītə̄ yā kasə nduú kə́ Liban tə́ beē ō.

⁹ Epəraim, yá̰á̰ kə́ ɓoojí naā tə́, mā ō, nə́ɓā kə́ rɔ̄kum aĺ gə̄ ō to nuú ɓáý a? Mā m̄-tūrī najə̄ tə́ ō, m-ə̄ndā kumḿ gōí tə́ ō. Mā m̄-to tītə̄ kāgə̄ sipəres beé, ni i kāgə̄ kə́ mbīn to mbōl̄ nduju ngándáńg. Kōō yāí gə̄ ń ī-sāādə́ kɔ̄ɔ́ ní, i mā n m-ādī ní.

¹⁰ Deē ń kumən edə̄ ní, a ger̄ kum yá̰a̰ malang ń i kə́ kəda laā ní. De kə́ asə ger̄ kum yá̰a̰, a ger̄ kum yá̰a̰ gə̄ ní. A̰á̰ā̰, gō róbə gə̄ yā Kɔ́ɔ̄ɓē i gō róbə́ gə̄ kə́ ran̄ súmūú. Ngé koō tan gə̄ a njə̄rān̄ dɔ róbə gə̄ ní tə́, ba ngé mbātə́ tan gə̄ a ran̄ súmūú alé, adə̄ a əsōn̄.