OJEE 13 - Bibəl ta Sar̄

Gír deē kógə̄ḿ gə̄ kə́ əsōn̄ wōn̄g ta Nə́ɓā tə́ oyn̄

¹ Dan ń Epəraim a ɔrə̄ń najə̄ ní, ɓōĺ rāā de gə̄ malang adə̄ ndewn̄. Kété ní, loo yān kə́ Israel tə́ i loo kə́ bo ngá̰ý. Banī nəkɔ́ rāā adə̄ sarya əhɔn, tām̄ ni rāā ɓesə̄ Baal ō, oy najə̄n tə́ ō.

² Ba ɓōólaā Epəraim gə̄ na̰yn̄ kə̄ loo rāā yá̰á̰ kə́ majaĺ tə́ ɓáý: Nin̄ nōōn̄ gində̄ rāān̄ kum gotə yá̰a̰ gə̄ tə́. Nin̄ rāān̄ nə́ɓā kə́ rɔ̄kum aĺ gə̄ kə gində̄ arjā̰a̰ yādə́ ō, kə jīī ger̄ yá̰a̰ yādə́ ō. I kɔdə̄ gə̄ n rāān̄ yá̰a̰ gə̄ ní, banī nin̄ ədan̄ na: Ī-ndējīdə́ yá̰á̰ kə́ tun̄ gə̄! Deē ndul gə̄ əhɔn̄ ngán man̄g gə̄ ɓirə̄n̄də́ dagə kə̄ rɔ̄də́ tə́ wa!

³ I tām̄ najə̄ noō tə́ n nin̄ a ton̄ tītə̄ kil̄ man̄ kə́ dəloí ní. A ton̄ tītə̄ man̄ kə́ tə́sō kok kok kə́ iī láẃ kɔ̄ɔ́ beē. A ton̄ tītə̄ mu kə́ nél un loo kənda kōō gémē tə́ aw̄ń sa̰y kɔ̄ɔ́ beē. A ton̄ tītə̄ sa hor kə́ teē ta bəlo kógə̄ḿ tə́ beē.

⁴ Ɓá tā ba Israel, mā i Kɔ́ɔ̄ɓē Nə́ɓā yāí, əla gír i ndɔ̄ ń ī-teēń kɔ̄ɔ́ kem ɓē kə́ Ejiptə tə́ ní. Ḭ̄ ī-ger̄ Nə́ɓā kə́ rang alé ba i mā ngóy. Nge kajə de kə́ rang gətóo ba i mā ngóy.

⁵ Mā m̄-gerī i dəla loo tə́, dɔ nang kə́ loo tū tə́ i kə́ tutə tə́.

⁶ M-ɔ́riī ta róbə m-āw̄ seí ko̰ó̰ ō, ə́sá yá̰a̰ adə̄ tɔ̄l̄ ɓōí ō. Ba dan ń ī-ndān̄ anī, ɔ́jə rɔ̄í ō, dɔí ndígə̄naləḿ kɔ̄ɔ́ ō.

⁷ Loo ń noō tə́ m̄-tél m̄-to i tītə̄ ɓɔl beé tām̄ yāsí tə́, m̄-to i tītə̄ kagə kə́ dɔ róbə́ tə́ kə́ ndi dɔ rɔ̄n tə́ yā kənī rɔ̄ɔ̄ beé.

⁸ m̄-teē dɔsí tə́ i tītə̄ dā̰ úrsə. kə́ deē ɔy ngánən gə̄ kɔ̄ɔ́ beē. m̄-rə́yā̰ ngɔgərɔsí naā tə́. M-ə́sásí tītə̄ ɓɔl kə́ dəyá̰ kə́ a əsa yá̰a̰ beé ō, dā̰ kə́ bembeé gə̄ a gángə̄n̄sí naā tə́ bét bét ō.

⁹ Ngɔlaā ní, Israel, ḭ̄ i kə́ nujiīn̄ sák sák kɔ̄ɔ́! Kété ní mə̄kɔ́ kə kérə́ḿ m-ásə dḭḭ̄.

¹⁰ I beé ní, mban̄g yāí ń kadə̄ ajiī ní ni i rá? Ba kem ɓē yāí gə̄ tə́ malang ní, ngār yāí gə̄ i rá? Kété ní ə́dam̄ na kə m-ādī mban̄g kógə̄ḿ ō, ngār gə̄ ō.

¹¹ Loo ń noō tə́ ní m-ādī mban̄g gə̄, tɔdɔ̄ wōn̄g rāām̄ seí. Ba m̄-tél m̄-taādə́ kɔ̄ɔ́, tām̄ wōn̄g rāām̄ ngá̰ý.

¹² Yá̰á̰ kə́ ɔjə kadə̄ Epəraim rāā yá̰á̰ kə́ gōtə́ aĺ ní, i kə́ ngɔ̄m̄ majə ō, nge kə́ ɔjə kadə̄ ni mān̄ dɔ ndū Nə́ɓā ní, to i loo kə́ yá̰a̰ a ɔdə rɔ̄ tū tə́ aĺ tə́ ō.

¹³ Kə́ tām̄ yān ni tə́ ɓáa, i kum mbang kə́ tām̄ yā ko̰y kə́ tītə̄ ko̰y kə́ ndɔ̄ kojə ngōn̄ tə́ beē. Banī Epəraim i ngōn̄ kógə̄ḿ kə́ kum kedə̄ yān gətóo. Ni-mbātə́ teē kem kó̰o̰n tə́ kɔ̄ɔ́.

¹⁴ Ba mā Kɔ́ɔ̄ɓē ní, i kadə̄ kə m-ɔ̄rən kɔ̄ɔ́ gíŕ tɔ́gə yā loo kə́ ɓádá tə́ a? I kadə̄ kə m-ájən kɔ̄ɔ́ ta yo tə́ a? Yo, yá̰a̰ rɔ̄ɔ̄ yāí i rá? Yo, tɔ́gí ń kadə̄ ī-tɔ̄ləń deē ní i rá? Kumḿ a o̰o̰m̄ tām̄ yā Epəraim tə́ alé.

¹⁵ Dan ń Epəraim tɔgə dan ngákó̰o̰n gə̄ tə́ anī, nél kə́ dūn̄ ɓē tə́ reē, néĺ ní ḭḭ i dəla loo tə́. I mā Kɔ́ɔ̄ɓē n m-ə́la seneé ní. Loo ń noō tə́ ní, loo gə̄ ń man̄ gə̄ a əɓan̄ tū tə́ ní, man̄ kə́ tū tə́ gə̄ gətóon̄ kɔ̄ɔ́ ō, kem bəlo man̄ gə̄ tutən̄ kɔ̄ɔ́ ō. Nél un yá̰a̰ kənge aw̄ń kɔ̄ɔ́, ni-ɔy yá̰a̰ malang kə́ gātə̄n i ngá̰ý aw̄ń kɔ̄ɔ́.