OJEE 10 - Bibəl ta Sar̄

Gír rāā kəla kadə̄ Nə́ɓā ō, gír ko̰o̰ ɓē yā mban̄g ō, gān̄g

¹ Kété ní Israel i kāgə̄ nduú kə́ an̄ ngá̰ý. Dan ń ni an̄ ngá̰ý anī, ni-rāā loo tun̄ yá̰a̰ gə̄ ngá̰ý ō. Dan ń ɓē yān ənge yá̰á̰ ngá̰ý anī, mbal̄ yān kə́ kudə nang tə́ kə́ yā ɓōĺ gidə gə̄ majən̄ ngá̰ý ō.

² Israel gə̄ i de kə́ rɔ̄kum aĺ gə̄. Ngɔlaā ní, nin̄ a əgān̄ kə̄rān: Kɔ́ɔ̄ɓē nəkɔ́ a tɔ̄ɔ̄ loo tun̄ yá̰a̰ yādə́ gə̄ kɔ̄ɔ́, ni a nujə mbal̄ kə́ kudə nang tə́ kə́ yā ɓōĺ gidə yādə́ gə̄ kɔ̄ɔ́.

³ Ngɔlaā nin̄ ədan̄ na: Jə-ɓōlíī ndíĺ Kɔ́ɔ̄ɓē alé. I tām̄ najə̄ ń noō tə́ n j-əngeīń mban̄g aĺ ní. Ba ɓōólaā ní, yá̰á̰ ń mban̄g a asə rāā tām̄ yājí tə́ ní i rí?

⁴ Nin̄ ɔrə̄n̄ najə̄ ngá̰ý ō, túbən̄ túbə́ kə́ rɔ̄kum aĺ gə̄ ō, əndān̄ jīdə́ gír makətūbə̄ gə̄ kə́ nin̄ ənīn̄ń ndūdə́ adə̄n̄ naā tə́ ō. Banī ɓōĺ gidə yá̰á̰ kə́ súmūú to i tītə̄ mu kə́ a tɔ̄l̄ de kə́ əɓa kem ndɔrɔ́ beē tām̄ yādə́ tə́.

⁵ De kə́ Samari gə̄ ɓōlə́n̄ najə̄ yā ngōn̄ man̄g lɔ́ŕ kə́ Bet Aben tə́. Gír deē yān gə̄ ō, ngé tun̄ yá̰a̰ yān gə̄ ō, rāān̄ yon. Nin̄ asən̄ ndām̄ ndām̄ rɔ̄nel̄ majə, najə̄ yā majə kə́ ni majə ka̰ā̰ tə́. Majə yān ní gətóo kɔ̄ɔ́ ngɔlaā!

⁶ A unən̄ ngōn̄ man̄g yā kaw̄ seneé dɔ nang kə́ Asiri tə́ ō. A adə̄n̄ mban̄g kə́ bo kə́ dɔ nang ngeé ń noō tə́ ngōn̄ man̄g ní kadə̄ karī tə́. A télən̄ kə Epəraim kə̄ nang tə́, a̰á̰ā̰, rɔ̄ Israel a sɔlə̄n najə̄ yā yá̰a̰ gə̄ ń ni núm̄ rāā tə́ ní.

⁷ Gír yā Samari ngān̄g kɔ̄ɔ́. Mban̄g yān to i tītə̄ gūrū kāgə̄ kə́ ḭḭ kal dɔ man̄ tə́ beē.

⁸ A nujən̄ loo ndɔ̄ȳ gə̄ kɔ̄ɔ́, tɔdɔ̄ Israel mān̄ i dɔ ndū Nə́ɓā n rāańdə́ ní. Túpə kōn̄ gə̄ kə túpə ngar̄ gə̄ a alə̄n̄ dɔ loo tun̄ yá̰a̰ yādə́ gə̄ tə́. De kə́ Samari gə̄ a ədan̄ mbal̄ bo gə̄ na: Ī-ɓɔ̄ɔ̄ījí kɔ̄ɔ́! Nin̄ a ədan̄ ngán mbal̄ gə̄ na: Ī-tə́sōī dɔjí tə́!

Israel a ndíbə̄ hor yá̰á̰ ń ni-rāā ní

⁹ Əla gír dɔ yá̰á̰ kə́ majaĺ ngá̰ý kə́ Gibea tə́ ní, Israel, ī-mān̄ dɔ ndū Nə́ɓā! I gōtə́ ngá̰ý kadə̄ rɔ̄ɔ̄ ugə̄ dɔ ngé rāā majaĺ gə̄ kə́ Gibea tə́ ń noō.

¹⁰ Kɔ́ɔ̄ɓē əda na: M-ā m̄-reē yā kəndadə́. Gír de gə̄ a ɔsən̄ dɔdə́ naā tə́ yā rɔ̄ɔ̄də́, a əndan̄də́ najə̄ yá̰a̰ rāādə́ kə́ gōtə́ aĺ ń gír i jōó ní tə́.

¹¹ Epəraim i duĺ man̄g kə́ ndóōnən̄ yá̰a̰ majə, nelə̄n səɓā kōō gémē ngá̰ý. Mā tā a dan ń m-á̰á̰ míndən kə́ majə ngá̰ý ní, m̄-ndigə kənī yá̰á̰ míndən tə́ yā rāāń kəla: Juda a ndɔr̄, ba Israel a tɔ̄ɔ̄ nán̄g ta kɔsə kə yá̰a̰ jɔ̄r̄yɔ̄ nán̄g ta kɔsɔɔ́.

¹² Ré yá̰á̰ ń ī-dubī ní i yá̰á̰ kə́ gōtə́ anī, yá̰á̰ ń ā ə́jaī ní, i kem majə. Ī-tə́gāī loo ndɔr̄ kə́ kijə tām̄ yāsí tə́. I kum mbang sāāḿ mā Kɔ́ɔ̄ɓē n toó, tá yā ngóoń kadə̄ m̄-reē m̄-rāā man̄ yá̰á̰ kə́ gōtə́ kadə̄ edə dɔsí tə́.

¹³ Banī sḭḭ̄ ī-ndɔrī i kem ndul, yá̰á̰ ń ə́jaī ní, i yá̰á̰ kə́ majaĺ ō, ə́saī i kan̄ sor̄ ō. Israel, ḭ̄ ə̄ndā kemií i dɔ tɔ́gí īkɔ́ tə́, i dɔ ngé rɔ̄ɔ̄ yāí gə̄ kə́ nin̄ i ngá̰ý tə́.

¹⁴ I tām̄ najə̄ ń noō tə́ n rɔ̄ɔ̄ a təngā dan gír deē yāí gə̄ tə́ ō, a nujən̄ ɓē yāí kə́ ngan̄g gə̄ malang kɔ̄ɔ́ ō ní. Nin̄ a ton̄ tītə̄ Bet Arbel. Dan ń mban̄g Salman ənī ɓē ń toō rɔ̄ɔ̄ ní, ni rējə̄ kó̰ó̰ ngán gə̄ ō, ngáńdə́ gə̄ ō.

¹⁵ Israel gə̄, yá̰á̰ ń m-ā m̄-rāā sesí ní n noó, tɔdɔ̄ kemsí ndul ngá̰ý. Dan ń mbang əɓa anī, gír yā mban̄g kə́ Israel tə́ a gān̄g kɔ̄ɔ́. Dan ń loo a rāā yā tīī ní anī, gír yā mban̄g kə́ Israel a gān̄g kɔ̄ɔ́.