OJEE 1 - Bibəl ta Sar̄

¹ Najə̄ ń Kɔ́ɔ̄ɓē əda Ojee kə́ ngōn̄ Beri, dan ń Jeroboam kə́ ngōn̄ Joas i mban̄g kə́ Israel tə́ ní n toó. Dan ngeé ń noō tə́ ní, Ojias ō, Yotam ō, Akaj ō, Ejekias ō, nin̄ i mban̄g gə̄ kə́ Juda.

Kojə yā nge koō ta ō, najə̄ kə́ ta kəga dɔ ń Nə́ɓā ɔr̄ ní ō

² Ta kəla gír najə̄ ń Kɔ́ɔ̄ɓē əda gír deē yān gə̄ kə ta kūl̄ Ojee ní n toó. Ni-əda Ojee na: Āw̄ ī-taā dəyá̰ kə́ nge rāā ájə́ba gíŕ kújə ɓesēé. Ngán gə̄ ń ni a ojə yā kadī ní, i ngán dəyá̰ kə́ nge rāā ájə́ba. Tɔdɔ̄ de kə́ kem ɓē ń toō tə́ gə̄ rāān̄ ájə́ba, tām̄ nin̄ rɔyn̄ nə́ɓā kə́ rang gə̄ kanjə̄ kadə̄ i mā Kɔ́ɔ̄ɓē.

³ Loo ń noō tə́ Ojee aw̄ taā Gomer kə́ ngōn̄ Dibəlaim. Dəyá̰ ní ojə ngōn̄ kə́ dəngam kógə̄ḿ adə̄n.

⁴ Anī Kɔ́ɔ̄ɓē əda Ojee na kə əndā rīn na i Isreel, tɔdɔ̄ sḛ́ý laā anī, m-ā m̄ rɔ̄ɔ̄ kə kojə yā mban̄g Yehu najə̄ yā mósə́ ń ɓōkə́n̄ nang tə́ wól loo kə́ Jisreel tə́ ní. M-ā m̄-nujə ko̰o̰ ɓē yā mban̄g kə́ dɔ nang kə́ Israel tə́ kɔ̄ɔ́.

⁵ Ndɔ̄ ń noō tə́ ní, m-ā m̄-tetə ga̰ gərā kə́ Israel tə́ kɔ̄ɔ́ wól loo kə́ Jisreel tə́.

⁶ Gomer ndān̄ ngōn̄ ɓáý to̰ ba ojə ngōn̄ kógə̄ḿ kə́ dəyá̰. Anī Kɔ́ɔ̄ɓē əda Ojee na kə əndā rī ngōn̄ ní na i Loo Ruhama ń kumən na i tárəm̄ alé ní. Tɔdɔ̄ m-ā m̄-ɔ́jə́ tár kə̄ ndágá tām̄ yā de gə̄ kə́ Israel tə́ to̰ alé, m-ā m̄-táŕdə́ to̰ aĺ i kə́ bátə́ gə̄ tə́.

⁷ Banī m-ā m̄-tár de kə́ Juda gə̄ ngándáńg. Mā Kɔ́ɔ̄ɓē Nə́ɓā yādə́ m-ā m-ájə́də́, ba i kanjə̄ ga̰ gərā ō, kaskar ō, gotə yá̰a̰ rɔ̄ɔ̄ kə́ rang gə̄ ō, kanjə̄ sə́nda gə̄ ō, ngé kal̄ sə́nda gə̄ ō.

⁸ Gomer ɔr̄ Tarəmale ta mba tə́. Gō tə́ anī ni ndān̄ ngōn̄ ɓáý to̰, ba ojə ngōn̄ kə́ dəngam kə́ rang.

⁹ Anī Kɔ́ɔ̄ɓē əda Ojee na kə əndā rī ngōn̄ ní na i Loo Ami ń kumən na i gír deē yāḿ gə̄ aĺ ní. Tɔdɔ̄ sḭḭ̄ Israel gə̄, sḭḭ̄ i gír deē yāḿ gə̄ to̰ alé ō, mā i yá̰á̰ kógə̄ḿ tām̄ yāsí to̰ aĺ ō.