NŌŌ RƆ̄ 4 - Bibəl ta Sar̄

Yá̰á̰ gə̄ ń rāān̄ yá̰a̰ dan ń gīrə̄n̄neé gidə Jerusalem ní

¹ I rí n rāā yá̰a̰! Lɔ́r ń i yá̰á̰ kə́ ndə́lē pir pir ō, i gində̄ kə́ majə páráńg ō ní, kumən oy a? I rí n rāā yá̰á̰ á mbal̄ kə́ táĺ gə̄ ton̄ kógə̄ḿ kógə̄ḿ kə gō kadə̄ róbó ní?

² Ngán kə́ Siyo̰ gə̄ majən̄ ngá̰ý ō, gātə̄də́ asə kə yā lɔ́ŕ kə́ unjə̄ njáý njáý ō, ba i ba̰ý tā á rāān̄də́ i jóó nánjə́ ń i yá̰á̰ kə́ kɔdə̄ jóo rāā kə jīneé tə́ ní?

³ Tal̄ gə̄ gə̄gē a, adə̄n̄ ngáńdə́ gə̄ mba adə̄ ilən̄ ō, adə̄n̄də́ yá̰á̰ adə̄ əsan̄ ō. Banī ngōmandə ń toō ń rāā rɔ̄n i gír deē yāḿ gə̄ tə́ ní, kumən o̰o̰n alé, tītə̄ burum kə́ dəla loo tə́ beé.

⁴ Kəndā man̄ rāā ngōn̄ kə́ ta mba tə́ adə̄ ndo̰o̰n labə̄ ngaān tə́. Ngán gə̄ nōōn̄ najə̄ yá̰a̰ kəsa tə́ banī deē sḛ́ý kə́ adə̄də́ gətóo.

⁵ Ngé kəsa yá̰á̰ kə́ majə gə̄ nujən̄ sák sák kɔ̄ɔ́ kum róbə kɔsə gə̄ tə́. Ngé ndi majə ngá̰ý gə̄ ndəlen̄ yá̰a̰ kəsa dɔ bū loo tə́.

⁶ Ngōmandə ń toō ń rāā rɔ̄n i gír deē yāḿ gə̄ tə́ ní, rāā yá̰á̰ kə́ majaĺ ngá̰ý tɔȳ yā Sodom ń rāā yá̰á̰ kə́ gōtə́ aĺ á nujən̄ seneé gidə kógə̄ḿ kanjə̄ kadə̄ jī deē ɔdən ní.

⁷ Deē yān gə̄ ń ɔrə̄n̄ kam̄də́ tām̄ yā Nə́ɓā tə́ ní, unjə̄n̄ unjə̄ njáý njáý tɔȳ néjə ō, ndaan̄ tɔȳ mba ō, kərēn̄ kasə tɔȳ kómbár̄ ō, ta kumdə́ ndə́lē tītə̄ mbal̄ sapir ō.

⁸ nin̄ ndulən̄ tɔȳ sa kə́ gār̄ kújə́ tə́. De gə̄ a̰a̰n̄də́ kum róbó a gerə̄n̄də́ to̰ alé. Ndāŕdə́ labə̄ gidə kə̄ngādə́ ō, tutə kákə́rá tītə̄ kāgə̄ beé ō.

⁹ De gə̄ ń oyn̄ yo kaskar ní, yādə́ i sótə́ tɔȳ yā ngé gə̄ ń oyn̄ yo ɓō á ndəlēn̄ ngandəra najə̄ kōō kə́ gətóo ndɔrɔ́ tə́ ní.

¹⁰ Dəyá̰ gə̄ ń i de gə̄ kə́ kadə̄ kumdə́ o̰o̰də́ ngá̰ý ní ndīrə̄n̄ ngán kemdə́ gə̄ kə jīdə́. Ngáńdə́ gə̄ télən̄ i yá̰a̰ kəsa yādə́, tɔdɔ̄ ngōmandə ń rāā rɔ̄n i gír deē yāḿ gə̄ tə́ ní, əsō tétə̄ rárák kɔ̄ɔ́.

¹¹ Wōn̄g rāā Kɔ́ɔ̄ɓē al̄ naā, adə̄ bə̄gā wōn̄g kə́ ngá̰ý ní dɔ ɓē kə́ Siyo̰ tə́. Ni-əla hor dɔ tə́ adə̄ o̰o̰ gír gisə ɓē.

¹² Dan mban̄g gə̄ ō, de gə̄ malang ń ndin̄ dɔ nang tə́ ō ní, deē kógə̄ḿ kə́ gír̄ kəda na nge rɔ̄ɔ̄, aláa madə̄ ba̰ā̰, na a ənda kem ɓē kə́ Jerusalem yā gān̄g ní gətóo.

¹³ Yá̰á̰ ń noō rāā yá̰a̰ i najə̄ majaĺ yā ngé koō ta yān gə̄ tə́ ō, najə̄ yá̰á̰ kə́ gōtə́ aĺ gə̄ yā ngé tun̄ yá̰a̰ yān gə̄ ń ɓōkə́n̄ mósə de kə́ gōtə́ gə̄ nang tə́ kem ɓēé ní ō.

¹⁴ Nin̄ dáȳn̄ dɔɔ́ tītə̄ ngé kum tɔ̄ɔ̄ gə̄ kum róbə gə̄ tə́. Mósə́ tákə̄də́ adə̄ kūbə̄ yādə́ gē a deē asə kɔdə jīn tə́ alé.

¹⁵ Ré de gə̄ a̰a̰n̄ dɔdə́ kə̄ róbó anī, urən̄ kɔĺ ədan̄ na: Ī-téliī kə̄ gogə́, ī-téliī kə̄ gogə́, ī-lōōī kɔdə́də́ jīsí tə́. Nin̄ a̰ȳn̄ naā ō, dáȳn̄ dɔɔ́ ō. Nápar de gə̄ ədan̄ na: Nin̄ asən̄ ndi ɓē yājí tə́ alé.

¹⁶ Kɔ́ɔ̄ɓē teē kə̄ rɔ̄də́ tə́ anī, tə̄ndān̄ naā tḭ̄ḭ̄n̄ loo gə̄ tə́. Ni gḛy ka̰a̰də́ to̰ alé. Tɔdɔ̄ de gə̄ ɓōlə́n̄ ndíĺ ngé tun̄ yá̰a̰ gə̄ aĺ ō, rɔyn̄ kum kɔɔ̄ gə̄ aĺ ō.

¹⁷ Jḭḭ tā anī, kumjí roō kɔ̄ɔ́ loo ngóō ta de kə́ yā kadə̄ reē dḭḭ̄jí tə́. Jə-nda loo ngɔ̄m̄ loo yājí gə̄ tə́ jə-ngóoń ta reē nápar de kə́ tɔ́gə́də́ asə kajəjí aĺ gə̄.

¹⁸ De gə̄ unən̄ gō tóo njají ngɔ̄də̄n̄neéjí, adə̄ dum̄ kadə̄ j-ugə̄ loo ndijí gə̄ tə́. Gír yājí a gān̄g ngɔr, ndɔ̄jí asə kɔ̄ɔ́. Rɔ̄kum ta ngóy ndɔ̄jí ugə̄.

¹⁹ Ngé rāājí ndoō tə́ gə̄ ɔlən̄ tɔȳ kə̄rō kə́ dɔ rā̰ tə́ gə̄. Njadə́ ra gōjí tə́ dɔ mbal̄ gə̄ tə́, déwn̄ kem dəla loo tə́ yā kəsō sejí.

²⁰ Mban̄g ń Kɔ́ɔ̄ɓē gə̄rān á i nge rāā kadə jə-ndiī kə kumjí ní ō, ni ń j-ɔrī najə̄ yān j-ədaī na: J-a jə-ndiī dan nápar de gə̄ tə́ gír ndílən tə́ ō ní, ni i kem kújə dəngáy yādə́ gə̄ kə́ gíŕ nángāá tə́.

²¹ Ngōmandə kə́ Edom, ī-rāā walya ō ī-rāā rɔ̄nel̄ ō, ḭ̄ ń ī-ndi dɔ nang kə́ Us tə́ ní. Kópə kasə nduú a ɔdə jīí ō, ā ā̰ȳ kadə̄ rāāī ō, ā ī-ró̰ȳ kūbə̄ rɔ̄í tə́ yā njə̄rā gírí karī ō.

²² Ngōmandə kə́ Siyo̰ gír najə̄ kə́ dɔ yá̰á̰ kə́ gōtə́ aĺ yāí gə̄ tə́ ní gān̄g tā. A əhɔnī dɔ gúú tə́ yā kaw̄ seí dɔ nang kə́ rang tə́ to̰ alé. Ba ḭ̄ ngōmandə kə́ Edom, a teēn̄ kə yá̰a̰ rāāí kə́ gōtə́ aĺ gə̄ kə̄ ndágá náḿ náḿ ō, a ənīn̄ gotə kə ta njaá ō.