NŌŌ RƆ̄ 3 - Bibəl ta Sar̄

Yá̰a̰ kə́ tɔȳ dɔ deē mēr̄ kadə̄ deē əndā kemən dɔ Nə́ɓā tə́

¹ Mā i de kə́ ndéy wōn̄g yā Kɔ́ɔ̄ɓē rāām̄ adə̄ kumḿ tō ndoō ngá̰ý.

² Ni-aw̄ seḿ adə̄ m̄-njə̄rā kum loo kə́ risə til nding tə́ banī i kum loo kə́ unjə̄ kow tə́ alé.

³ Ni ɓir̄ jīn əndamə̄ń ba tél əndamə̄ń ɓáý to̰, dəloí bátə́ loo sɔl̄.

⁴ Nujə kə dā̰ḿ ō, kə ndārə́ḿ ō, tétə̄ kə̄ngāḿ gə̄ ō.

⁵ Ni-əndā yá̰á̰ kə́ to wur katə̄ ō, kə́ tó rɔ̄ tōr̄ ō, gīrəń gidəḿ.

⁶ Ni-rāā adə̄ m̄-ndi ɓē loo kə́ risə til tə́ tītə̄ de gə̄ ń oyn̄ i jóó ngá̰ý kɔ̄ɔ́ ní beē.

⁷ Ni əlam̄ loo kógə̄ḿ kə́ m-ásə teē kemeé aĺ tə́. Rāā adə̄ súĺ gə̄ ɔȳmə̄n̄.

⁸ M-ə́ga kɔŕ ngá̰ý ō, m̄-ɓār̄ ɓār̄ kadə̄ dḭḭ̄mə̄n̄ ō, ba ni ɔgə̄ kadə̄ ndɔ̄ȳ yāḿ teē dɔɔ́.

⁹ Əndā mbal̄ kə́ asə tām̄ gə̄ ndogə̄ tə́ gāngəń gír róbə njaḿ ō, rāā adə̄ ta kə̄lá róbə yāḿ gə̄ tə́la naā ō.

¹⁰ Ni-rāā rɔ̄n i dā̰ úrsə kə́ a um̄ loo tə́ ō, ɓɔl kə́ ɓɔ̄ɔ̄ rɔ̄n kem ku loo tə́ ō tām̄ yāḿ tə́.

¹¹ Ni-tə́lam̄ naā tə́ kə́ nja ngáā tə́ adə̄ m̄-ger̄ yá̰á̰ kə́ yā rāā to̰ aĺ ō, m̄-nujə kɔ̄ɔ́ ō.

¹² Ni ndɔ́r̄ gō ga̰ gərā yān ō, serəm̄ tītə̄ yá̰á̰ kə́ yā kur kə kum gərāá ō.

¹³ Túrə̄m̄ kə kum gərā gə̄ kə́ kem ngong yān tə́ adə̄ túdə̄n̄ dūnə̄ḿ tə́ malang.

¹⁴ m̄-tél kur̄ kəgō yā de gə̄ malang ō, yá̰a̰ kənī pā yādə́ kə dɔ ndɔ̄ gə̄ malang ō.

¹⁵ Ni rāām̄ adə̄ wurəḿ atə̄m̄ ngá̰ý ō, adə̄m̄ man̄ mu kə́ atə̄ kárárá adə̄ m-ā̰ȳ ō.

¹⁶ Rāām̄ adə̄ m̄-gájə̄ kɔ̄sə̄ kə ngāngə̄ḿ ō, əlam̄ kum bū tə́ ō.

¹⁷ Ḭ̄ ɔ̄gə̄m̄ loo ndi lɔm adə̄ dɔḿ ndígə̄nal dɔ ndi majə tə́ kɔ̄ɔ́.

¹⁸ M-ə́da na m-ə̄nī kemḿ m-ādə̄ Kɔ́ɔ̄ɓē ō, m-ə̄ndā kemḿ dɔn tə́ ō i kanjə̄ kumən.

¹⁹ Ādə̄ əga kemií dɔ rɔ̄sɔl̄ ń əlan̄ dɔḿ tə́ ní ō, dɔ dáȳ ń m̄-dáȳ dɔɔ́ tə́ ní ō, i tītə̄ yá̰a̰ yḛl de kə́ atə̄ kárá beē.

²⁰ Əga kemḿ mā dɔ tə́ majə adə̄ ángaləḿ nujə sák sák.

²¹ Yá̰á̰ ń m̄-tél m̄-gír̄ dɔ tə́ kemḿ tə́ ō, yá̰á̰ ń m-ā m-ə̄ndā kemḿ dɔ tə́ ō ní n toó:

²² I kem majə yā Kɔ́ɔ̄ɓē kə́ ta ngóyn gətóo. Ni-a̰a̰ kum tō ndoō yā de gə̄ ngándáńg.

²³ Ḭ̄ ə́lá gír rāā kem majə i dəloí kə dɔ ndɔ̄ gə̄ ō, ḭ̄ i de kə́ nge ra dɔ ndūí tə́ ō.

²⁴ M-ə́da kə̄ kemḿ tə́ na yá̰a̰ yāḿ kə sɔɔ̄ dɔḿ i Kɔ́ɔ̄ɓē. I tāmə̄n̄ ń toō tə́ n m-ā m-ə̄ndā kemḿ dɔn tə́ ní.

²⁵ Kɔ́ɔ̄ɓē a rāā kem majə kə deē ń a əndā kemən dɔn tə́ ō, sāān ō ní.

²⁶ Majə kadə̄ deē əndā kemən dɔ kajə yā Kɔ́ɔ̄ɓē tə́ kə tan kə́ mbóó.

²⁷ Majə kadə̄ deē əla gír kəla dɔn gír njúkə tə́ i dan balsáan tə́.

²⁸ Majə kadə̄ deē tél kə̄ gogə́ sḛ́ý ba ndi tan mbóo, tɔdɔ̄ i yá̰á̰ ń Kɔ́ɔ̄ɓē əndā dɔn tə́ ní.

²⁹ Majə kadə̄ deē rūsə́ tan kum bumbə́rú tə́, na majanī Kɔ́ɔ̄ɓē a gír̄ dɔn tə́ ɓáý.

³⁰ Majə kadə̄ əla mbɔ́rən adə̄ deē ń a ənda ní ō, əya̰ rɔ̄n ādə̄ ndū asən ō.

³¹ Tɔdɔ̄ Kɔ́ɔ̄ɓē a mbātə́ de kə́ njɔ́ḿ gə̄ tə́ alé.

³² Ká ré ni-rāā deē adə̄ rɔ̄n tōrə̄n gə̄gē anī, kumən o̰o̰n seneé sɔɔ̄ń kem majə yān kə́ ngá̰ý.

³³ Tɔdɔ̄ ni-əla rɔ̄sɔl̄ dɔ de gə̄ tə́ ō, rāādə́ yá̰á̰ kə́ tōr̄ ō, i kə gō kem ndigə yānneé alé.

³⁴ Dan ń de gə̄ tə́ɓān̄ dəngáý gə̄ malang kə́ kem ɓēé kə njadə́ ní ō,

³⁵ dan ń yá̰á̰ kə́ gōtə́ gətóo mbənā de gə̄ tə́ ta kum Nə́ɓā kə́ dɔɔ́ sa̰y ngá̰ý tə́ ní ō,

³⁶ dan ń gāngə̄n̄ sarya dɔ deē kógə̄ḿ tə́ kə gōó aĺ ō ní, Kɔ́ɔ̄ɓē a̰a̰ aĺ a?

³⁷ I náā n ɔr̄ najə̄ anī, yá̰a̰ rāā yá̰á̰ ní? Kɔ́ɔ̄ɓē i nge ń adə̄ ndūn ní aĺ a?

³⁸ Yá̰á̰ kə tōr̄ gə̄ ō, yá̰á̰ kə́ majə gə̄ ō ní, teēn̄ i ta Nə́ɓā kə́ dɔɔ́ sa̰y ngá̰ý tə́ ní a?

³⁹ De kə́ majaĺ ngá̰ý ba ndi kə kumneé ō, kə dɔn dɔɔ́ ō ní, a nōō rɔ̄n i najə̄ rí tə́?

⁴⁰ J-əndāī ma̰ȳ róbə njə̄rājí gə̄ j-a̰a̰ī majə ba jə-télī kə̄ rɔ̄ Kɔ́ɔ̄ɓē tə́.

⁴¹ Jə-ndɔ̄yī kə ngarā̰ kemjí dan ń j-a j-ɔyiī jījí kə̄ dɔɔ́ kum kə̄ rɔ̄ Nə́ɓā kə́ ndi dɔ rā̰ tə́ ní.

⁴² Jḭḭ̄ i ngé mbātə́ najə̄ gə̄ ō, ngé dɔ ngan̄g gə̄ ō, adə̄ ḭ̄ ī-mā̰ȳ rɔ̄í dɔjí tə́ alé.

⁴³ Ūtə̄ rɔ̄í kem wōn̄g kə́ ngá̰ý tə́ ba ī-rāājí yá̰á̰ kə́ tōr̄ gə̄ ō, ī-tɔ̄l̄jí kanjə̄ kadə̄ kumií o̰o̰ī ō.

⁴⁴ Ūtə̄ rɔ̄í dan kil̄ man̄ tə́ yā kadə̄ ndɔ̄ȳ yājí ɔtə̄ń rɔ̄í tə́ alé.

⁴⁵ Ī-rāājí i dɔ bū loo tə́ ō, yedə̄ tə́ ō, dan gír de gə̄ tə́.

⁴⁶ Madə̄ ba̰ā̰jí gə̄ malang teēn̄ tadə́ ɔrə̄n̄neé najə̄ dɔjí tə́.

⁴⁷ Jə-ɓōĺ ngá̰ý ō, j-udə kem bəlo kə́ lú ngá̰ý tə́ ō, jə-nujə sák sák ō, jə-tétə̄ naā tə́ rárák ō.

⁴⁸ Man̄ kumḿ a̰ȳ tɔdɔ̄ gír deē yāḿ gə̄ ń rāān̄ rɔ̄də́ i dəyá̰ kə́ mandə tə́ ní, nujən̄ kɔ̄ɔ́.

⁴⁹ Kumḿ i kə man̄ nōó kanjə̄ kadə̄ aȳ ō, kanjə̄ kadə̄ dəba ō,

⁵⁰ bátə́ kadə̄ Kɔ́ɔ̄ɓē ń ndi dɔ rā̰ tə́ ní a̰a̰ń yá̰á̰ ń a rāā yá̰á̰ ní.

⁵¹ Kumḿ tōrə̄m̄ ngá̰ý loo ka̰a̰ yá̰á̰ ń a rāā ngáń kə́ dəyá̰ gə̄ malang kə́ kem ɓē yāḿ tə́ ní tə́.

⁵² De gə̄ ń əndāmə̄n̄ ba̰ā̰ kanjə̄ kumən ní,

⁵³ ngɔ̄də̄n̄ gōḿ mer mer tītə̄ loo ndo̰ yel̄ beé. Əlamə̄n̄ kem bəlo yo tə́ kə kumḿ ba mbəren̄ mbal̄ utə̄n̄neé taḿ.

⁵⁴ Man̄ tíbə dɔḿ adə̄ m-ə́da na: Mā i kə́ taḿ tḭ̄ḭ̄ kɔ̄ɔ́.

⁵⁵ Kɔ́ɔ̄ɓē, m̄-to i kem bəlo kə́ lú ngá̰ý tə́ n m-ā m̄-ɓārə́nń rīí.

⁵⁶ Ōō ndūḿ, ī-lōō kutə̄ mbīí ta koō ń m-ɔ́sə pḭ pḭ tə́ ní ō, ta ɓāŕ ń m̄-ɓāríī kadə̄ ī-dḭḭ̄m̄ tə́ ní ō.

⁵⁷ Ndɔ̄ ń m̄-ɓārə́nń rīí tə́ ní, ḭ̄ ī-ndɔ́tə̄ kə̄ ngɔr rɔ̄ḿ tə́ ba ə́da na kə m̄-lōō ɓōĺ.

⁵⁸ Kɔ́ɔ̄ɓē, ɔ̄r̄ najə̄ dɔḿ tə́ ndɔ̄ sarya ń sāān̄ kəndā dɔḿ tə́ ní ō, ájəm̄ ō.

⁵⁹ Kɔ́ɔ̄ɓē, á̰a̰ bám̄ ń a bámə̄mə̄n̄ toó, ī-rāā ādə̄ najə̄ yāḿ udə róbó majə.

⁶⁰ Á̰a̰ ba̰ā̰ malang ń rāān̄ seḿ ní, loo koō ń oōn̄ naā dɔḿ tə́ ní.

⁶¹ Kɔ́ɔ̄ɓē, ōō ndū ń tájə̄mə̄n̄ ní ō, loo koō ń a oōn̄ naā dɔḿ tə́ ní ō.

⁶² Najə̄ ta ngé kənīm̄ rɔ̄ɔ̄ gə̄ asəm̄ nák ō, kɔtə́n̄ najə̄ kə́ dan gān̄g aĺ dɔḿ tə́ kə dɔ ndɔ̄ gə̄.

⁶³ Ndin̄ i nang tə́ a̰á̰a̰ ran̄ i kə njadə́ dɔɔ́ a̰á̰a̰, i rīḿ mā ngóy n i pā kə́ tadə́ tə́ ní.

⁶⁴ Kɔ́ɔ̄ɓē ā ī-rāādə́ ngarā̰ kum yá̰á̰ ń rāān̄ seḿ ní yā kəndań njadə́.

⁶⁵ Ā ī-rāā kadə̄ ndin̄ tītə̄ kə́ rāā mbóó rāādə́ beē, ndɔ̄ĺ yāí a əhɔ gōdə́.

⁶⁶ Kɔ́ɔ̄ɓē, wōn̄g kə́ ngá̰ý a rāāī kadə̄ ā ī-rāādə́ ndoō tə́ ō, ā ī-tɔ̄ldə́ kadə̄ gətóon̄ kɔ̄ɔ́ malang gír dɔ rā̰ yāí tə́.