NGÉ SARYA 8 - Bibəl ta Sar̄

Rɔ̄ de yā Epəraim gə̄ nel̄də́ alé

¹ De yā Epəraim gə̄ ədan̄ Jedeo̰ na: Dan ń ā āw̄ kə̄ rɔ̄ɔ̄ Madian gə̄ tə́ ní ī-ɓāŕjí aĺ i tām̄ rí tə́? Adə̄ tōr̄də́ seneé ngá̰ý.

² Banī Jedeo̰ ədadə́ na: Yá̰á̰ kə́ mā m̄-rāā kə́ əndā gō yāsí tə́ i rí? Kan̄ kāgə̄ nduú ɓur Epəraim majə tɔȳ kan̄ kāgə̄ nduú kəja Abiejer aĺ a?

³ Oreb nin̄ kə Jeb ń i ngār gə̄ kə́ Madian ní Nə́ɓā əladə́ i kem jīsí sḭḭ̄ tə́. Ní yá̰á̰ kə́ mā m̄-rāā kə́ əndā gō yāsí sḭḭ̄ tə́ i rí? Dan ń ni ədadə́ najə̄ ń noō anī wōn̄g kə́ kemdə́ tə́ seneé tetə.

Jedeo̰ i gidə bā Jurdḛ kə́ dām̄ kə́ gír ɓē tə́

⁴ Jedeo̰ nin̄ kə de kə́ ɓú mətá gə̄ ń seneé ní aw̄ teēn̄ bā Jurdḛ. Tɔ́gə́də́ təgā kɔ̄ɔ́, banī na̰yn̄ kə̄ loo ngɔ̄də̄ madə̄ ba̰ā̰də́ gə̄ tə́.

⁵ Aw̄ ugə̄n̄ Sukot tə́ anī Jedeo̰ əda de gə̄ kə́ kem ɓē kə́ Sukot na: m̄-rāāsí ɓɔ́, ādī de gə̄ ń unən̄ gōḿ ní yá̰a̰ kəsa tə́ sḛ́ý na kɔr rāādə́ ngá̰ý. M-ā m̄-ngɔ̄də̄ i gō mban̄g gə̄ kə́ Madian ń i Jeba nin̄ kə Salmuna ní.

⁶ Banī ngār gə̄ kə́ Sukot tél ədanən̄ na: Əhɔ Jeba nin̄ kə Salmuna kem jīí tə́ kɔ̄ɔ́ ɓá á kə j-adə̄ ngé rɔ̄ɔ̄ yāí gə̄ yá̰a̰ kəsa a?

⁷ Jedeo̰ tél ədadə́ na: Majə, ré Kɔ́ɔ̄ɓē əla Jeba nin̄ kə Salmuna kem jīḿ tə́ anī m-ā m-ə́ndásí kə kōn̄ kə́ kem dəla loo tə́ ō, kə kōn̄ ngaraá ō.

⁸ Jedeo̰ ḭḭ noó aw̄ Penuel aw̄ gəde de kə́ kem ɓēé gə̄ yá̰a̰ kəsa ɓáý, anī nin̄ ɔgə̄nən̄ tītə̄ yā de kə́ Sukot gə̄.

⁹ Jedeo̰ əda de kə́ Penuel gə̄ na: Ré m-āw̄ m̄-tetə rɔ̄ɔ̄ ba m̄-tél kə lápə́yaá anī m-ā m̄-tɔ̄ɔ̄ kújə ngɔ̄m̄ ɓē ń toō kɔ̄ɔ́.

¹⁰ Jeba nin̄ kə Salmuna ndin̄ i kem loo ń a ɓārə́n̄ na i Karkor ní tə́ kə ngé rɔ̄ɔ̄ yādə́ kə́ 15 000 gēé. Kutə gotə ngé rɔ̄ɔ̄ gə̄ yā ngáń kə́ gír ɓē tə́ gə̄ ń na̰yn̄ ní n noó. Tām̄ ngé rɔ̄ɔ̄ kə́ 120 000 gə̄ oyn̄ kɔ̄ɔ́.

¹¹ Jedeo̰ un róbə́ ń a ɓārə́n̄ na i róbə yā ngé ndi kem kújə tandā gə̄ tə́ ní. Ré deē ra Noba aláa Yogəboha anī róbə́ ní i kə̄ dām̄ kə́ gír ɓē tə́. Ni-aw̄ ənī ngé rɔ̄ɔ̄ gə̄ ń ɔjən̄ na n-ndin̄ na i loo kə́ yá̰a̰ na a rāādə́ tū tə́ aĺ tə́ ní rɔ̄ɔ̄ ba tetədə́ rɔ̄ɔ̄.

¹² Mban̄g kə́ jōó gə̄ kə́ Madian ń i Jeba nin̄ kə Salmuna ní a̰ȳn̄ naā, banī Jedeo̰ ngɔ̄də̄ əhɔdə́ ō, əla ɓōĺ kə́ ngá̰ý kem ngé rɔ̄ɔ̄ yādə́ gə̄ tə́ malang ō.

¹³ Jedeo̰ ngōn̄ Yoas tél rɔ̄ɔ̄ tə́. Ta télən ní un i róbə́ kə́ Heres ń əta tan kə̄ dɔɔ́ ní.

¹⁴ Ni-əhɔ balsáá kógə̄ḿ kə́ Sukot ba dəjen najə̄. Anī balsáá ní ndang rī ngār gə̄ ō, kum kɔɔ̄ gə̄ ō, kə́ Sukot adə̄n. De gə̄ malang ń balsáá ní ndang rīdə́ ní i deē kutə sīrí gidə i sīrí.

¹⁵ Gō tə́ anī Jedeo̰ aw̄ rɔ̄ de kə́ Sukot gə̄ tə́ ba ədadə́ na: Jeba nin̄ kə Salmuna ń ī-tɔ́sī gātə̄ḿ najə̄ yādə́ tə́ ní nin̄ n toó. Ədaī na ké m-ə́wádə́ kem jīḿ tə́ kɔ̄ɔ́ ɓá áké kə ādī deē yāḿ kə́ kɔr rāādə́ gə̄ yá̰a̰ kəsa wa.

¹⁶ Jedeo̰ əhɔ kum kɔɔ̄ yā de kə́ kem ɓē ní tə́ gə̄ ba tə̄ndādə́ kə ndéy kōn̄ gə̄ kə́ kem dəla loo tə́ ō, kə ndéy kōn̄ ngar̄ gə̄ ō, adə̄ńdə́ kɔjə̄.

¹⁷ Ni-tɔ̄ kújə ngɔ̄m̄ ɓē kə́ Penuel tə́ ō, tɔ̄l̄ dəngam gə̄ kə́ kemeé ō kɔ̄ɔ́.

¹⁸ Gō tə́ anī əda Jeba nin̄ kə Salmuna na: De gə̄ ń ī-tɔ̄līdə́ Tabor ní ton̄ i ba̰ý? Nin̄ tél ədanən̄ na: Ton̄ tītīí. Nin̄ kógə̄ḿ kógə̄ḿ kə dɔdə́ gēé ton̄ tītə̄ ngámban̄g gə̄.

¹⁹ Jedeo̰ ədadə́ na: I ngákó̰ó̰ḿ gə̄, i kem kó̰o̰ madə́ḿ gə̄. Adə̄ tītə̄ ń Kɔ́ɔ̄ɓē ndiń kə kumuú noō, ré ī-tɔ̄līdə́ aĺ anī, m-ā m̄-tɔ̄l̄sí aĺ ō.

²⁰ Gō tə́ anī əda ngōn̄ hágən kə́ dəngam ń rīn na i Yeter ní na: Ḭ́ḭ dɔɔ́ ī-tɔ̄l̄də́. Banī ngōnən ní ɓōĺ adə̄ ɔr kaskar yān alé tɔdɔ̄ na̰y balsáá ɓáý.

²¹ Tā anī Jeba nin̄ kə Salmuna ədan̄ Jedeo̰ na: īkɔ́ ḭ́ḭ dɔɔ́ ī-tɔ̄l̄jí, tɔdɔ̄ náā nəkɔ́ asə rāā kem dəngam i kə gō tɔ́gəneé. Loo ń noō tə́ Jedeo̰ tɔ̄l̄ Jeba nin̄ kə Salmuna, ba ró̰ȳ yá̰á̰ súū rɔ̄ gə̄ ń tə́lan̄ míndə́ jámbal yādə́ gə̄ tə́ ní.

Yá̰a̰ gə̄ ń Jedeo̰ rāā tá oy ní

²² Ngán Israel gə̄ ədan̄ Jedeo̰ na: Ó̰o̰ī ɓē dɔjí tə́ ō, ngōnīí ō, ngōn̄ kaaí ō, tɔdɔ̄ i ḭ̄ n ī-gān̄g dɔjí jī Madian gə̄ tə́ ní.

²³ Anī Jedeo̰ ədadə́ na: Mā ō, ngōnə̄ḿ ō, j-a j-o̰o̰ ɓē dɔsí tə́ alé. I Kɔ́ɔ̄ɓē n a o̰o̰ ɓē dɔsí tə́ ní.

²⁴ Ni-ədadə́ ɓáý to̰ na: Ɓá tā ba m̄-ndigə dəjesí yá̰á̰ kógə̄ḿ, dan yá̰a̰ gə̄ ə́hɔī ta rɔ̄ɔ̄ tə́ ní, úniī nə̄ngá kógə̄ḿ kógə̄ḿ ādə̄mī kə dɔsí gēé. Tɔdɔ̄ Madian gə̄ o̰ō̰n̄ nə̄ngá lɔ́r tītə̄ yā gotə de gə̄ malang kə́ kem dəla loo tə́ gə̄.

²⁵ Ngán Israel gə̄ tél ədan̄ na: A̰á̰ā̰ j-a j-adī. Nin̄ selə́n̄ kūbə̄ nang tə́ ba ɔyn̄ nə̄ngá gə̄ dan yá̰a̰ yādə́ gə̄ ń əhɔn̄ ta rɔ̄ɔ̄ tə́ ní tə́nīn̄ kemeé kógə̄ḿ kógə̄ḿ kə dɔdə́ gēé.

²⁶ Nə̄ngá lɔ́r ń Jedeo̰ dəje ní kɔȳn malang i kəlōo kutə jōó. Ni-ənge yá̰á̰ súū rɔ̄ɔ̄ gə̄ dɔ tə́ ō, yá̰a̰ ta mbī gə̄ ō, kūbə̄ kə́ kərē ning gə̄ ń i kūbə̄ ko̰ō̰ mban̄g gə̄ kə́ Madian ní ō, məde gə̄ ń a súūnəń míndə́ jámbal yādə́ gə̄ ní ō.

²⁷ Jedeo̰ ɔy lɔ́ŕ ní rāā ɓesə̄ kógə̄ḿ tə́ ba udə kem ɓē yān tə́ Opəra. Ngán Israel gə̄ malang ndɔ̄ȳn̄ ɓesə̄ ní, adə̄ tél i gūmbə̄ tām̄ yā Jedeo̰ tə́ ō, gír kojə yān tə́ ō.

²⁸ I beé n Madian gə̄ əngenə̄ń rɔ̄sɔl̄ ta kum ngán Israel gə̄ tə́ ní. Nin̄ ɔrə̄n̄ dɔdə́ to̰ alé. Ɓē tél ndi lɔm kem ɓāl̄ kə́ kutə sɔ́ gə̄ ń Jedeo̰ ndiń kə kumneé tə́ ní.

²⁹ Yerubaal ngōn̄ Yoas tél aw̄ gogə́ ɓēé looneé.

³⁰ Jedeo̰ ojə ngán kə́ dəngam gə̄ i kutə sīrí, tɔdɔ̄ n̄i táā dəyá̰ gə̄ ngá̰ý.

³¹ Də̄yá̰ gidə ndogə̄ yān ń ndi kem ɓē kə́ Sisem tə́ ní ojə ngōn̄ kə́ dəngam adə̄n ō. Jedeo̰ əndā rī ngōn̄ ní na i Abimelek.

³² Jedeo̰ ngōn̄ Yoas tɔgə ɓə́gá ngá̰ý tá kadə̄ oy. Dubə̄nən̄ i kem bāá ɓádə yā bɔbə̄n Yoas tə́, kem ɓē kə́ Opəra yā Abiejer tə́.

³³ Dan ń Jedeo̰ oy kɔ̄ɔ́ ní ngán Israel gə̄ tél ndɔ̄ȳn̄ ɓesə̄ Baal gə̄ ɓáý to̰. Nin̄ rāān̄ Baal Berit i nə́ɓā yādə́ tə́.

³⁴ Ba dɔdə́ ndígə̄nal Kɔ́ɔ̄ɓē Nə́ɓā yādə́ ń gān̄g dɔdə́ jī madə̄ ba̰ā̰də́ gə̄ ń ndin̄ gīrə̄n̄ gidədə́ əlan̄ ta naā tə́ ní kɔ̄ɔ́.

³⁵ Nin̄ rāān̄ kem majə kə de gə̄ kə́ gír kojə yā Yerubaal Jedeo̰ tə́ najə̄ yá̰a̰ malang kə́ majə ń ni-rāā tə́ tām̄ yā ngán Israel gə̄ tə́ ní alé.