NGÉ SARYA 7 - Bibəl ta Sar̄

Jedeo̰ tetə Madian gə̄ rɔ̄ɔ̄

¹ Jedeo̰ ń a ɓāŕnən̄ na i Yerubaal ní ḭḭ dɔɔ́ kə gír looí ɓatə ba əsō róbó kə de gə̄ ń seneé ní. Aw̄ ndin̄ ta kəɓa man̄ Harod tə́. Gérger yā Madian gə̄ i dām̄ mbɔ́r ɓē kə́ ko̰ó̰ tə́ ndágə looó, dām̄ loo ń ngōn̄ mbal̄ kə́ More i tū tə́ ní tə́.

² Kɔ́ɔ̄ɓē əda Jedeo̰ na: De gə̄ ń seí ní nin̄ i ngá̰ý adə̄ m-ā m-ādə̄ a tetən̄ Madian gə̄ rɔ̄ɔ̄ alé na sōgə́ ngán Israel gə̄ ɔjən̄ rɔ̄də́ ədan̄ na i jīdə́ n na ajədə́ ní ō, tūrə̄n̄ gír rī ɓār̄ ń i yāḿ ní kə́ yādə́ tə́ ō.

³ Adə̄ ə̄nī mbēr̄ əda de gə̄ na: Deē ń ɓōĺ rāān adə̄ a ndew ní kə tél aw̄ gogə́ ɓēé. De gə̄ 22 000 dan ngán Israel gə̄ tə́ tél aw̄n̄ ɓēé. Ba gotə de gə̄ ń na̰yn̄ ní i 10 000.

⁴ Kɔ́ɔ̄ɓē əda Jedeo̰ na: De gə̄ ní na̰yn̄ i ɓáý āw̄ sedə́ ta man̄ tə́ ādə̄ m̄-gə̄rā dandə́ m-ādī. Deē ń kadə̄ aw̄ seí ní m-ā m-ə́daī ō, deē ń kadə̄ aw̄ seí aĺ ní m-ā m-ə́daī ō.

⁵ Jedeo̰ aw̄ kə de gēé ta man̄ tə́ anī Kɔ́ɔ̄ɓē ədan na: Deē ń a tə́gā man̄ kə̄ tan tə́ tītə̄ bísə a a̰ȳ man̄ ní ɔrə̄n tayā ō, deē ń a tétə̄ i kejən tá a a̰ȳń man̄ ní ɔ̄rən tayā ō.

⁶ De gə̄ ń tə́gān̄ man̄ kə jīdə́ kə̄ tadə́ tə́ ní nin̄ i ɓú mətá, ba gotə de gə̄ malang tétə̄n̄ i kejədə́ n a̰ȳnəń man̄ ní.

⁷ Kɔ́ɔ̄ɓē əda Jedeo̰ na: M-ā m-ájə́ ngán Israel gə̄ i kə ta kūl̄ de kə́ ɓú mətá gə̄ ń tə́gān̄ man̄ kə̄ tadə́ tə́ ní ō, m-ā m-ə́la Madian gə̄ kem jīí tə́ i kə kūl̄də́ ō. Ba ādə̄ gotə de gə̄ tél aw̄n̄ kógə̄ḿ kógə̄ḿ kə̄ ɓē yādə́ gə̄ tə́.

⁸ Jedeo̰ ngɔ̄m̄ de kə́ ɓú mətá gə̄ ba əya̰ gotə ngán Israel gə̄ adə̄ tél aw̄n̄. Jedeo̰ nin̄ kə de kə́ ɓú mətá gə̄ ní táān̄ jóo yā ngé kaw̄ gə̄ ō, tōw̄ yādə́ gə̄ ō. Gérger yā Jedeo̰ ndi i loo kə́ ḭḭ kə̄ dɔɔ́ tə́, banī gérger yā Madian gə̄ ndi i loo kə́ tél kə̄ nang tə́ tə́ ndágə looó.

⁹ Ndɔ̄ɔ́ ndɔ̄ ń yá̰a̰ gə̄ ń noō rāānəń yá̰á̰ tə́ ní, Kɔ́ɔ̄ɓē əda Jedeo̰ na: Ḭ́ḭ dɔɔ́ āw̄ ə̄nī gérger yā Madian gə̄ rɔ̄ɔ̄, tɔdɔ̄ m-ə́lan kem jīí tə́ kɔ̄ɔ́.

¹⁰ Ba ré ī-ɓōĺ kaw̄ kənīn rɔ̄ɔ̄ anī, āwī tū tə́ sḭḭ̄ kə nge kəla yāí Pura.

¹¹ Ā ōō yá̰á̰ ń a ədan̄ kemeé ní ā ə́ngé tɔ̄gə yā kaw̄ kənīnəń rɔ̄ɔ̄. Jedeo̰ nin̄ kə nge kəla yānneé aw̄ ugə̄n̄ rɔ̄ ngé rɔ̄ɔ̄ gə̄ ń əndān̄də́ kété no gérger tə́ kadə̄ ngɔ̄mə̄n̄ loo ní.

¹² Madian gə̄ ō, Amalek gə̄ ō, ngáń kə́ gír ɓē tə́ ō, ton̄ ta kaw̄ kə̄ nú ngágə looó tītə̄ yim̄ gə̄ beé. Deē asə tə́da kutə jámbal yādə́ gə̄ alé, tām̄ kutədə́ i ngá̰ý tītə̄ nán̄g ngárə̄ḿnjēý kə́ ta bā bo tə́ beē.

¹³ Dan ń Jedeo̰ reē ugə̄ anī deē kógə̄ḿ ndi a ɔjə i madə̄n gotə nī kə́ rāān. Deē ní əda madə̄n na: Nī kógə̄ḿ rāām̄. M-á̰á̰ mápá ɔrjə ndūburu kem gérger yājí tə́ reē ənda kadə̄ kújə tandā kógə̄ḿ adə̄ teē əsō nujə sák sák kɔ̄ɔ́.

¹⁴ Madə̄n ní tél ədan na: Nge ń noō i kaskar yā Jedeo̰ ngōn̄ Yoas ń i de kə́ Israel tə́ ní ngóy ō ba i rí? Nə́ɓā əla Madian gə̄ kə gérger yādə́ malang kem jīn tə́ kɔ̄ɔ́ ɓá.

¹⁵ Dan ń Jedeo̰ oō nī ní ō, kumən ō anī, əsō kə̄ nang tə́ rɔȳ Nə́ɓā ba tél aw̄ gogə́ gérger yā ngán Israel gə̄ tə́ aw̄ əda na: Ḭ́ḭḭ̄ dɔɔ́. Tɔdɔ̄ Kɔ́ɔ̄ɓē əla gérger yā Madian gə̄ kem jīsí tə́ kɔ̄ɔ́ ɓá.

¹⁶ Jedeo̰ kə̄gə̄ de kə́ ɓú mətá gə̄ ní gír loo mətá. Adə̄də́ tōw̄ gə̄ ō, jóó kə́ kem karī gə̄ ō, hor ngel̄ kə́ yā tə́la kem jóo gə̄ ní tə́ ō malang.

¹⁷ Ba ədadə́ na: Ré ūgə̄ kadə gérger tə́ anī á̰a̰ī loo kə̄ dām̄ loo ń mā i tū tə́ ní ba ī-rāāī yá̰á̰ ń m-ā m̄-rāā ní.

¹⁸ Ré m̄-kɔ̄ŕ tōw̄ ō, de gə̄ ń seḿ ní kɔ̄rə́n̄ ō anī, ī-kɔ̄ríī yāsí kə gō gidə gérgereé ō, ba ə́daī kə tɔ́gə́sí na: I tāam̄ yā Kɔ́ɔ̄ɓē tə́ ō, Jedeo̰ tə́ ō.

¹⁹ Jedeo̰ nin̄ kə de kə́ ɓú gə̄ ń i seneé ní reē ugə̄n̄ kadə gérger tə́ i ta kəla gír ngɔ̄m̄ loo kə́ dan ndɔ̄ tɔyɔ́ tə́. Ngé ngɔ̄m̄ loo gə̄ mbélə̄n̄ gír naā i ngɔr ɓáý. Jedeo̰ nin̄ kə de gə̄ ń seneé ní kɔ̄rə́n̄ tōw̄ ō, tɔ̄ɔ̄n̄ jóo gə̄ ń ətōn̄ ní ō.

²⁰ Gír ɓūtə̄ kə́ jōó gə̄ ní rāān̄ tītə̄ yādə́ ō. Nin̄ əhɔn̄ hor ngel̄ kə jīdə́ kə́ geleé ō, jī ko̰də́ əhɔnə̄ń tōw̄ ō, ba ədan̄ kə tɔ́gɔ́ na: I kaskar kə́ tām̄ yā Kɔ́ɔ̄ɓē tə́ ō, Jedeo̰ tə́ ō.

²¹ Nin̄ ran̄ gotə kógə̄ḿ kə gō gidə gérgereé, banī de gə̄ malang kə́ kem gérgereé a a̰ȳn̄ i ngɔ̄də̄ ō, a əgan̄ i kɔŕ ō, a a̰ȳn̄ i naā ō.

²² Dan ń de kə́ ɓú mətá gə̄ a kɔ̄rə́n̄ tōw̄ ní, Kɔ́ɔ̄ɓē rāā adə̄ de gə̄ malang kə́ kem gérgereé tél tūrə̄n̄ ta kaskar kə̄ dɔ naā tə́ tɔ̄l̄nəń naā, ba gotə de gə̄ ń na̰yn̄ ní a̰ȳn̄ naā bátə́ ugə̄n̄ ɓē kə́ Bet Sita tə́ kum kə̄ Sereda ō, bátə́ ugə̄n̄ ɓē kə́ Abel Mehola tə́ kadə ɓē kə́ Tabat tə́ ō.

²³ Ɓārə́n̄ ngán Israel gə̄ kə́ gír kaa yā Nepətali tə́ ō, Aser tə́ ō, de gə̄ malang kə́ gír kaa yā Manase tə́ ō, adə̄ reē ngɔ̄də̄n̄ Madian gə̄.

²⁴ Jedeo̰ əla de gə̄ gō nang kə́ mbalá yā Epəraim tə́ kadə̄ ədan̄ na: Ī-risiī malang ī-gāngī ta Madian gə̄, ī-ndiī ta loo gə̄ kə́ yā kudəń man̄ teē kə̄ gidə kə́rēý tə́ kə gō kadə bā Jurdḛ bátə́ ɓē kə́ Bet Bara tə́. Adə̄ ɓārə́n̄ de kə́ dəngam gə̄ malang kə́ gír kaa yā Epəraim tə́ adə̄ risə ndin̄ ta loo gə̄ kə́ yā kudəń man̄ Jurdḛ tə́ bátə́ ugə̄ń ɓē kə́ Bet Bara tə́.

²⁵ Nin̄ əhɔn̄ ngār yā Madian gə̄ kə́ jōó gə̄ ń kógə̄ḿ rīn na i Oreb ō, kə́rēý rīn na i Jeb ō ní. Tɔ̄l̄ə̄n̄ Oreb i dɔ mbal̄ ń a ɓārə́n̄ na i mbal̄ Oreb ní tə́ ō, tɔ̄lə̄n̄ Jeb i loo ń a ɓārə́n̄ na i loo mbə́rē kan̄ kāgə̄ nduú yā Jeb tə́ ní ō.