NGÉ SARYA 6 - Bibəl ta Sar̄

Madian gə̄ rāān̄ kum ngán Israel gə̄ ndoō tə́

¹ Ngán Israel gə̄ tél rāān̄ yá̰á̰ kə́ majaĺ ta kum Kɔ́ɔ̄ɓē tə́ ɓáý to̰, adə̄ Kɔ́ɔ̄ɓē əladə́ kem jī Madian gə̄ tə́ ɓāl̄ sīrí.

² Madian gə̄ rāān̄ kum ngán Israel gə̄ ndoō tə́ ngá̰ý, adə̄ nin̄ rāān̄ loo ɓɔ̄ɔ̄ rɔ̄ yādə́ mbo̰ō̰ mbal̄ gə̄ tə́ ō, bəlo mbal̄ gə̄ tə́ ō, dɔ mbal̄ gə̄ kə́ loo kaw̄ kə̄ tū tə́ tōr̄ ngá̰ý tə́ ō.

³ Ré ngán Israel gə̄ dubə̄n̄ kōō oy anī Madian gə̄ kə Amalek gə̄, kə ngáń kə́ gír ɓē tə́ gə̄ reē a rɔ̄ɔ̄n̄də́ i mbée dejə.

⁴ Nin̄ reē a ndin̄ i dɔ nang yā ngán Israel gə̄ tə́ n a nujənə̄ń kan̄ yá̰a̰ gə̄ kə́ kem ndɔrɔ́ bátə́ ta kaw̄ kə̄ Gaja ngɔr ní. Nin̄ əya̰n̄ yá̰a̰ kəsa adə̄n̄ ngán Israel gə̄ alé. Əya̰n̄ batə̄ aĺ ō, man̄g aĺ ō, kərō aĺ ō.

⁵ Tɔdɔ̄ a reēn̄ i kə yá̰a̰ kul̄ yādə́ gēé ō, kújə tandā yādə́ gēé ō. A reēn̄ i ngá̰ý tītə̄ yim̄ gə̄ beé. Nin̄ gə̄gē, jámbal yādə́ gə̄ gə̄gē. Kutədə́ i ngá̰ý al̄ naā adə̄ loo tə́dádə́ gətóo. Nin̄ reē a taān̄ kem ɓē ō, a nujən̄ kem ɓē sák sák kɔ̄ɔ́ ō.

⁶ Tɔ́gə Israel gə̄ gətóó kə́ njɔ́ḿ gə̄ tə́ sɔɔ̄ń de kə́ Madian gə̄, adə̄ nōōn̄ kə̄ dɔ Kɔ́ɔ̄ɓē tə́.

⁷ Ngán Israel gə̄ nōōn̄ kə̄ dɔ Kɔ́ɔ̄ɓē tə́ kadə̄ ɔr̄də́ kɔ̄ɔ́ jī Madian gə̄ tə́,

⁸ anī Kɔ́ɔ̄ɓē əla nge koō ta yān kógə̄ḿ adə̄ ədadə́ na: Najə̄ ń Kɔ́ɔ̄ɓē Nə́ɓā yā Israel əda ní n toó, əda na i ni n n-teē sesí kɔ̄ɔ́ kem ɓē kə́ Ejiptə ń āwī ɓəloó tū tə́ ní ō,

⁹ n-gān̄g dɔsí jī de gə̄ kə́ Ejiptə tə́ ō, jī de gə̄ malang ń rāān̄ kumsí ndoō tə́ ní ō, n-tə̄ɓā madə̄ ba̰ā̰sí gə̄ nosí tə́ kɔ̄ɔ́ ba n-adə̄ńsí dɔ nang yādə́ ní ō.

¹⁰ N-ədasí kété na ni i Kɔ́ɔ̄ɓē Nə́ɓā yādə́ ba kə ī-lōōī ɓōĺ ɓesə̄ gə̄ yā Amor gə̄ ń ī-ndiī dɔ nang yādə́ tə́ ní. Banī sḭḭ̄ ōōī tan alé.

Kəla kə́ sɔɔ̄ dɔ Jedeo̰

¹¹ Nge kaw̄ kəla yā Kɔ́ɔ̄ɓē reē ndi gír kāgə̄ sén yā Yoas tə́, kem ɓē kə́ Opəra tə́. Yoas i de kə́ gír kaa yā Abiejer tə́. Ngōnən Jedeo̰ ra i kem loo mbə́rē kan̄ kāgə̄ nduú tə́ n a ənań kōō gémē, kadə̄ de kə́ Madian gə̄ a̰a̰nən̄ aĺ ní.

¹² Nge kaw̄ kəla yā Kɔ́ɔ̄ɓē ndɔ̄w̄n ba ədan na: Go̰ rɔ̄ɔ̄, Kɔ́ɔ̄ɓē i naā tə́ seí.

¹³ Jedeo̰ tél ədan na: Kɔ́ɔ̄ḿ, ré Kɔ́ɔ̄ɓē i naā tə́ sejí anī yá̰a̰ malang kə́ tōr̄ gə̄ ń toō rāān̄jí i tām̄ rí tə́? Yá̰á̰ kə́ yáā gə̄ ń kaají gə̄ ədan̄jí dan ń a ənīnəńjí gotə teē kə́ Kɔ́ɔ̄ɓē teē sedə́ kɔ̄ɔ́ kem ɓē kə́ Ejiptə tə́ ní i rá? Kə́ rɔ̄kum tə́ tā anī Kɔ́ɔ̄ɓē əya̰jí kɔ̄ɔ́ tām̄ ni əlají kem jī Madian gə̄ tə́.

¹⁴ Kɔ́ɔ̄ɓē tūr̄ kumən kə̄ rɔ̄n tə́ ba ədan na: Āw̄ ī-gān̄g dɔ ngán Israel gə̄ jī Madian gə̄ tə́ kə tɔ́gí ń noō. I mā n m-ə́laī ní.

¹⁵ Banī Jedeo̰ tél ədan na: ḿ Kɔ́ɔ̄ḿ, m-ā m-ájə́ ngán Israel gə̄ i ba̰ý? Gír ɓē yā Manase tə́ ní de kə́ gír kaa yāḿ mā tə́ gə̄ ní tɔ́gə́də́ gətóo tɔȳ yā gotə de gə̄ malang. Tá kem ndogə̄ yā bɔbə́ḿ tə́ ní mā i ngōn̄ kə́ dūú ngá̰ý.

¹⁶ Anī Kɔ́ɔ̄ɓē tél ədan na: Mā i seí naā tə́, i yá̰á̰ ń noō n ā ī-tetəń Madian gə̄ rɔ̄ɔ̄ tītə̄ kə́ nin̄ i de kə́ kógə̄ḿ beē ní.

¹⁷ Anī Jedeo̰ tél ədan na: Ré ī-rāā kem majə seḿ anī ī-rāā yá̰á̰ kógə̄ḿ ɔ́jəmə̄ń kadə̄ i ḭ̄ Kɔ́ɔ̄ɓē n ī-ra ā ɔ̄r̄ najə̄ seḿ toō.

¹⁸ m̄-rāāī ɓɔ́ ī-ra laā ī-ngóōm̄ ādə̄ m̄-reē kə yá̰a̰ ndējə̄ yāḿ m-ādī pá tá āw̄. Kɔ́ɔ̄ɓē tél kədan na: M-ā m̄-rā laā yā ngóōī.

¹⁹ Anī Jedeo̰ aw̄ tɔ̄l̄ ngōn̄ bə̄yā̰ ō, un ndujə̄ kem səmbē boó rāań mápá kə́ kanjə̄ kaa mápa ō. Ənī dā̰ kem keé ba ɓōkə́ manə̄n kem jóó ō, ba ɔydə́ malang reēń adə̄n gír kāgə̄ sén tə́.

²⁰ Nge kaw̄ kəla yā Kɔ́ɔ̄ɓē əda Jedeo̰ na kə un dā̰ ō, kə ɔy mápá kə́ kanjə̄ kaa mápa ō, kə tə́ndādə́ dɔ mbal̄ tə́ ba kə ɓōkə́ man̄ dā̰ dɔ tə́. Jedeo̰ rāā tītə̄ ń ədanəń ní.

²¹ Nge kaw̄ kəla yā Kɔ́ɔ̄ɓē əla ta kāgə̄ kə́ jīn tə́ ɔdəń dā̰ ní ō, mápá ní ō, anī hor teē tū mbal̄ tə́ o̰o̰ dā̰ ō, mápa ō malang. Gō tə́ anī nge kəla ní hində̄ kɔ̄ɔ́.

²² Loo ń noō tə́ Jedeo̰ ger̄ kadə̄ i nge kaw̄ kəla yā Kɔ́ɔ̄ɓē. Anī əda na: Kɔ́ɔ̄ɓē Nə́ɓā, m-á̰a̰ nge kaw̄ kəla yā Kɔ́ɔ̄ɓē kə kumḿ gá gá̰ ní yāḿ a majaĺ tā.

²³ Banī Kɔ́ɔ̄ɓē ədan na: Ādə̄ kemií sɔl̄, ī-ɓōl alé na ā óy alé.

²⁴ Jedeo̰ rāā loo tun̄ yá̰a̰ loo ní tə́ adə̄ Kɔ́ɔ̄ɓē, ba ənī rīn na i Kɔ́ɔ̄ɓē i nge sɔl̄ kem deē. Ɓōólaā gə̄gē ní loo tun̄ yá̰á̰ ní ra kem ɓē kə́ Opəra yā Abiejer tə́ noō.

Jedeo̰ nujə loo tun̄ yá̰a̰ yā ɓesə̄ Baal

²⁵ Ndɔ̄ɔ́ ndɔ̄ nəkɔ́ ń noō tə́ Kɔ́ɔ̄ɓē əda Jedeo̰ na kə əhɔ man̄g kə́ bəra kə́ nge ko̰ jōó yā bɔbə̄n ń ɓālə̄n i sīrí ní ō, kə nujə loo ń bɔbə̄n a tun̄ yá̰a̰ tū tə́ adə̄ ɓesə̄ Baal ní ō, kə tə́gā kāgə̄ ɓesə̄ kə́ yā ɓōĺ gidə ń i kə́ kudə kadə loo tun̄ yá̰á̰ tə́ ní kɔ̄ɔ́ ō.

²⁶ Kə rāā loo kə́ yā tunə̄ń yá̰a̰ kadə̄ Kɔ́ɔ̄ɓē Nə́ɓā yān kə gōó kadə̄ majə ta tél mbal̄ tə́ dɔɔ́ ō, kə əhɔ man̄g kə́ bəra ní kə tɔ̄l̄ ba kə róō horoó adə̄ Nə́ɓā kə kāgə̄ ɓesə̄ kə́ yā ɓōĺ gidə ń ni tə́gā ní ō.

²⁷ Jedeo̰ gə̄rā ngé kəla yān kə́ dəngam gə̄ kutə kógə̄ḿ rāań yá̰á̰ ń Kɔ́ɔ̄ɓē ədan kadə̄ rāā ní. Banī ni-rāā yá̰á̰ ní i ndɔ̄ɔ́. Ɓōĺ rāā kadaá najə̄ yā de kə́ kem ndogə̄ yā bɔbə̄n tə́ gə̄ ō, de kə́ kem ɓēé ō.

²⁸ Dan ń de kə́ kem ɓēé gə̄ teēn̄ dəloí á a̰a̰n̄ kadə̄ loo tun̄ yá̰a̰ kadə̄ ɓesə̄ Baal i kə́ nujə kɔ̄ɔ́ ō, kāgə̄ ɓesə̄ kə́ yā ɓōĺ gidə kə́ kudə kadə tə́ i kə́ tə́gā kɔ̄ɔ́ ō, man̄g kə́ bəra kə́ nge ko̰ jōó i kə́ tɔ̄l̄ ba róō horoó dɔ loo tun̄ yá̰á̰ kə́ rāā ngɔr ɓáý tə́ ō,

²⁹ anī dəjen̄ naā na ké i náā n rāā yá̰á̰ ń noō wa. Nin̄ dəjen̄ de gə̄ ō, ndəlen̄ gír ō anī gerə̄n̄ kadə̄ i Jedeo̰ ngōn̄ Yoas n rāā yá̰á̰ ní.

³⁰ Tā anī ədan̄ Yoas na: Ī-teē kə ngōnīí ndágá ādə̄ yā tɔ̄lən, tɔdɔ̄ ni nujə loo tun̄ yá̰a̰ yā ɓesə̄ Baal kɔ̄ɔ́ ō, tə́gā kāgə̄ ɓesə̄ kə́ yā ɓōĺ gidə kə́ kudə kadə tə́ kɔ̄ɔ́ ō.

³¹ Yoas tél əda de gə̄ malang ń reēn̄ rɔ̄n tə́ ní na: I sḭḭ̄ n i ngé kɔr̄ najə̄ tām̄ yā ɓesə̄ Baal tə́ a? I sḭḭ̄ n i ngé dḭḭ̄n gə̄ a? Deē ń a ɔr̄ najə̄ kum gotə ɓesə̄ Baal ní i yā tɔ̄l̄ kɔ́ɔ̄ kɔ̄ɔ́ pá tá kadə̄ loo tīī ɓáý. Ré Baal i Nə́ɓā anī adə̄ nəkɔ́ ɔr̄ najə̄ dɔ rɔ̄n tə́, tām̄ i loo kə́ yā tun̄ yá̰a̰ dɔ tə́ kadə̄n n Jedeo̰ nujəń kɔ̄ɔ́ ní.

³² Əla gír i ndɔ̄ n noō tə́ ń a ɓāŕnəń Jedeo̰ na i Yerubaal, kə gō najə̄ ń Yoas əda ní. Yerubaal ní kumən na i: Ādə̄ Baal nəkɔ́ ɔr̄ najə̄ dɔ rɔ̄n tə́, tām̄ i loo tun̄ yá̰a̰ yā Baal n i kə́ nujəń kɔ̄ɔ́ ní.

Jedeo̰ dəje Nə́ɓā kadə̄ rāā yá̰á̰ kógə̄ḿ

³³ Madian gə̄ ō, Amalek gə̄ ō, ngáń kə́ gír ɓē tə́ gə̄ ō, əngen̄ naā loo kógə̄ḿ malang. Nin̄ teēn̄ bā Jurdḛ ba aw̄ rāān̄ gérger yādə́ ndágə loo kə́ Jisreel tə́.

³⁴ Banī Kɔ́ɔ̄ɓē əla ndílən rɔ̄ Jedeo̰ tə́ tītə̄ kūbə̄ kə́ kəla rɔ̄ deē tə́ beē adə̄ ni kɔ̄ŕ tōw̄ ɓāŕəń Abiejer gə̄ ō,

³⁵ əla ngámbang kəla gə̄ dɔ nang yā Manase tə́ kadə̄ ɓārə́n̄ Manase gə̄ ō, kadə̄ unən̄ gōn. Əla de gə̄ ɓāŕ Aser gə̄ tō Jabulo̰ gə̄ tə́ ō, Nepətali gə̄ tə́ ō, adə̄ reē əngenən̄.

³⁶ Gō tə́ anī Jedeo̰ əda Nə́ɓā na ré ndigə kunən yā kajəń ngán Israel gə̄ tītə̄ ń ədań ní anī,

³⁷ na n-teē kem teē kem bḭḭ̄ batə̄ kə́ kəja loo kənda kōō tə́, ré tal əhɔ dɔ tə́ ba loo kə́ gidə tə́ to karī ɓá anī n-a n-ger̄ kadə̄ Nə́ɓā ndigə kajə ngán Israel gə̄ kə kul̄neé tītə̄ ń ədań ní.

³⁸ Yá̰á̰ ní reē to tītə̄ ń Jedeo̰ dəjeń ní. Teē kə ndɔ̄ kə́ noō dəloí anī Jedeo̰ aw̄ mbə́rē bḭḭ̄ batə̄ ní, anī tal kə́ tū tə́ rosə kem kál man̄ kógə̄ḿ.

³⁹ Ɓáa Jedeo̰ tél əda Nə́ɓā na ré n-dəjen yá̰á̰ ɓáý anī kə lōō rāā wōn̄g seneé. Na n-nāān nja kógə̄ḿ ɓáý kə bḭḭ̄ batə̄ ní, ń toō ní ādə̄ i bḭḭ̄ batə̄ ngóy n sáẃ sáẃ ba ādə̄ tal əhɔ dɔ nang tə́ gīr̄ gidə.

⁴⁰ Nə́ɓā rāā yá̰á̰ ń Jedeo̰ dəjen ní ndɔ̄ ngeé ń noō tə́ ndɔ̄ɔ́, adə̄ i bḭḭ̄ batə̄ ngóy n aȳ sáẃ sáẃ ba dɔ nang ń gīr̄ gidə ní tá tal əhɔ dɔ tə́.