NGÉ SARYA 5 - Bibəl ta Sar̄

Pā yā Debora

¹ Ndɔ̄ ń noō tə́ Debora nin̄ kə Barak ngōn̄ Abinoam ənīn̄ pā ń toō ədan na:

² Dan ń dɔ nang kə́ Israel tə́ de gə̄ əya̰n̄ nənga dɔdə́ adə̄ to gususu tām̄ yā rɔ̄ɔ̄ tə́ ō, adə̄n̄ rɔ̄də́ kə gō kem ndigə yādə́ ō anī, ī-tɔ̄yī Kɔ́ɔ̄ɓē.

³ Sḭḭ̄ mban̄g gə̄ kə ngār gə̄ ī-nelī mbīsí majə. m̄-ndigə kə́nā pā tām̄ yā Kɔ́ɔ̄ɓē tə́. m̄-ndigə kɔsə gɔn Kɔ́ɔ̄ɓē Nə́ɓā yā Israel.

⁴ Kɔ́ɔ̄ɓē, dan ń ḭ́ḭ dɔ nang kə́ Edom tə́ ī-reē ní, dan ń ḭ́ḭ dɔ mbal̄ gə̄ kə́ Seir tə́ ī-reē ní, dɔ nang ndew ō, dɔ rā̰ yéȳ ō, kil̄ man̄ gə̄ tetən̄ man̄ adə̄ man̄ edə ō,

⁵ mbal̄ gə̄ télən̄ kə rɔ̄də́ kə̄ nang tə́ ta kumií tə́ ō, Kɔ́ɔ̄ɓē Nə́ɓā kə́ Sinai, Nə́ɓā yā Israel.

⁶ Ɓāl̄ yā Samgar kə́ ngōn̄ Anat tə́ ō, ɓāl̄ yā Yael tə́ ō ní, njə̄rā mbā kə́ kə kósó gətóo ō, ngé kaw̄ mbā gə̄ əya̰n̄ róbə́ kə́ bo gə̄ kɔ̄ɔ́, ba unən̄ i kə̄lá róbə gə̄ ō,

⁷ Ngār gə̄ gətóon̄, ngār gə̄ kə́ dɔ nang kə́ Israel tə́ gətóon̄, bátə́ adə̄ mā Debora m-ḭ́ḭ dɔɔ́, m-ḭ́ḭ dɔɔ́ tītə̄ kó̰o̰ ngōn̄ yā Israel tə́.

⁸ Dan ń ngán Israel gə̄ gə̄rān̄ ɓesə̄ gə̄ anī rɔ̄ɔ̄ ḭḭ ō. Ba loo kənge der kógə̄ḿ, aké nənga kógə̄ḿ dan ngán Israel kə́ dūbú kutə sɔ́ gə̄ tə́ ní i yá̰á̰ kə́ ngan̄g.

⁹ Kemḿ i kə ngal ngé rɔ̄ɔ̄ gə̄ kə́ Israel tə́ ō, kemḿ i kə ngán Israel gə̄ ń adə̄n̄ rɔ̄də́ kə gō kem ndigə yādə́ ní ō. ī-tɔ̄yī Kɔ́ɔ̄ɓē.

¹⁰ Sḭḭ̄ ngé kal̄ kó̰o̰ kərō kə́ ndaa gə̄ ō, Sḭḭ̄ ngé lábə̄ kūbə̄ tapīi gə̄ nang tə́ ba ndi dɔ tə́ gə̄ ō, sḭḭ̄ ngé njə̄rā róbə gə̄ ō, ī-gírī ngá̰ý á̰a̰ī.

¹¹ Ngé nə̄ɓō yá̰á̰ kə́ kəhɔ ta rɔ̄ɔ̄ tə́ gə̄ ń ran̄ kadə loo ka̰ȳ man̄ yā yá̰a̰ kul̄ gə̄ tə́ ní, ənīn̄ gotə rɔ̄ɔ̄ gə̄ ń Kɔ́ɔ̄ɓē tetə ní, ənīn̄ gotə rɔ̄ɔ̄ gə̄ ń Kɔ́ɔ̄ɓē ɔjəń tɔ́gən ta kum ngán Israel gə̄ tə́ ní. Anī deē yā Kɔ́ɔ̄ɓē gə̄ kánə̄n̄ naā ta róbə gə̄ kə́ yā kudəń kə̄ kem ɓēé tə́.

¹² Debora ī-ndól̄, ḭ́ḭ dɔɔ́ ún pā rɔ̄ɔ̄. Barak ngōn̄ Abinoam ḭ́ḭ dɔɔ́, āw̄ ī-tél kə deē yāí gə̄ ń əhɔn̄də́ ɓəloó ní ī-reē sedə́ gogə́.

¹³ De gə̄ ń teēn̄ ta yo tə́ ní reē əngen̄ ngār gə̄. Deē yā Kɔ́ɔ̄ɓē gə̄ kánə̄n̄ naā tām̄ yāḿ tə́ dan go̰ rɔ̄ɔ̄ gə̄ tə́.

¹⁴ Ngé tetə Amalek gə̄ rɔ̄ɔ̄ ḭḭn̄ i dɔ nang yā Epəraim tə́ n reēn̄ ní. Benjamḛ gə̄ utə̄n̄ gōdə́, ba əlan̄ rɔ̄də́ dan deē yādə́ gə̄ tə́. Ngol áskar gə̄ teēn̄ i dan de yā Makir gə̄ tə́, ba ngār gə̄ teēn̄ i dan deē yā Jabulo̰ gə̄ tə́.

¹⁵ Ngār gə̄ yā Isakar gə̄ reē əngen̄ Debora. Ngán Isakar gə̄ ń i ngé kəhɔ gō Barak ní aw̄n̄ gōn tə́ láẃ ndágə looó. Banī nējə̄ naā najə̄ kə́ ngá̰ý ḭḭ dan Ruben gə̄ tə́.

¹⁶ Ī-na̰yiī mbo̰ō̰ gong gə̄ tə́ gír koō ngé kul̄ yá̰a̰ gə̄ tə́ loo ɓāŕ yá̰a̰ kul̄ yādə́ gə̄ tə́ kə ngélé i najə̄ rí tə́? Anī dəje naā najə̄ kə́ ngá̰ý ḭḭ dan Ruben gə̄ tə́.

¹⁷ Galaad gə̄ ndin̄ loo yādə́ ɓēé gidə bā Jurdḛ tə́. I tām̄ rí tə́ á Dan gə̄ əhɔn̄ loo ndin̄ kem to bo gə̄ tə́ ní? Aser gə̄ ndin̄ ɓē kadə bā bo tə́, nin̄ rāān̄ ɓē loo dəba to bo yādə́ gə̄ tə́.

¹⁸ Banī Jabulo̰ gə̄ ō, Nepətali gə̄ ō, ənīn̄ rɔ̄də́ adə̄n̄ yo ta rɔ̄ɔ̄ tə́.

¹⁹ Mban̄g gə̄ teē reēn̄ ba rɔ̄ɔ̄n̄, mban̄g kə́ Kanaan gə̄ rɔ̄ɔ̄n̄ kem ɓē kə́ Tanak tə́ kadə man̄ gə̄ kə́ Megido tə́. Banī əngən̄ nar ɔyn̄ rɔ̄ɔ̄ tə́ alé.

²⁰ Tə́yō̰ gə̄ ndin̄ dɔ rā̰ tə́ rɔ̄ɔ̄n̄ ō, rɔ̄ɔ̄n̄ Sisəra kanjə̄ tɔ̄ɔ̄ dɔ róbə njə̄rādə́ tə́.

²¹ Man̄ Kison ń əla gír nūgə́ i jóó ngá̰ý ní, man̄ Kison ənda madə̄ ba̰ā̰ gə̄ aw̄ń kɔ̄ɔ́. Jə-njə̄rāī kə kem kanjə̄ ɓōĺ j-awī ta rɔ̄ɔ̄ tə́.

²² Tā anī sə́nda gə̄ mānə̄n̄ kə ngɔ̄dɔ̄ɔ́, kōō njadə́ ɓār̄ ɓuruk ɓuruk ɓuruk.

²³ Nge kaw̄ kəla yā Kɔ́ɔ̄ɓē əda na: Ī-ndɔ̄líī ɓē kə́ Merojə, ī-ndɔ̄líī, ī-ndɔ̄líī de kə́ kemeé gə̄, tɔdɔ̄ dḭḭ̄n̄ Kɔ́ɔ̄ɓē alé, rɔ̄ɔ̄n̄ naā tə́ kə go̰ rɔ̄ɔ̄ yān gēé alé.

²⁴ Dan dəyá̰ gə̄ tə́ malang ní ādə̄ tɔ́r̄ ta i dɔ Yael nə̄yá̰ Heber kə́ Keni tə́. Rɔ̄kum, dan dəyá̰ gə̄ malang ń ndin̄ kem kújə tandā gə̄ tə́ ní, ādə̄ tɔ́r̄ ta i dɔ Yael tə́.

²⁵ Sisəra gəden man̄, anī adə̄n mba man̄g, mba man̄g kə́ yibə̄n i kum tə́ kem yá̰a̰ ka̰ȳ man̄ kə́ majə ngá̰ý tə́.

²⁶ Gō tə́ anī un kāgə̄ nja kújə jīn kə́rēý tə́ ō, un mūú yā ngé rāā kəla gə̄ jīn kə́ noō tə́ ō. Ni-ənda Sisəra, ənda kār̄ dɔn njar. Ənda kāgə̄ nja kújə́ ní dɔn tə́ adə̄ teē dām̄ kə́rēý tə́.

²⁷ Sisəra əsō, əsō nang tə́ njan tə́, to bəling njan tə́. Ni-oy kə̄ loo ń əsō tū tə́ tə́ noō.

²⁸ Kó̰o̰ Sisəra əla kumən ko̰rō̰ kújə́ tə́ a̰a̰ń loo. Ni-a̰a̰ loo mbo̰ō̰ párpar tə́ ba nōō rɔ̄n əda na: I ba̰ý á púsə rɔ̄ɔ̄ yān tél alé? I ba̰ý á púsə rɔ̄ɔ̄ yān ɔr bā̰ā̰ loo reē tə́ beé?

²⁹ Najə̄ ń dəyá̰ madə̄n kə́ ngáā ngá̰ý gə̄ ədanən̄ ní nəkɔ́ tél əda rɔ̄n kə̄ nja naā tə́:

³⁰ Áskar gə̄ a ɔyn̄ i yá̰a̰ kənge kə́ kəhɔ ta rɔ̄ɔ̄ tə́, a kēgə̄n̄ i naā yá̰a̰ kənge kə́ kɔy ta rɔ̄ɔ̄ tə́. Áskar kógə̄ḿ a ənge ngōmandə kógə̄ḿ aláa ngámandə gə̄ jōó. Sisəra a ənge i kūbə̄ kə́ rāā ɓál gə̄ ō, kə́ kɔsə desḛ̄ḛ tū tə́ gə̄ ō. a ənge i kūbə̄ kə́ kɔsə desḛ̄ḛ tū tə́ gidə kógə̄ḿ aláa gidə jōó kə́ yā kənī míndə nge tetə rɔ̄ɔ̄ tə́.

³¹ Kɔ́ɔ̄ɓē, ādə̄ madə̄ ba̰ā̰í gə̄ malang oyn̄ yo kə́ tītə̄ yā Sisəra, banī ādə̄ madə̄ taí gə̄ ton̄ tītə̄ mbang ń ḭḭ kə̄ dɔɔ́ á ndə́lē ngá̰ý ní. Ɓē tél ndi lɔm ɓāl̄ kutə sɔ́.