NGÉ SARYA 4 - Bibəl ta Sar̄

Debora nin̄ kə Barak

¹ Dan ń Ehud oy kɔ̄ɔ́ anī ngán Israel gə̄ tél rāān̄ yá̰á̰ kə́ nel̄ Kɔ́ɔ̄ɓē aĺ ɓáý to̰

² adə̄ Kɔ́ɔ̄ɓē əladə́ kem jī Yabin mban̄g kə́ dɔ nang kə́ Kanaan tə́ ń ndi kem ɓē kə́ Hasor tə́ ní. Ngol áskar gə̄ yā Yabin i Sisəra. Ni-ndi kem ɓē kə́ Haroset Goim tə́.

³ Púsə rɔ̄ɔ̄ yān kə́ rāā kə gindīí gə̄ i ɓú ndōhó, adə̄ ni-rāā kum ngán Israel gə̄ ndoō tə́ ɓāl̄ kutə jōó. Loo ń noō tə́ ngán Israel gə̄ nōōn̄ kə̄ dɔ Kɔ́ɔ̄ɓē tə́.

⁴ I dan ń Debora nge koō ta kə́ nə̄yá̰ Lapidot a gāngəń sarya yā ngán Israel gə̄ ní.

⁵ Ni a ndi i gír kāgə̄ túmbur ń a ɓārə́n̄ na i túmbur yā Debora ní tə́ n a gāngəń sarya ní. I dɔ dán ɓē kə́ Rama kə ɓē kə́ Betel, gō nang kə́ mbalá yā Epəraim tə́. Ngán Israel gə̄ aw̄n̄ kə saryaá rɔ̄n tə́ i loo ń noō tə́.

⁶ Ndɔ̄ kə́rēý tə́ anī Debora əla gō Barak ngōn̄ Abinoam tə́ kem ɓē kə́ Kedes tə́, dɔ nang yā Nepətali tə́, ba ədan na: Yá̰á̰ ń Kɔ́ɔ̄ɓē Nə́ɓā yā Israel gə̄ əndā dɔí tə́ kadə̄ ī-rāā ní n toó: Āw̄ ɔ́y de gə̄ dūbú kutə dan ngán Nepətali gə̄ tə́ ō, Jabulo̰ gə̄ tə́ ō, ba āw̄ sedə́ dɔ mbal̄ Tabor tə́.

⁷ M-ā m̄-sə̄lā Sisəra ngol áskar gə̄ yā Yabin kadə̄ aw̄ ənīī rɔ̄ɔ̄ ta man̄ Kison tə́ kə púsə rɔ̄ɔ̄ yān gēé ō, kə ɓūtə̄ áskar yān gēé ō, ba m-ā m-əlan kem jīí tə́.

⁸ Barak ədan na: Ré āw̄ seḿ anī m-ā m-āw̄, ba ré āw̄ seḿ aĺ anī, m-ā m-āw̄ alé.

⁹ Anī Debora ədan na: Ɓáa m-ā m-āw̄ seí, ba rɔ̄ɔ̄ ń ā āw̄ kə̄ ta tə́ toō ā ə́nge kɔsə gɔn tū tə́ alé, tɔdɔ̄ Kɔ́ɔ̄ɓē a əla Sisəra i jī de kə́ dəyá̰ tə́. Loo ń noō tə́ Debora aw̄ kə Barak kem ɓē kə́ Kedes tə́.

¹⁰ Barak ɓāŕ Nepətali gə̄ ō, Jabulo̰ gə̄ ō, adə̄ əngen̄ naā kem ɓē kə́ Kedes tə́. De gə̄ kutə ndigən̄ kaw̄ seneé. Debora nəkɔ́ aw̄ seneé ō.

¹¹ Heber ń i Keni ní ndi i kadə ɓē kə́ Kedes tə́ ngɔr. Ni-ɔr̄ rɔ̄n kɔ̄ɔ́ rɔ̄ Keni madə̄n gə̄ ń i ngán Hobab sájə Moijə ní tə́ ba aw̄ udə kújə tandā yān kadə kāgə̄ sén kə́ Sananim tə́.

¹² Sisəra oō kadə̄ Barak ngōn̄ Abinoam al̄ dɔ mbal̄ Tabor tə́.

¹³ Anī ɔsə nja púsə rɔ̄ɔ̄ yān kə́ rāā kə gindīí gə̄ ń i ɓú ndōhó ní kə̄ naā tə́ ō, de kə́ dəngam yān gə̄ malang ō, kem ɓē kə́ Haroset Goim tə́. Gō tə́ anī ḭḭn̄ Haroset Goim aw̄n̄ ta man̄ Kison tə́.

¹⁴ Anī Debora əda Barak na: Ḭ́ḭ dɔɔ́ tɔdɔ̄ Kɔ́ɔ̄ɓē a əla Sisəra kem jīí tə́ i kem ndɔ̄ ɓōólaā tə́. Kɔ́ɔ̄ɓē nəkɔ́ i kété noí tə́. Barak risə kɔ̄ɔ́ dɔ mbal̄ Tabor tə́ kə deē yān gə̄ kə́ dūbú kutuú. Nəkɔ́ i kété nodə́ tə́.

¹⁵ Loo ń noō tə́ Kɔ́ɔ̄ɓē tə̄ɓā Sisəra kɔ̄ɔ́ no Barak tə́ kə púsə rɔ̄ɔ̄ yān gēé malang ō, kə ngé rɔ̄ɔ̄ yān gēé malang ō. Ni-tə̄ɓān i kə kəyā kaskaraá. Sisəra risə kɔ̄ɔ́ dɔ púsə rɔ̄ɔ̄ yā tə́ ba a̰ȳ kə njaneé.

¹⁶ Barak ngɔ̄də̄ gō púsə rɔ̄ɔ̄ gə̄ kə ngé rɔ̄ɔ̄ gə̄ bátə́ ugə̄ sedə́ kem ɓē kə́ Haroset Goim tə́. Tɔ̄lə̄n̄ ngé rɔ̄ɔ̄ gə̄ yā Sisəra malang kɔ̄ɔ́ kə kəyā kaskaraá. De kógə̄ḿ kə́ teē gətóo.

¹⁷ Sisəra a̰ȳ kə njaneé bátə́ ugə̄ kújə tandá yā Yael nə̄yá̰ Heber kə́ Keni tə́, tɔdɔ̄ kété ní lápə́ya to dɔ dán Yabin mban̄g kə́ Hasor tə́ kə de gə̄ kə́ kem ndogə̄ yā Heber tə́.

¹⁸ Yael teē tə́nī ta Sisəra ba ədan na: Údə kə̄ laā, kɔ́ɔ̄ḿ údə kə̄ kem kújə yāḿ tə́ ba ī-lōō ɓōĺ. Sisəra udə kem kújə tandá yā Yael tə́ anī Yael ɓɔ̄ɔ̄n gíŕ bájoó.

¹⁹ Sisəra əda Yael na: Ādə̄m̄ man̄ tə́ sḛ́ý m-ā̰ȳ na kəndā man̄ rāām̄ ngá̰ý. Anī Yael teē ta sɔl ń mba i kemeé ní ba adə̄n adə̄ a̰ȳ. Gō tə́ anī tél ənī bájo dɔn tə́ gogə́.

²⁰ Sisəra əda Yael ɓáý to̰ na: Ī-ra ta róbə́ tə́ ba ré deē kógə̄ḿ reē dəjeī na ké deē i laā wa ə́dan na deē gətóo.

²¹ Sisəra ɓīī kə́ oy mámák kɔ̄ɔ́ tɔdɔ̄ kɔr rāān ngá̰ý. Tā anī Yael un mūú ō, kāgə̄ nja kújə tandā ō, ba reē rɔ̄n tə́ jəke. Ni-ənda kāgə̄ ní dɔn tə́ adə̄ teē dām̄ kə́ noō tə́ udə nang tə́ adə̄ Sisəra oy.

²² Loo ń noō tə́ Barak ń i nge ngɔ̄də̄ gō Sisəra ní reē ugə̄. Anī Yael tə́nī tan ba ədan na: Ī-reē ādə̄ m-ɔ́jiī deē ń ī-sāān ní. Barak udə kújú anī a̰a̰ nīń Sisəra to nang tə́ ba dɔn i kə́ kāgə̄ nja kújə nd tū tə́ teē dām̄ kə́rēý tə́.

²³ Ndɔ̄ ń noō tə́ Nə́ɓā əla rɔ̄sɔl̄ dɔ Yabin mban̄g kə́ Kanaan tə́ ta kum ngán Israel gə̄ tə́.

²⁴ Nin̄ aw̄n̄ seneé gadə gadə bátə́ tɔ̄l̄nən̄.