NGÉ SARYA 2 - Bibəl ta Sar̄

Kɔ́ɔ̄ɓē gákə̄ deē yān gə̄

¹ Nge kaw̄ kəla yā Kɔ́ɔ̄ɓē ḭḭ Gilgal aw̄ Bokim. Ni-əda ngán Israel gə̄ na: m̄-teē sesí kɔ̄ɔ́ kem ɓē kə́ Ejiptə tə́ ba m-āw̄ sesí dɔ nang ń m-ə̄nī ndūḿ wáńg kadə̄ m-ādə̄ kaasí gə̄ ní tə́. M-ə́dásí na madə̄ naā ń m̄-ə́hɔ sesí ní m-ā m̄-lōō gírí aĺ ō,

² sḭḭ̄ ā ə́hɔī madə̄ naā kə de gə̄ kə́ dɔ nang ń toō tə́ aĺ ō, ā ī-nujiī loo tun̄ yá̰a̰ yādə́ gə̄ kɔ̄ɔ́ ō. Banī sḭḭ̄ ōōī taḿ alé, ní i rī n rāāī noó?

³ Adə̄ m-ə́da na m-ā m̄-tə̄ɓā de gə̄ kə́ dɔ nang ń toō tə́ nosí tə́ alé. Nin̄ a gólə̄n̄sí yā kaw̄ sesí kadə̄ ə̄sōī kum gūmbə̄ ń i rāā ɓesə̄ yādə́ gə̄ ní tə́.

⁴ Dan ń nge kaw̄ kəla yā Kɔ́ɔ̄ɓē əda ngán Israel gə̄ najə̄ gə̄ ń noō anī nin̄ malang nōōn̄.

⁵ Əndān̄ rī loo ní na i Bokim, ba tɔ̄lə̄n̄ dā̰ gə̄ tun̄ adə̄n̄ Kɔ́ɔ̄ɓē loo ní tə́.

Ngán Israel gə̄ əya̰n̄ Kɔ́ɔ̄ɓē kɔ̄ɔ́ gotə Jojue tə́

⁶ Jojue əya̰ de gə̄ kadə̄ aw̄n̄, adə̄ ngán Israel gə̄ télən̄ kógə̄ḿ kógə̄ḿ kə̄ dɔ nang yādə́ gə̄ tə́. I beé n nin̄ taānəń loo ní.

⁷ Rāān̄ kəla yā Kɔ́ɔ̄ɓē dan yā Jojue tə́ ō, dan yā kum kɔɔ̄ gə̄ yā ngán Israel gə̄ ń a̰a̰n̄ yá̰á̰ kə́ bo gə̄ ń Kɔ́ɔ̄ɓē rāā tām̄ yā ngán Israel gə̄ tə́ á ndin̄ kə kumdə́ gotə Jojue tə́ ní ō.

⁸ Dan ń Jojue ngōn̄ Nun kə́ nge kəla yā Kɔ́ɔ̄ɓē oy ní ɓālə̄n i ɓú kə kutə kógə̄ḿ.

⁹ Dubə̄nən̄ i dɔ nang ń adə̄nən̄ tə́ ní, kem ɓē kə́ Timnat Heres tə́, gō nang kə́ mbalá yā Epəraim tə́. Ré deē ra mbal̄ Gaas tə́ anī loo ń dubə̄nən̄ tū tə́ ní i kə̄ dām̄ mbɔ́r ɓē kə́ ko̰ó̰ tə́.

¹⁰ Go tə́ anī de kə́ ɓāl̄ yān tə́ gə̄ oyn̄ ō. De gə̄ ń utə̄n̄ gīdə́ ní gerə̄n̄ Kɔ́ɔ̄ɓē aĺ ō, gerə̄n̄ kəla gə̄ ń Kɔ́ɔ̄ɓē rāā tām̄ yā ngán Israel gə̄ tə́ ní aĺ ō.

¹¹ Adə̄ ngán Israel gə̄ rāān̄ yá̰á̰ kə́ majaĺ ta kum Kɔ́ɔ̄ɓē tə́. Nin̄ ndɔ̄ȳn̄ ɓesə̄ Baal gə̄.

¹² Əya̰n̄ Kɔ́ɔ̄ɓē Nə́ɓā yā kaadə́ gə̄ ń teē sedə́ kem ɓē kə́ Ejiptə tə́ ni kɔ̄ɔ́ ba unən̄ gō ɓesə̄ gə̄ yā gír de gə̄ ń ndin̄ gīrə̄n̄ gidədə́ ní. Nin̄ ɔsən̄ nodə́ nang tə́ no ɓesə̄ gə̄ ní tə́ rɔȳn̄də́ adə̄ wōn̄g rāā Kɔ́ɔ̄ɓē.

¹³ Nin̄ əya̰n̄ Kɔ́ɔ̄ɓē kɔ̄ɔ́ ba ndɔ̄ȳn̄ ɓesə̄ Baal gə̄ kə ɓesə̄ Astarte gə̄.

¹⁴ Adə̄ wōn̄g rāā Kɔ́ɔ̄ɓē kə ngán Israel gēé. Ni-əya̰də́ adə̄ ngé ɓogə gə̄ ɔyn̄ yá̰a̰ kənge yādə́ gə̄ ō, əladə́ jī madə̄ ba̰ā̰də́ gə̄ ń ndi gīrə̄n̄ gidədə́ ní tə́ ō. Adə̄ ngán Israel gə̄ asən̄ dum̄ tadə́ to̰ alé.

¹⁵ Kə dɔ kaw̄də́ rɔ̄ɔ̄ tə́ gə̄ malang ń noō, Kɔ́ɔ̄ɓē rāā adə̄ rɔ̄ɔ̄ rāādə́ tītə̄ ń ədańdə́ ní ō, tītə̄ ń túbəń njan adə̄də́ ní ō. Wur kɔl kə́ ngá̰ý əsō dɔdə́ tə́.

¹⁶ Tā anī Kɔ́ɔ̄ɓē əndā ngé sarya gə̄ adə̄ gāngə̄n̄ dɔdə́ jī ngé ɓogə gə̄ tə́.

¹⁷ Banī ngé sarya yādə́ gə̄gē ngán Israel gə̄ oōn̄ tadə́ alé. Nin̄ əsōn̄ kə̄ nang tə́ no ɓesə̄ gə̄ tə́ rɔȳn̄də́. Nin̄ tɔ̄ɔ̄n̄ kɔ̄ɔ́ láẃ ngá̰ý gō róbə́ ń kaadə́ gə̄ unən̄ tə́ ní. Ndájə̄n̄ kaadə́ gə̄ ń i ngé ngɔ̄m̄ gō míndə́ Kɔ́ɔ̄ɓē ní alé.

¹⁸ Dan ń Kɔ́ɔ̄ɓē a əla kə nge saryaá anī nəkɔ́ i seneé naā tə́ yā gāngəń dɔ ngán Israel gə̄ jī madə̄ ba̰ā̰də́ gə̄ tə́ kə ndɔ̄ gə̄ malang ń nge sarya ndiń kə kumneé ní. Tɔdɔ̄ kum Kɔ́ɔ̄ɓē o̰o̰n tām̄ yādə́ tə́ dan ń ngé rāā kumdə́ ndoō tə́ gə̄ a rāān̄də́ adə̄ a nōōn̄ ní.

¹⁹ Dan ń nge sarya oy kɔ̄ɔ́ anī nin̄ tél rāān̄ yá̰á̰ kə́ majaĺ ngá̰ý tɔȳ yā kaadə́ gə̄ ɓáý. Nin̄ əhɔn̄ gō ɓesə̄ gə̄ ō, rāān̄ kəla adə̄n̄də́ ō, əsōn̄ kə̄ nang tə́ nodə́ tə́ rɔȳn̄də́ ō. Nin̄ lōōn̄ gír kəla rāādə́ gə̄ kə́ majaĺ gə̄ aĺ ō, gír dɔ ngan̄g tə́ aĺ ō.

Kɔ́ɔ̄ɓē nāā ngán Israel gə̄

²⁰ Wōn̄g rāā Kɔ́ɔ̄ɓē kə ngán Israel gēé adə̄ əda na: Nápar de gə̄ ń toō mānə̄n̄ dɔ ndū najə̄ gə̄ ń m̄-rāań madə̄ naā sedə́ á m-ə́da kaadə́ gə̄ kadə̄ ngɔ̄mə̄n̄ ní. Nin̄ oōn̄ taḿ alé.

²¹ Ní m-ā m̄-tə̄ɓā nápar de gə̄ ń Jojue tə̄ɓādə́ aĺ ɓáý ba oy ní kɔ̄ɔ́ nodə́ tə́ aĺ ō.

²² M-ā m̄-nāā ngán Israel gə̄ kə nápar de gə̄ ní yā ka̰a̰ń ké a rāān̄ yá̰á̰ ń kemḿ ndigə ní ō, a oōn̄ taḿ tītə̄ yā kaadə́ gə̄ ō wa.

²³ Adə̄ Kɔ́ɔ̄ɓē əya̰ nápar de gə̄ ń ni əladə́ kem jī Jojue tə́ aĺ ní adə̄ ndin̄ kem ɓēé. Ni-tə̄ɓādə́ kɔ̄ɔ́ láẃ alé.