NGÉ SARYA 18 - Bibəl ta Sar̄

Dan gə̄ əngen̄ dɔ nang kə́ rang

¹ Dan ń noō tə́ ní mban̄g gətóo dɔ nang kə́ Israel tə́ ō, de kə́ gír ɓē yā Dan tə́ gə̄ a sāān̄ i loo kə́ yā ndiń ō, tām̄ nin̄ əngen̄ dɔ nang tītə̄ yā gotə gír ɓē kə́ rang gə̄ yā ngán Israel gə̄ aĺ ɓáý.

² Nin̄ gə̄rān̄ go̰ rɔ̄ɔ̄ gə̄ mí dáńdə́ tə́ kadə̄ ḭḭn̄ kem ɓē kə́ Sora tə́ ō, Esətaol tə́ ō, kadə̄ aw̄ əndān̄ ma̰ȳ loo. De kə́ mí gə̄ ní aw̄ ugə̄n̄ ɓē Mika, gō nang kə́ mbalá yā Epəraim tə́ ba tan̄ looneé.

³ Nin̄ oōn̄ ndū ngōn̄ Lebi kə́ balsáá ní ɓē Mika anī gerə̄n̄ ndūn. Adə̄ aw̄n̄ rɔ̄n tə́ ba dəjenən̄ najə̄ ədan̄ na ké i náā n reē seneé laā wa? Ké a rāā i rí laā wa? Ké i rí yān n i loo ń toō tə́ laā wa?

⁴ Anī tél ədadə́ na Mika na rāā yá̰á̰ kə́ beé, yá̰á̰ kə́ beé, tām̄ yān tə́. Na unən adə̄ na n-tél nge tun̄ yá̰a̰ yān.

⁵ De gə̄ ní tél ədanən̄ na beé ɓáa kə sāā kadə̄ n-a̰a̰n̄ ké Nə́ɓā a əda na mbā ń n-a n-aw̄n̄ toó a majə wa?

⁶ Nge tun̄ yá̰á̰ ní ədadə́ na kə lōōn̄ sōl̄ yá̰á̰ kógə̄ḿ, tām̄ Kɔ́ɔ̄ɓē na i sedə́ naā tə́ dɔ róbə mbā yādə́ tə́.

⁷ De kə́ mí gə̄ ní ɔrə̄n̄ dɔɔ́, aw̄n̄ bátə́ ugə̄n̄ kem ɓē kə́ Lais tə́. Nin̄ a̰a̰n̄ kadə̄ de kə́ Lais gə̄ i de gə̄ kə́ ndin̄ kanjə̄ sōl̄ yá̰á̰ kógə̄ḿ ō, háĺdə́ sɔl̄ lɔ́ḿ lɔ́ḿ ō, ənīn̄ kemdə́ báŕ báŕ ndinə̄ń ō, tītə̄ yā de kə́ Sidon gə̄. Tá ɓáý to̰ ní mban̄g gətóo kem ɓē ní tə́ ō, de kə́ yā ko̰o̰ ɓē dɔdə́ tə́ gətóo ō. Nin̄ ndin̄ ɓē i sa̰y rɔ̄ Sidon gə̄ tə́ ō, ndin̄ i kə ta kūl̄ deē kógə̄ḿ aĺ ō.

⁸ De ké mí gə̄ ní tél aw̄n̄ gogə́ rɔ̄ ngákó̰ó̰də́ gə̄ tə́ kem ɓē kə́ Sora tə́ ō, Esətaol tə́ ō. Ngákó̰ó̰də́ gə̄ dəjen̄də́ gír̄ yādə́ kə́ dɔ loo ń aw̄ əndān̄ ma̰ȳ tə́ ní.

⁹ Anī nin̄ tél ədan̄ na: Ḭ́ḭḭ̄ dɔɔ́ ādə̄ j-aw̄ jə-rɔ̄ɔ̄ī Lais gə̄ tām̄ j-a̰a̰ kadə̄ dɔ nang yādə́ ní i dɔ nang kə́ majə ngá̰ý. Á, sḭḭ̄ ī-ndiī tasí mbóo a? Ī-lōōī kadə̄ kɔr bā̰ā̰ yāsí ɔgə̄sí kaw̄ kugə̄ dɔ nang ní tə́ ba taā kə́ yāsí tə́.

¹⁰ Ré ūgī kem ɓē ní tə́ anī, ā ə́ngeī de gə̄ kə́ ndin̄ kanjə̄ sōl̄ yá̰á̰ kógə̄ḿ. Yá̰á̰ kógə̄ḿ ké ɔgə̄ kudə kem ɓē ní tə́ gətóo, tɔdɔ̄ Nə́ɓā əla ɓē ní kem jīsí tə́ kɔ̄ɔ́ ɓá. Loo ní i loo kógə̄ḿ ké yá̰a̰ kənge malang kə́ dɔ nang tə́ i tū tə́.

^11-12 Loo ń noō tə́ de kə́ gír kojə yā Dan tə́ gə̄ ɓú mehḛ́ ḭḭn̄ kem ɓē kə́ Sora tə́ ō, kə́ Esətaol tə́ ō, kə yá̰a̰ rɔ̄ɔ̄ yādə́ gēé jīdə́ tə́, ba aw̄ əndān̄ gérger yādə́ Kiryat Yearim, dɔ nang kə́ Juda tə́. Ré deē ra Kiryat Yarim anī loo ń əndān̄ gérger yādə́ tū tə́ ní i kə̄ dām̄ kə́ no ɓē tə́. I tām̄ najə̄ ń noō tə́ n bátə́ ɓōólaā gə̄gē a ɓārə́n̄ loo ní na i Mahane Dan ní.

^13-14 Nin̄ ḭḭn̄ loo ní tə́ aw̄ ugə̄n̄ ɓē Mika, gō nang kə́ mbalá yā Epəraim tə́. Anī de kə́ mí gə̄ ń aw̄ əndān̄ ma̰ȳ dɔ nang kə́ Lais kété ní ədan̄ madə̄də́ gə̄ na: Ɓesə̄ Epod ō, Terapim gə̄ ō, ɓesə̄ kə́ tɔ́l ō, ɓesə̄ yá̰á̰ kə́ rang kə́ no horoó ō, ton̄ kem kújə́ kógə̄ḿ kə́ dan madə̄ gə̄ ń noō tə́ ní ī-gerī a? Ngɔlaā ní majə kadə̄ ī-gerī yá̰á̰ ń sɔɔ̄ kadə̄ ī-rāāī ní.

¹⁵ Gō tə́ anī de kə́ mí gə̄ ní ɔtə aw̄ udən̄ kem kújə yā Mika tə́ ba dəjen̄ ngōn̄ Lebi kə́ balsáá ń ndi kemeé ní na kə́ to i ba̰ý wa?

¹⁶ Ba de kə́ ɓú mehḛ́ gə̄ kə́ gír kaa yā Dan tə́ ń aw̄n̄ kə yá̰a̰ rɔ̄ɔ̄ yādə́ gēé ní ran̄ ta kújə́ tə́ ndágá.

¹⁷ De ké mí gə̄ ní al̄ aw̄n̄ kem kújə́ ké dɔɔ́ tə́ aw̄ unən̄ ɓesə̄ kə́ tɔ́l ō, Epod ō, ɔyn̄ Terapim gə̄ ō, unən̄ ɓesə̄ yá̰á̰ kə́ rang kə́ nō horoó ō, ba nge tun̄ yá̰á̰ tá ra ndágá kə de kə́ ɓú mehḛ́ gə̄ ń yá̰a̰ rɔ̄ɔ̄ i jīdə́ tə́ ní.

¹⁸ Nge tun̄ yá̰a̰ əda de kə́ mí gə̄ ń unən̄ ɓesə̄ kə́ tɔ̄l̄ ō, Epod ō ɔyn̄ Terapim gə̄ ō, unən̄ ɓesə̄ ō, yá̰á̰ kə́ rang kə́ no horoó ō ní na kə́ a rāān̄ i rí n noó wa?

¹⁹ Anī nin̄ tél ədanən̄ na kə utə̄ tan, kə lōō kɔr̄ najə̄ ba kə aw̄ sedə́, kə tél bɔbə̄də́ ō, nge tun̄ yá̰a̰ yādə́ ō. Kə́ tām̄ yān tə́ ní i tél nge tun̄ yá̰a̰ yā gír ɓē kə́ Israel tə́ kə taā malang n i sótə́ aké i ndi tun̄ yá̰a̰ tām yā gír kojə yā de kə́ kógə̄ḿ beē tə́ n i só tə́ ní wa.

²⁰ Najə̄ ń noō nel̄ kem nge tun̄ yá̰á̰ ní. Adə̄ un Epod ō, ɔy Terapim gə̄ ō, un ɓesə̄ ní ō, ba udə dan ɓūtə̄ de gə̄ ní tə́.

²¹ De gə̄ yā Dan gə̄ ní tél unən̄ róbə́ gír njadə́. Adə̄n̄ ngán gə̄ ō, yá̰a̰ kul̄ gə̄ ō, yá̰a̰ kətō gə̄ ō, i kété nodə́ tə́, ba nin̄ kɔ́ gə̄ tá i gogə́.

²² Dan ń əya̰n kújə yā Mika ba aw̄ teēn̄ sa̰y anī Mika nin̄ kə madə̄ ɓēn gēé ndangən̄ naā ba ndɔ̄də̄n̄ gōdə́.

²³ Nin̄ əgan̄ kɔŕ dɔ de gə̄ yā Dan tə́ anī de gə̄ ní tūrə̄n̄ tadə́ ba ədan̄ Mika na ké i rí n rāān áké ndang de gə̄ kə ngɔ̄dɔ̄ɔ́ beē wa?

²⁴ Anī ni-tél ədadə́ na: Ɓesə̄ gə̄ ń m̄-rāādə́ tām̄ yāḿ tə́ ní sḭḭ̄ ɔ́yiīdə́ kɔ̄ɔ́ ō, āwī kə nge tun̄ yá̰a̰ yāḿ kɔ̄ɔ́ ō. Yá̰a̰ yāḿ kə́ na̰y gətóo anī ī-tél ī-dəjemī na ké i rí n rāām̄ wa a?

²⁵ Nin̄ tél ədanən̄ na: Ādə̄ deē oō kōōí to̰ alé. Na sōgə́ wōn̄g rāā de kə́rēý gə̄ anī a rɔ̄ɔ̄n̄sí. Loo ń noō tə́ ā ī-tḭ̄ḭ̄ ta rɔ̄í ō, ā ī-tḭ̄ḭ̄ ta de gə̄ kə́ kem kújə yāí tə́ gə̄ ō.

²⁶ Gō tə́ anī de gə̄ yā Dan gə̄ ní ɔrə̄n̄ dɔɔ́ aw̄n̄ Dan ń Mika a̰a̰ kadə̄ tɔ́gə́də́ tɔȳ yān anī tél dɔ tə́ aw̄ gogə́ ɓēé.

Ɓē ké Dan ō, loo kə́ táĺ kə́ tū tə́ ō

²⁷ Deē yā Dan gə̄ ní aw̄n̄ kə yá̰a̰ gə̄ ń Mika rāā ní ō, kə nge tun̄ yá̰a̰ yān ní ō. Aw̄ ugə̄n̄ Lais anī rɔ̄ɔ̄n̄ de kə́ kem ɓēé gə̄ ń ndin̄ loo yādə́ jəke kanjə̄ sōl̄ yá̰á̰ kógə̄ḿ ní. Nin̄ tɔ̄lə̄n̄də́ malang kɔ̄ɔ́ kə kəyā kaskaraá ba əlan̄ hor dɔ ɓē tə́.

²⁸ Lais i ɓē ké ndi ndágə loo kə́ Bet Rehob tə́. Ndi i sa̰y kə ɓē kə́ Sidon. Tá de kə́ kemeé gə̄ ndin̄ i kə ta kūl̄ deē kógə̄ḿ alé i tām̄ najə̄ ń noō tə́ n de kə́ kadə̄ reē dḭḭ̄də́ gətóoń ní. Deē yā Dan gə̄ tél rāān̄ ɓē ní gogə́ rang ba ndin̄ kemeé.

²⁹ Túrə̄n̄ gír rī kə́ kété ń na i Lais ní kɔ̄ɔ́ ba əndān̄ rī kaadə́ Dan ń i ngōn̄ Jakob ní tá dɔ tə́.

³⁰ Udən̄ ɓesə̄ yā Mika ní ō, Yonatan ngōn̄ Gersom kə́ ngōn̄ Moijə tél nge tun̄ yá̰a̰ yā de gə̄ kə́ gír ɓē yā Dan tə́ ō. Ngán Yonatan gə̄ ō, ngán kaan gə̄ ō rāān̄ kəla tun̄ yá̰á̰ ní bátə́ ɓāl̄ ń de ké kem ɓēé gə̄ aw̄nəń ɓəlo tə́ ní.

³¹ Nin̄-ngɔ̄mə̄n̄ ɓesə̄ kə́ tɔ́l yā Mika ní adə̄ ra loo ń udənən̄ tū tə́ ní bátə́ ndɔ̄ ń kújə yā Nə́ɓā gətóoń Silo tə́ ní.