NGÉ SARYA 16 - Bibəl ta Sar̄

Samso̰ ō, bápə gə̄ kə́ ta róbə́ tə́ ō

¹ Ndɔ̄ kə́rēý tə́ Samso̰ aw̄ kem ɓē kə́ Gaja tə́, anī ənge dəyá̰ ájə́ba kógə̄ḿ. Ni-ɓīī kə dəyá̰ ní.

² Ədan̄ de kə́ kem ɓē kə́ Gaja tə́ gə̄ na Samso̰ ugə̄ laā. Anī njə̄rā a sāānən̄ kem ɓēé ō, gētə̄nən̄ ta róbə ndogə̄ mbal̄ kə́ yā kudəń kə̄ kem ɓēé tə́ ō ndɔ̄ɔ́ bátə́ loo tīī dɔdə́ tə́. Banī rāān̄ yá̰á̰ kógə̄ḿ kə Samso̰ ndɔ̄ɔ́ alé, tām̄ gírə̄n̄ kadə̄ i dəloí pá tá kə n-tɔ̄l̄nən̄.

³ Banī Samso̰ to nang tə́ bátə́ ugə̄ i kum mbang kə́ dan ndɔ̄ tɔyɔ́ tə́ ngóy. Ni-ḭḭ dan loo tə́ əhɔ bápə gə̄ kə́ ta róbə ndogə̄ kə́ yā kudəń kə̄ kem ɓēé tə́ ō, kāgə̄ ta róbə ndogə̄ kə́ jōó gə̄ ō, ɔr̄də́ gidə kógə̄ḿ naā tə́ kə sáa kāgə̄ kə́ yā dēsə́ kutə̄ń ta róbə ndogə̄. Ni-ɔydə́ bɔ̄gə̄n tə́ ba aw̄ ɓōkə́də́ dɔ mbal̄ ń ra sɔɔ̄n̄ ta naā kə ɓē kə́ Hebron ní tə́.

Dalila ō, Samso̰ ō

⁴ Gō tə́ anī nel̄ Samso̰ kə dəyá̰ kógə̄ḿ kə́ rīn na i Dalila. Dəyá̰ ní ndi i wól loo kə́ Sorek tə́.

⁵ Anī mban̄g kə́ mí gə̄ yā Pilistin gə̄ reēn̄ rɔ̄ Dalila tə́ ba ədanən̄ na n-a n-adə̄nən̄ sélə̄ arjā̰a̰ dūbú kə ɓú kógə̄ḿ kə dɔdə́ gēé malang, ba kə tɔ́y Samso̰ kadə̄ ɔjən gíŕ yá̰á̰ ń a ngangə̄ń ngá̰ý ní ō, yá̰á̰ ń kadə̄ n-rāān̄ tá n-tetənnə̄ń rɔ̄ɔ̄ ba n-do̰ō̰nəń kə kəlaá kadə̄ asə rāā yá̰a̰ to̰ aĺ ní ō.

⁶ Tā anī Dalila əda Samso̰ na kə ɔjən gíŕ yá̰á̰ ń ngangə̄ń ngá̰ý ní ō, loo do̰ō̰n kə́ kadə̄ asəń rāā yá̰a̰ to̰ aĺ ō.

⁷ Samso̰ tél ədan na ré do̰ō̰nən̄ kə kəlā ga̰ gərā kə́ kijə gə̄ sīrí kə́ tutən̄ aĺ ɓáý anī, tɔ́gən na a gətóo ō, na n-tél yā to tītə̄ gotə deē ndul gə̄ ō.

⁸ Mban̄g yā Pilistin gə̄ adə̄n̄ Dalila kəlā ga̰ gərā kə́ kijə gə̄ sīrí kə́ tutən̄ aĺ ɓáý gə̄ adə̄ Dalila do̰ō̰ń Samso̰.

⁹ Ni-ɓɔ̄ de gə̄ kújú ba un ndūn kə̄ dɔɔ́ ədan Samso̰ na: Samso̰ á̰a̰ Pilistin gə̄ dɔí tə́. Anī Samso̰ gán̄g kəlā gə̄ kə́ rɔ̄n tə́ kɔ̄ɔ́ tītə̄ loo gán̄g kəlā kə́ hor o̰o̰ beé. Adə̄ deē ger̄ yá̰á̰ ń a ngangə̄ń ní alé.

¹⁰ Tā anī Dalila əda Samso̰ na: Ḭ̄ ī-lurəm̄ i mbée, ə́dam̄ i najə̄ kə́ rɔ̄kum alé. Ní ngɔlaā ɔ́jəm̄ loo do̰o̰ī tā.

¹¹ Samso̰ tél ədan na ré na do̰ō̰nən̄ kə kəlā kə́ kijə kə́ deē rāań kəla aĺ ɓáý anī tɔ́gən na a gətóo ō, na n-tél yā to tītə̄ gotə deē ndul gə̄ ō.

¹² Dalila ɔy kəlā kə́ kijə gə̄ tóoń Samso̰. De gə̄ ɓɔ̄ɔ̄n̄ rɔ̄də́ kújú ɓáý. Anī ni un ndūn kə̄ dɔɔ́ ədań Samso̰ na: Samso̰ á̰a̰ Pilistin gə̄ dɔí tə́. Banī Samso̰ gán̄g kəlā gə̄ kə́ jīn tə́ kɔ̄ɔ́ tītə̄ loo gān̄g ngōn̄ kəlā kə́ dūú beē.

¹³ Dalila əda Samso̰: Ḭ̄ ī-rāā i kəla lurəm̄ kə̄ noí tə́, ədam̄ i najə̄ kə́ mbáý gə̄. Ní ngɔlaā ɔ́jəm̄ loo do̰o̰ī tā. Samso̰ tél ədan: Ré ī-do̰ō̰ nənga dɔḿ kə́ tūm̄ gír loo sīrí ń noō tū kāgə̄ kəjō kūbə̄ tə́ anī tɔ́gə́ḿ a gətóo ō, m-ā m̄-tél yā to tītə̄ gotə deē ndul gə̄ ō.

¹⁴ Dalila rāā Samso̰ adə̄ to ɓīī ba do̰ō̰ nənga dɔn kə́ tūm̄ gír loo sīrí ní tū kāgə̄ kəjō kūbə̄ tə́, ba un ndūn kə̄ dɔɔ́ ədań Samso̰ na: Samso̰ á̰a̰ Pilistin gə̄ dɔí tə́. Samso̰ ndól̄ dɔ ɓīī tə́ anī ɔr̄ yá̰a̰ kəjō kūbə̄ ní kɔ̄ɔ́ kə kāgə̄n gēé malang.

¹⁵ Dalila əda Samso̰ na: Dan ń ī-taā kemḿ aĺ ní loo kadə̄ ədam̄ na nelī seḿ i ba̰ý? Á̰a̰ā̰, i nja kə́ nge ko̰ mətá n ī-lurəm̄ ō, ɔ́jəm̄ gíŕ yá̰á̰ ń ī-ngangə̄ń ní aĺ ō toó.

¹⁶ Ba dan ń Dalila a njə́ɓā Samso̰ i kə dɔ ndɔ̄ gə̄ kə najə̄ kə kógə̄ḿ beē nəkɔ́ n toō ní, kɔr rāā Samso̰ adə̄ ɔjən gíŕ yá̰á̰ ní,

¹⁷ əda na: Jóo toó deē əla nənga dɔḿ tə́ dəsāń dɔḿ aĺ ɓáý. Tɔdɔ̄ ɔrə̄n̄ kamə̄ḿ tām̄ yā Nə́ɓā tə́ i dan ń mā i kem kó̰ḿ tə́ ɓáý ní. Adə̄ ré deē dəsā dɔḿ kɔ̄ɔ́ anī tɔ́gə́ḿ a teē rɔ̄ḿ tə́ kɔ̄ɔ́ ō, m-ā m̄-ngan̄g aĺ tītə̄ yā gotə deē ndul gə̄ ō.

¹⁸ Dan ń Dalila a̰a̰ kadə̄ Samso̰ ɔjən gíŕ yá̰á̰ ní anī əla ɓāŕ mban̄g gə̄ yā Pilistin gə̄ tə́. Ədadə́ na kə reēn̄ tā, tɔdɔ̄ Samso̰ na ɔjən gíŕ yá̰á̰ ní kɔ̄ɔ́ ɓá. Mban̄g gə̄ yā Pilistin gə̄ ní aw̄n̄ ɓē Dalila i kə gúrsuú jīdə́ tə́.

¹⁹ Dalila rāā Samso̰ adə̄ to i dɔ njan gə̄ tə́ n a ɓīiń ní. Ba ni ɓāŕ dəngam kógə̄ḿ adə̄ dəsā dɔ Samso̰ ń i kə́ tūm̄ gír loo sīrí ní kɔ̄ɔ́. Loo ń noō tə́ Samso̰ əla gír ngan̄g aĺ ō, tɔ́gən teē rɔ̄n tə́ kɔ̄ɔ́ ō.

²⁰ Dalila un ndūn kə̄ dɔɔ́ ədań Samso̰ na: Samso̰ á̰a̰ Pilistin gə̄ dɔí tə́. Samso̰ ndól̄ dɔ ɓīī tə́ anī ɔjəń na n-a n-teē kum tə́ tītə̄ kə́ kété ɓáý, tɔdɔ̄ ni ger̄ kadə̄ Kɔ́ɔ̄ɓē ɔr̄ jīn gírən tə́ kɔ̄ɔ́ alé.

²¹ Pilistin gə̄ əhɔn̄ Samso̰ ba tɔ́sə̄n̄ kuməngə̄ tɔ̄ɔ̄n̄. Nin̄ aw̄n̄ seneé kem ɓē kə́ Gaja tə́, tṵ́ṵ̄nən̄ kə súl gində̄ nə̄ngá kasə kə́ kəga gidə naā tə́ jōó ba əndānən̄ ta kəla kusə ndujə̄ gémé tə́ kújə dəngáyá.

²² Banī nənga dɔn ń i kə́ dəsā kɔ̄ɔ́ ni-tél əɓa gogə́ rang.

Yá̰á̰ kə́ to rī ɓār̄ ń Samso̰ rāā oyń ní

²³ Ndɔ̄ kə́rēý tə́ anī mban̄g gə̄ yā Pilistin gə̄ kánə̄n̄ naā yā tun̄ yá̰a̰ kadə̄ nə́ɓā yādə́ ń rīn na i Dagon ní ō, yā rāań rɔ̄nel̄ ō. Nin̄ ədan̄ na i nə́ɓā yādə́ n na əla madə̄ ba̰ā̰də́ Samso̰ kem jīdə́ tə́ ní.

²⁴ De gə̄ a̰a̰nən̄ anī tɔ̄yn̄ nə́ɓā yādə́ ədan̄ na: Madə̄ ba̰ā̰jí ń i nge nujə ɓē yājí ō, nge tɔ̄l̄ de gə̄ yājí gə̄ ngá̰ý ō ní, nə́ɓā yājí əlan kem jījí tə́.

²⁵ Dan ń rɔ̄ de gə̄ nel̄də́ tā ní dəjen̄ kadə̄ Samso̰ kə reē kə rāā yá̰á̰ kə́ to kəgō gə̄ nodə́ tə́ kadə̄ kə n-əgōnəń naā. Loo ń noō tə́ aw̄n̄ gō Samso̰ tə́ kújə dəngáyá reēn̄ seneé. Ni-rāā yá̰á̰ kə́ to kəgō gə̄ nodə́ tə́ adə̄ əgōnəń naā. Ba gō tə́ anī aw̄ əndānən̄ dɔ dán bir̄ nja kújə gə̄ tə́ adə̄ ndi.

²⁶ Samso̰ əda ngōn̄ kə́ balsáá ń i nge kəhɔ ta jīn ní na kə aw̄ seneé kadə̄ n-ɔdə rɔ̄ bir̄ nja kújə́ ń ɔsə kújə ɓesə̄ kə̄ dɔɔ́ ní kadə̄ n-ndə̄nā rɔ̄n tū tə́.

²⁷ Dəngam gē dəyá̰ gē rosən̄ kem kújə ɓesə̄ ní ndáńg ndáńg. Mban̄g kə́ mí gə̄ yā Pilistin gə̄ ní reēn̄ kum tə́ ō, tá de gə̄ kə́ asən̄ dūbú mətá ń noō, dəngam gē dəyá̰ gē kum naā tə́ n kánə̄n̄ naā dɔ kújú dɔɔ́ ní.

²⁸ Samso̰ ɔr̄ najə̄ kə Kɔ́ɔ̄ɓēé əda na: Kɔ́ɔ̄ɓē Nə́ɓā, m̄-rāāī ɓɔ́, Nə́ɓā, ādə̄ əga kemií dɔḿ tə́ ba ādə̄m̄ tɔ́gə́ tə́ nja kógə̄ḿ beē ngóy, ādə̄ m̄-daləń ba̰ā̰ dɔ Pilistin gə̄ tə́ gidə kógə̄ḿ tām̄ yā kumḿ kə́ jōó gə̄ ń tɔ̄ɔ̄n̄ tə́ ní.

²⁹ Gō tə́ anī Samso̰ mám̄ kadə bir̄ nja kújə́ kə́ jōó gə̄ ń ɔsə kújə ɓesə̄ kə̄ dɔɔ́ ní, ba əndā jī ko̰n kadə̄ nge kə́ dām̄ kə́ ko̰ó̰ tə́ ō, əndā jī gelən kadə nge kə́ dām̄ kə́ geleé tə́ ō,

³⁰ ba əda na kadə̄ n-oy kə Pilistin gēé. Gō tə́ anī mbə́rē kāgə̄ nga dan kújə́ kə́ jōó gə̄ ní kə tɔ́gən gēé malang, adə̄ kújə ɓesə̄ ní tētə̄ dɔ mban̄g gə̄ tə́ ō, de gə̄ malang ń kánə̄n̄ naā kemeé ní ō. De gə̄ ń oyn̄ kə Samso̰ó̰ ndɔ̄ ń noō tə́ ní, kutədə́ tɔȳ de gə̄ ń tɔ̄l̄də́ dan ń ndiń kə kumneé ɓáý ní.

³¹ Ngákó̰o̰n gə̄ ō, de gə̄ malang kə́ kem ndogə̄ yā bɔbə̄n tə́ gə̄ ō, reē unən̄ nīnə́n aw̄nəń. Aw̄ dubə̄n̄ dɔ dán ɓē kə́ Sora tə́ kə ɓē kə́ Esətaol, kem bəlo ɓádə yā bɔbə̄n Manoa tə́. Samso̰ ɔr no ngán Israel gə̄ i ɓāl̄ kutə jōó.